ABAKUK 1:12 - Tanou Moonsoi Timugon

¹² Iou Tuhan, Okou i Aki Kapuuno' intor noyo ra galing. Okou i Aki Kapuuno' kuno ondo' matulai am mantilayun. Iou Tuhan, i Aki Kapuuno' kuno am manindung raki', nampili' Kou ra ulun Babilonia; nampaikang Kou risilo maa' raginio makapangukum ramon.

ABAKUK 1:12 ပူးပေါင်းရင်းမြစ်များ

SAGULION 32:4

“Tuhan manaung ramuyun ondo' mapanggol, Io matanda' am matimpok ralalom ru ngaangai' baal; i Aki Kapuuno' min mampagagaya', kolondo' abau Riso, nambaal Io ra ondo' moonsoi am ondo' motopot.

MAZMUR 90:2

Kalo poyo sinauk Mu ngaangai' bulur, kalo poyo binangun Mu tana' ti, Okou noyo i Aki Kapuuno' ra mantilayun, i Aki Kapuuno' ra sabuoi-buoi no.

SAGULION 33:27

I Aki Kapuuno' ondo' mantilayun masauk ra mangampin ramuyun, am kalindu' Nano manungka' ramuyun. Paat ra akau jumalai, napagiru' Io ra pantula' min, am nanusub ramuyun mamuso risilo ngaangai'.

JIRIMIA 46:28

Matong Aku am mamayag ramuyun. Pusoon Ku ngaangai' pagun intok nampatutuliaran Kuno ramuyun, kaa' kalo mamuso Aku ramuyun. Kalo palabuson Takamin intor ra ukuman, kaa' paat Takamin ukumin, matimpok Aku. Aku, Tuhan, nakaindagu noyo.”

JIRIMIA 30:11

Matong Aku am mamayag ramuyun. Pusoon Ku ngaangai' bansa' intok nampatutuliaran Kuno ramuyun, kaa' akau kalo pusoon Ku. Akau kalo palabuson Ku intor ra ukuman, kaa' matimpok Aku paat mangukum ramuyun. Aku, Tuhan, nakaindagu noyo.”

MAZMUR 93:2

Panturungan Muno, iou Tuhan, mapiot intor noyo ra galing i, am soroi Kou noyo intor poyo ra talimpuun i.

IBRANI 13:8

I Jisus Kristus kalo makulau, intor ra galing i, raino am ra sabuoi-buoi no.

1 TIMOTIUS 6:16

Io no rorondo' ayuk mantilayun. Io maayag ra ralalom ru sinda ondo' kalo maalap kainggaari' ru ulun makatula. Kolondo' sangulun pana nakaili' nakakito Riso kapoam makakito Riso. Gama' ru urumaton am manguasa' Io ra sabuoi-buoi! Amin.

1 TIMOTIUS 1:17

Io Raja' ra mantilayun, kalo mapuso am poyo kalo maalap kakito, Io no rorondo' ayuk i Aki Kapuuno'. Urumato' am omporo' takau i Aki Kapuuno' ra sabuoi-buoi no. Amin.

RINALATAN 3:14

I Jisus noyo matulai am moonsoi, kaa' kalo inapu min Io, am kinitaak min i Pilatus nampalabus ra sangulun mamamatoi.

MALIAKI 3:6

“Aku noyo Tuhan; kalo makulau Aku. Ginio ra akau, papag ri Jakub, kalo pusoon ra malingon.

ABAKUK 3:2

Iou Tuhan, nokorongog aku no ra intor ra binaal Muno, guang kuno natikop ra imuag. Gama' ru baalon Mu poyo binaal Muno ondo' makaimuag ra paat maiti. Pakaasi' no ramon kabalu' pana sumangit Kou.

MIKA 5:2

Ginio ra nompoloso Tuhan ra ulun Nano kinuasa' ru pantula' saboi ruandu' ondo' maganak no makapaganak ra anak ungkuyon nano. Kopongo raginio ulun ralalom pamatiran tumimung saguli' mabaya' ra bansa' nilo.

YEHEZKIEL 30:25

Mampalawo Aku ra raja' ru Misir, kaa' mampaikang Aku ra raja' ru Babilonia. Paat ra Aku mampabanta' ilang Kuno ra kalindu' ru raja' ru Babilonia, paakangon no ilang no ra tampilon Misir, ngaangai' ulun makapandai ra Aku noyo Tuhan.

SULABOI 5:19

Kaa' Okou, iou Tuhan, raja' ra sabuoi-buoi no, mamarinta Kou ra kolondo' pupus.

JISAYA 43:15

Aku noyo Tuhan, i Aki Kapuuno' mino, i Aki Kapuuno' ondo' matulai. Aku noyo namangun ramuyun, akau Israil, Aku noyo raja' min.”

JISAYA 40:28

Kalo kia nakapandai kou? Kalo poyo kia nokorongog kou? Tuhan iono i Aki Kapuuno' ondo' mantilayun; Io no namangun ra titikop ru tana' ti. Kalo igondo' Io kaagui kapoam boboon. Kolondo' osoi-osoi pana makapandai ra pangkaraan Nano.

PINAINTALANG 1:8

“Aku noyo talimpuun am Aku noyo pupus,” ragu ru Tuhan, i Aki Kapuuno' Ondo' Maayo Kaga' Kuasa', ondo' soroi raino, galing i am pupus no pana.

