AMOS 2:4 - Tanou Moonsoi Timugon

⁴ Indagu Tuhan, “Mamagun ru Jiuda ruruli' noyo makatula, sabap raginio maaru' ukumin Ku ilo. Inanggal nilo susuban Kuno am kalo mampalio ra pangilaan Kuno. Pinalayau ilo ru tuhan-tuhan ra bokon ondo' sambaan ru kinamatuaan nilo.

AMOS 2:4 ပူးပေါင်းရင်းမြစ်များ

2 RAJA'-RAJA' 17:19

Kaa' ulun ru Jiuda pana kalo giminagaya' ra ukum ru Tuhan, i Aki Kapuuno' nilo. Minaya' ilo ra kaindalaman ondo' binaal ru ulun ru Israil.

2 TUNUNG RU BANSA' ISRAIL 25:14

Paat ra Raja' Amajia minuli' intor ra pangayawan ra ulun ru Idom, inibit no minuli' sinungkalalaing ru ulun ru Idom am pinosoroi ngaangai' no giu' ra Jiuda. Io pana sumamba boo ra sinungkalalaing am nonolob ra kaminyan ra sinungkalalaing no.

2 TUNUNG RU BANSA' ISRAIL 30:7

Pai' tilu koson ra kinamatuaan mini am ulun pogondo' ra bansa' min Israil ondo' kalo giminagaya' ra Tuhan, i Aki Kapuuno' nilo. Koson ra napandayan min noyo, nangukum Io risilo ra maagat.

NIGIMIA 1:7

Natulaan akai toojo Rirun, am kalo nambaal ra susuban Muno. Kalo giminagaya' akai ra ukum ondo' tinaakan Muno ondo' pinabala' galing ri Musa, ulipon Muli.

NIGIMIA 9:26

Kaa' ulun Muno giminuor am kalo giminagaya' Rirun; tinalikuran nilo Taurat Muno. Pinatoi nilo nabi-nabi ondo' nampakara' risilo, am ondo' nanusub risilo sumaguli' Rirun. Ruruli' ilo magasab Rirun,

JISAYA 28:15

Ragu mino masawat, ra nangatang kau kunu' ra nabantuan ra kapatayan am pangiawan ra pagun ru ulun minatoi. Malansan kau ra karaat kalo makalumpa' ramuyun sabap ra lumansan kau ra abau am pamparuungan koson mangampin ra inan mino.

JISAYA 44:20

Binaal raginio nogondo' ayuk ra mangakan ra kaau. Pangkaraan nano pinalayau saboi kalo boo makaindangan riso. Kalo mangiou io ra sinungkalalaing ra ginuut nano sala' ka tuhan.

JIRIMIA 16:11

Balai' ilo ra koon raginio noyo ragu ru Tuhan, ‘Kinamatuaan min nangiruan Raki' am siminamba am nangandoi ayuk ra tuhan-tuhan ra bokon. Nangiruan ilo Raki' am marara' gumagaya' ra pangilaan Kuno.

JIRIMIA 16:12

Kaa' binaal mino malaat poyo intor ra binaal ru kinamatuaan mini. Ngaangai' min bambalingatan am malaat. Marara' kau gumagaya' Raki'.

JIRIMIA 17:27

Ngaangai' baal raginio masauk paat ra akau gumagaya' Raki' am mangiantak ra orou Sabat koson ra orou ondo' patimpokon ayuk Raki'. Pai' pangkayang ra maagat mansail ra kulobon-kulobon garabang ru Jirusalim paat ra orou raginio. Amon ru manggal kau ra susuban Kuno, solobon Ku koyoo' kulobon-kulobon garabang ru Jirusalim am niayuk istana-istana nano, am apui no kalo malasa' ru osoi pana.’ ”

JIRIMIA 6:19

Rongog no, okou tana' ti! Ulun Kuno marara' mangapu ra pangilaan Kuno am kalo gumagaya' Raki'. Ginio ra porotongon Ku karaat risilo koson ra ukuman ra ngaangai' inatangan nilo.

JIRIMIA 8:2

Kuayan no sala' ka timungon am lobongon poyo, kaa' koson polosoon ra tana' koson ra pampalabung. Bungul-bungul nilo makulipatak ra matuug ru sinda mato ru orou, sila' am butitin ondo' tagamin, intok mangandoi ayuk, sambaan am pakituluan nilo.

JIRIMIA 8:9

Ulun-ulun ondo' mangapintar ra gino min ngai' tauyuon, maubong am marakop ilo. Marara' ilo mangapu ra ragu Kuno; raino, kapintaran ra atan kia ondo' lakat poyo soroi risilo?

JIRIMIA 9:14

Bambalingatan ilo am siminamba ra sinungkalalaing Baal koson ra ondo' nangilaan ru kinamatuaan nilai.

YEHEZKIEL 13:22

“Nabaya' ra abau mino kinalawo min guang ru ulun moonsoi, ondo' kalo masaga' Ku jamarin. Nangunsu' kau ra ulun malaat maa' raginio marayus mambaal ra kalaatan saboi kalo mabayag ilo.

