2 SAMUIL 23:16 - Tanou Moonsoi Timugon

¹⁶ Nokorongog ra ragu raginii, talu ngaulun saujor ondo' mauligan kaga' no nanubol ra nangkiman ru ulun ru Palistin giu' ra Bitligim. Nansagou ilo ra timug intor ra tulubong no am ibito' ra Raja' Daut. Kaa' marara' Raja' Daut manginum ra timug no, sasari' no timug no koson ra taak ra Tuhan.

2 SAMUIL 23:16 ပူးပေါင်းရင်းမြစ်များ

KASAUKAN 35:14

Intok raginio inindaguan ri Aki Kapuuno' riso, potolorogo' ri Jakub rondo' batu pangkaraan. Uasi' no ra wain am umau jaitun koson patimpokon no ri Aki Kapuuno'.

2 SAMUIL 23:9

Ulun karuo ralalom ru “Pulalai Katalu” i Iliajar anak ri Dodo, intor ra bansa' ru Agogi. Sangarawan raginio, i Iliajar am Raja' Daut nangayou ra ulun ru Palistin ondo' natitimung noyo koson mangayou. Paat raginio pulalai ru Israil liminugut noyo,

1 TUNUNG RU BANSA' ISRAIL 11:18

Pokorongog raginio talu ngaulun ra ulun tutumula' nano nanubol ra pangkiman ru ulun ru Palistin, nangalap ra timug intor ra tulubong no, am ibito' ginio ra Raja' Daut. Kaa' marara' Raja' Daut manginum ra timug no, sasari' no boo ginio koson ra taak ra Tuhan.

MAMPATANOU 4:12

Ulun ondo' misangulun matasu' maala, kaa' amon ru ruo ngaulun makaanggal ra bulunsar. Talu ngakalat ondo' pinampitol masauk ra rondo' kalat, mapagon kaga' bukaton.

SULABOI 2:19

Ruruli' no tumirong ra mosorondom, am piawo' noyo Tuhan; pabalaa' ngai' suang ru guang muno am pakimasi' no koson ra anak-anak muno, anak-anak ondo' tatanga' maitilan giu' ra moonong lisangon ru ralan.

UNTABAN 28:7

Pabayaan ra anak domba no musiti' pataakon niayuk salito wain koson taak simbalui pasasaron, ondo' pasasaron ra rasawat ru altar.

RINALATAN 20:24

Kaa' kalo mangkara' aku ra maayag aku kia kapoam kalo; ondo' karaan kuno ayuk am momongo ra kandoi ondo' pinataakan raki' ru Tuhan Jisus, ioginio mampasaboi ra Tanou Moonsoi intor ra asi' ri Aki Kapuuno'.

ROMA 5:7

Sabap ra mapagon sangulun masaga' matoi malit ra ulun ondo' mampakaatang ra ukum, kaa' mokoondo' lair sangulun makakau' matoi malit ra ulun moonsoi guang.

2 KORINTUS 5:14

Sabap ra togom ri Kristus nanguasa' ramon. Makatutun akai ra amon ru kapatayan ru sangulun koson ra alig ru ngaangai' ulun, arati' ru ginio, koson moonong ulun minatoi nabaya' riso.

PILIPI 2:17

Kaa' amon ru potoyon aku pana, am raraa' kuno masauk koson ra taak ri Aki Kapuuno', mabaya' ra pangintapatan min, maansayan aku ayuk am maansukan mababaya' ramuyun ngai'.

1 SAMUIL 19:5

Pinataak no painawo nano paat io namatoi ri Goliat, am nanaak Tuhan no ra kamanangan ondo' maayo ra Israil. Okou galama' nakatainu raginio, am naansukan kou paat ragili. Kua kia raino masaga' kou mangimbolo' ra sangulun ondo' kolondo' sala, am masaga' mamatoi ri Daut ra kolondo' sasaban?”

1 SAMUIL 7:6

Ginio ra ilo ngaangai' timinimung giu' ra Mijpa. Nansagou ilo ra timug am sinasaran ginio ra tayar ru taak ra Tuhan. Nampali ilo niayuk buoi songorou. Indagu ilo, “Makatula akai noyo ra Tuhan.” (Giu' ra Mijpa nanalasai i Samuil ra baal pansangaran ru gino ngai' ru ulun ru Israil.)