2 SAMUIL 17:11 - Tanou Moonsoi Timugon

¹¹ Sabap raginio, bilin kutu koson ragitio: Timungo' ngaangai' ulun ru Israil intor ra titikop ru pagun, saboi ra kinasuang no koson ra kinasuang ru agis giu' ra nagas. Kopongo raginio okou galama' maningganai risilo jumalai ra mampatoi.

2 SAMUIL 17:11 ပူးပေါင်းရင်းမြစ်များ

KASAUKAN 13:16

Manaak Aku rirun ra papag ondo' masuang kaga', saboi kolondo' sangulun pana makauntob risilo. Makauntob poyo ulun ra kaau ru tana' ti, makauntob io niayuk ra suang ru papag muno.

KASAUKAN 21:14

Paat ra suabon no, rondomo' anii' ri Abragam i Agar ra akanon am rondo' kantungan ru kungkung sinuangan ra timug. Paibaa' no anak no ri Agar am paugaro' no ruandu' no. Ongoi boo i Agar ra tana' kaagisan ru Birsyiba.

KASAUKAN 22:17

Barakaton Tokou ra tinangga' luluab am kasuangon Ku papag muno koson ra butitin ra limbowon am koson ra kinasuang ru agis ra nagas ru raat. Papag muno makapangala ra pantula' nilo.

2 SAMUIL 12:28

Raino, kasaga' kou no manimung ra saujor takau ra bokon, am maningganai ra pamulunsaran koson mampagaau ra bandar no. Kon boo raginio kalo boo raguon ru ulun ra aku ondo' nampagaau ra bandar no.”

2 SAMUIL 24:2

Kopongo raginio panusub Raja' Daut ri Joab, panglima mangayou nano, “Ongoi no mabaya' ra ulun-ulun tutumula' muno ra ngaangai' bansa' ru Israil giu' ra titikop pagun koson mampaugar ra panguntaban. Moogot aku makapandai ra suang nilo.”

1 RAJA'-RAJA' 20:10

intor ra Raja' Bingadad, “Raja' maino matong ra masuang kaga' saujor koson mamuso ra bandar mutu, saboi makapagibit ilo ra kaau intor ra nangaurus ru bandar ralalom ru kalindu' nilo. Nagibot ilo maa' raginio dewa-dewa mamatoi riso amon ru kalo mambaal io raginio!”

1 RAJA'-RAJA' 4:20

Mamagun ru Jiuda am Israil masuang kaga', nogondo' ra kinasuang ru agis giu' ra kiing ru raat. Maukapan ilo ra akanon am inumon, am niayuk matasu' kaayagan.

MAZMUR 9:16

Bansa'-bansa' ondo' kalo makaulig Rirun maratu' ilo ra luang ondo' kinali nilo galama'; napataan ilo ra paninigot, kaa' ilo galama' siminulung.

JOSUA 11:4

Raja'-raja' no minatong nabaya' ra pulalai ru saujor nilo, ondo' kinasuang koson ra agis giu' ra raat. Mokoondo' ilo niayuk ra masuang kuda am kurita' kuda.

TINGGANAI RU BANSA' 20:1

Ngaangai' ulun ru Israil intor ra Dan ra tampilon ralayo, saboi ra Birsyiba ra tampilon rabugus, am niayuk intor ra Giliad ra tampilon sirangon, naninong ra piau no. Timinimung ilo koson santimungan ulun ra saang ru Tuhan ra Mijpa.

1 SAMUIL 13:5

Liliwa' raginio ulun ru Palistin niayuk timinimung koson mamulunsar ra ulun ru Israil. Ulun ru Palistin mokoondo' talu ngoopor ngaribu kurita' kuda, onom ngaribu ulun nangkuda am saujor ra kinasuang ru agis giu' ra nagas. Nangkim ilo giu' ra Mikmas tampilon ra sirangon ru Bit-Awin.

1 SAMUIL 3:20

Ngaangai' boo ru ulun ru Israil intor ra titikop pagun no nangiou ra i Samuil no nabi ru Tuhan.