YEHEZKIEL 20:13

Kaa' giu' ra tana' kaagisan no pana minanggal ilo Raki'. Minanggal ilo ra ukum Kuno am nangimpai ra susuban Kuno, ondo' mangani' ra kaayagan ra osoi ayuk gumagaya' raginio. Totopot nilo jinamol orou Sabat. Nakatampos Aku no koson mompoloso risilo makaliman ra ngaangai' kinoporos ru sangit Kuno giu' ra tana' kaagisan no am masaga' Aku mamuso risilo.

YEHEZKIEL 20:16

Binaal Ku ginio sabap nangimpai ilo ra susuban Kuno, minanggal ra ukum Kuno am nampajamol ra orou Sabat. Masaga' ilo poyo sumamba ra sinungkalalaing nilo.

YEHEZKIEL 20:18

Kaa' pinakara' Ku ilo ondo' mangamulok: Pai' gagaya' ra ukum ru kinamatuaan min; pai' pagibaya' ra kaulayan nilo galama', am pai' jamali' inan ra sumamba ra sinungkalalaing nilo.

YEHEZKIEL 20:24

Binaal Ku ginio sabap ra nangimpai ilo ra susuban Kuno, minanggal ra ukum Kuno, nampajamol ra orou Sabat am siminamba ra sinungkalalaing ondo' sambaan ru kinamatuaan nilo.

YEHEZKIEL 20:30

Ginio ra posoboyo' noyo atan ondo' paraguon Kuno, Tuhan Raja' ra ulun ru Israil: Kua kia musiti' kau makatula koson ra kinamatuaan min, am nangilou ra sinungkalalaing nilo?

YEHEZKIEL 22:28

Nabi-nabi nambuni ra tula-tula raginio koson ra ulun nangapur ra timbok. Nakakito ilo ra pinaintalang ondo' magabau, am nambaal ilo ra ragu inala' ondo' magabau niayuk. Minindagu ilo ra nampasaboi ilo ra ragu intor ra Tuhan, Raja', kaa' Aku, Tuhan kalo minindagu risilo.

YEHEZKIEL 22:8

Kalo urumaton min intok-intok ondo' matulai am kalo iantakon min orou Sabat.

GOSIA 12:2

Ngaangai' ondo' binaal ru ulun ru Israil intor ra susuab ti saboi ra mamai' ngaangai' no kolondo' onong, kaa' niayuk paliso no mamuso koson ra angin sirangon. Abau am kalaatan gumaai-gaai ra gino po ngai' nilo. Nambaal ilo ra nabantuan ra Asyur am niayuk nagibit ra umau giu' ra Misir koson ra tatandu' ru pabukatan.”

GOSIA 12:3

Tuhan mokoondo' ra panguwan ra ulun ru Jiuda; am mangukum Io ra ulun ru Israil niayuk sabap ra paliso nilo. Mambalos Io ra binaal nilo.

GOSIA 6:11

Koson ramuyun, akau ulun ru Jiuda, inaru' Ku noyo orou koson mangukum ramuyun niayuk sabap ra binaal min.”

AMOS 1:3

Indagu Tuhan, “Mamagun ru Damsyik ruruli' noyo makatula, ginio ra maaru' ukumin Ku ilo. Pamakuan nilo ra ulun Giliad malaat kaga'.

AMOS 3:2

“Intor ra ngaangai' bansa' ra tana' ti, akau noyo rorondo' bansa' ondo' nauligan Kuno am alungin. Ginio sabap ra tula min maayo, am musiti' ukumin Takamin.”

MIKA 6:12

Ulun langkaya' ra gino ngai' min mangimbolo' ra ulun musikin; akau ngaangai' magabau.

ABAKUK 2:18

Atan onong ru sinungkalalaing? Sinungkalalaing binaal ayuk ru ulun am ondo' noowot min intor raginio abau ayuk toojo. Atan kia kalabaan ondo' moowot ru ulun nambaal ra sinungkalalaing intor ra sinungkalalaing no? Sinungkalalaing kalo mindagu!

ROMA 1:25

Pangilaan motopot intor ri Aki Kapuuno' aligin nilo boo ra abau. Maansayan ilo sumamba am mongompor ra atan ondo' sinauk ri Aki Kapuuno' ka i Aki Kapuuno' galama', ondo' sotopot no omporon ra sabuoi-buoi no! Amin.

1 TISALONIKA 4:8

Ginio nai ra osoi ayuk kalo mangapu ra pangilaan ti, sala' ka ulun ayuk ondo' kalo apuon nati, kaa' i Aki Kapuuno' galama', ondo' mangani' ra Ambiluo Nano ramuyun.

1 PITRUS 1:18

Nakapandai kano ra logo ondo' binayaran nampalabus ramuyun intor ra kaulayan ra kolondo' onong ondo' sinugul min intor ra kinamatuaan min i. Pai' ru koson ra pirok kapoam mas ra maalap kalunsai no ondo' nakapampalabus ramuyun;

TINGGANAI RU BANSA' 10:6

Igondo' poyo ulun ru Israil makatula ra Tuhan. Sinamba nilo Baal am Asyitorit am niayuk dewa ru bansa' ru Siria, Sidon, Moab, Amon am Palistin. Nangiruan ilo ra Tuhan am kalo boo sumamba Riso.