JISAYA 49:7

I Aki Kapuuno' matulai Mamamayag ru Israil mindagu ra ulun ondo' asasabin toojo, am ondo' kasisangin ru bansa'-bansa' am niayuk masauk ra ulipon ru nasuangan mangunguasa', “Raja'-raja' makakito ra binaal Kuno, am sumukal ilo am mangurumat Raki'. Nasuangan ru mangunguasa' magilong niayuk riso, am migulatur sumamba.” Ginio masauk sabap ra Tuhan nampili' noyo ra ulipon Nano; i Aki Kapuuno' matulai ru Israil manugut ra bantu' Nano.

JISAYA 37:26

Kalo kia igondo' kau pokorongog ra Aku noyo nangatang ra ngaangai' no intor poyo ra galing i? Ragino binaal Ku noyo. Nanaak Aku rirun ra kuasa' koson mamuso ra bandar-bandar makatimbok saboi nongopopol.

MAZMUR 118:17

Kalo matoi aku, kaa' maayag aku, koson mantunung ra binaal ru Tuhan.

MAZMUR 18:1

Ra tingganai ru santimungan maririmbai. Mazmur ri Daut, ulipon ru Tuhan. Rinimbai ra Tuhan paat ra Tuhan namayag ri Daut intor ra Raja' Saul am niayuk intor ra ngaangai' pantula' nano.

MAZMUR 17:13

Luat no, iou Tuhan, anggalo' pantula' kuno saboi maala! Bayago' aku ra ilang Muno paat ra ulun malaat mampatoi raki'.

2 RAJA'-RAJA' 19:25

Kalo poyo kia nokorongog kou ra Aku noyo nangatang ra ngaangai' no intor ra galing i? Raino binaal Ku noyo. Aku no ondo' nangani' rirun ra kuasa' koson mamuso ra bandar-bandar mokoondo' ra kubu saboi nasauk ra tuntur ru batu.

1 SAMUIL 2:2

“Kolondo' sangulun pana matulai koson ra Tuhan; kolondo' mokogondo' Riso; i Aki Kapuuno' takano ayuk makapanaak ra panindungan.

PINAINTALANG 1:11

Kono, “Tulisi' noyo ondo' makito muno, am paatari' surat no ra tulu' pasimpungan ulun Kristian giu' ra bandar Ipisus, bandar Simirna, bandar Pirgamum, bandar Tiatira, bandar Sardis, bandar Piladilpia am bandar Laodikia.”

JIRIMIA 5:18

Indagu Tuhan, “Kaa' paat raginio pana kalo mamuso Aku ra ulun Kuno ra malingon.

JIRIMIA 4:27

Minindagu Tuhan ra titikop ru tana' ti masauk ra tana' kaagisan, kaa' kalo pusoon No lingono'.)

JISAYA 57:15

Aku noyo i Aki Kapuuno' Ondo' Masawat Kaga' am Matulai Kaga', ondo' maayag ra sabuoi-buoi no. Mayan Aku ra intok masawat am matulai, kaa' mayan Aku niayuk mababaya' ra ulun ondo' minggana' guang am ondo' timinalikur intor ra tula, koson mapatapuli' ra ambiluo am kalansanan nilono.

KASAUKAN 21:33

Pantanom boo i Abragam ra puun tamariska ra Birsyiba am intok sambaan nano ra Tuhan i Aki Kapuuno' ondo' mantilayun.

MAZMUR 102:24

Kinalawo aku ru Tuhan bulintok ra aku lakat poyo mamulok; kariwaan No umur kuno.

JISAYA 31:1

Aibui boo ra ulun ondo' mongoi ra Misir koson makiindangan! Lumansan ilo ra kaikangan ru pulalai mangayou ru Misir ondo' kumura' ra kuda am kurita' kuda am saujor. Kaa' kalo lumansan ilo ra Tuhan, i Aki Kapuuno' ru Israil, i Aki Kapuuno' ondo' matulai kapoam makiindangan Riso.

JISAYA 37:23

Osoi kia inulas am inasaban muno? Paliso muno lumimbau Raki', i Aki Kapuuno' ru Israil, i Aki Kapuuno' ondo' matulai.

ABAKUK 3:6

Paat ra Okou lumonggo', muyog tana' ti; paat ra Okou magilong, bansa'-bansa' songongonsol. Gunung-gunung ondo' lair noyo soroi natutuk kalingon; bulur-bulur ondo' nagulayun soroi pana liminonson, bulur-bulur intok Muno mugar intor noyo ra galing.

MALIAKI 3:5

Mindagu Tuhan Ondo' Maayo Kaga' Kuasa', “Matong Aku koson mangakim ramuyun. Mataki' Aku masauk ra sasi' koson manggal ra ulun mapandai kaga' ra sihir, ulun mansawa', ulun mangani' ra inono' kalo motopot, ulun nambaal ra malaat ralalom ru baal mampagaji' ra ulun mangandoi, ulun ondo' mangimbolo' ra ruandu' napuor, nailusan ra matuo, am ulun bansa' ra bokon, am niayuk ra ngaangai' ulun ondo' kalo mangurumat Raki'.”

MAZMUR 74:12

Kaa' Okou noyo Raja' mai, iou Aki Kapuuno', intor poyo ra galing i; masalok Kou manaak ramon ra kamanangan ra pagun ti.

MAZMUR 90:1

Pakiasian ri Musa, ulipon ri Aki Kapuuno'. Iou Tuhan, Okou noyo intok mai sumindung, saboi ra sabuoi-buoi no.

MAZMUR 149:2

Pakaansuk kano, ulun ru Israil, sabap ra Namangun mino; pakaansuk kano, namagun ru Sion sabap ra Raja' mino!