2 KORINTUS 5:18 - Tanou Moonsoi Timugon

¹⁸ Ngaangai' no pinasauk noyo ri Aki Kapuuno'. Ralalom ri Kristus, nangulau Io ritakau intor ra pantula' no saboi mobonsoi takau boo Riso, am nangani' Io ramon ra kandoi mopobonsoi Riso ra ulun ra bokon pana.

2 KORINTUS 5:18 ပူးပေါင်းရင်းမြစ်များ

JISAYA 52:7

Mapara' piboo bonsoi magilong ra ratangan ru ulun sinusub; mugar io mansail ra kagunungan am magibit ra tanou moonsoi, tanou pababansayan, tanou pamayagan ra tayar Sion; kono, “I Aki Kapuuno' muno Raja'!”

JISAYA 57:19

Pababansayan pataakon Ku ra ngaangai' ulun, io pana mamaar kapoam maalur! Babason Ku ulun Kuno.

DANIL 9:24

“Intulu' tulu' ngoopor ngambilor iono buoi ondo' inaru' ri Aki Kapuuno' koson mampalabus ra bansa' muno am bandar muno ondo' matulai no intor ra tula am kalaatan. Tula ampunon am katimpakan ondo' mantilayun potolorogon, maa' raginio pinaintalang am ragu inala' no totopot masauk, am maa' raginio Baloi ru Tuhan ondo' matulai patimpokon saguli'.

IMAMAT 6:30

Kaa' amon ru makararaa' ru bibiag no ondo' inumpasan ralalom ru Kim ru Tuhan pinakai boo koson upacara pangampunan ra tula, kual ru bibiag no kalo maakan; bibiag no musiti' solobon.

LUKAS 10:5

Ati ayuk pana baloi umpasan min, indagu kau ra, ‘Kaansayan sumoroi ra baloi ragitio.’

LUKAS 24:47

Am poyo, Tanou Moonsoi ti musiti' potonowon ra ngaangai' bansa' ru tana' ti, tumalimpuun intor ra Jirusalim. Maa' raginio ralalom inggalan Kuno tumalikur ilo intor ra tula nilono bagu ampunon ilo ri Aki Kapuuno'.

JUANIS 3:16

Sabap ra maayo kaga' guang ri Aki Kapuuno' ra ulun ru tana' ti, saboi nanaak Io ra Anak Langkuir Nano, maa' raginio moonong ulun ondo' mangintopot Riso kalo mapuso, kaa' mokoowot ra kaayagan mantilayun.

JUANIS 3:27

Kaa' taam i Juanis, “Kolondo' atan ayuk pana maapu ru sasangulun amon ru kalo i Aki Kapuuno' mangani'.

RINALATAN 10:36

Nakapandai kau noyo ra bala' ondo' pinasaboi ri Aki Kapuuno' ra bansa' ru Israil. Ginio noyo Tanou Moonsoi intor ra pabansayan ralalom inggalan ri Jisus Kristus, Tuhan ru ngaangai' ulun.

ROMA 11:36

Ngaangai' ondo' soroi inangun ri Aki Kapuuno'. Mampakaayag Io ra ngaangai' am ngaangai' no mangandoi Riso. Koompor noyo i Aki Kapuuno' ra sabuoi-buoi no! Amin.

ROMA 5:1

Raino itakau mobonsoi saguli' ri Aki Kapuuno' sabap ra pangintapatan takau Riso am makapabansayan noyo Riso ralalom ru Tuhan takau, i Jisus Kristus.

1 KORINTUS 1:30

Kaa' i Aki Kapuuno' noyo ondo' nampasimpung ramuyun ri Jisus Kristus. Am ralalom ri Kristus, i Aki Kapuuno' nangani' ritakau ra kapintaran Nano. Ralalom inggalan Nano niayuk, pinobonsoi am pinalabus takano ri Aki Kapuuno' masauk ra ulun Nano ondo' mangandoi ayuk Riso.

1 KORINTUS 11:12

Sabap ra kabalu' pana ruandu' kasaa' ragili inangun intor ra ungkuyon, kaa' kopongo ginio ruandu' boo maganak ra ungkuyon; i Aki Kapuuno' sotopot no mampasauk ra ngaangai' ti.

1 KORINTUS 12:6

Mokoondo' nansalinut kapandayan takau koson mangandoi ra Tuhan, kaa' ondo' mampaikang ra moonong ulun am rondo' ayuk, ioginio i Aki Kapuuno'.

1 KORINTUS 3:5

Sotopot no, osoi i Apolos no? Am osoi poyo Aku? Akai ulipon ayuk ri Aki Kapuuno', ondo' nangkimait ramuyun mangintopot ri Kristus. Akai sigagama' maya' ayuk ra ondo' pakandayin ru Tuhan.

1 KORINTUS 8:6

kaa' itakau mangintopot ra rondo' ayuk i Aki Kapuuno', i Ama' ondo' namangun ra ngaangai' no, am intor Riso itakau naayag. Am niayuk rondo' ayuk Tuhan takau, ioginio i Jisus Kristus. Ralalom inggalan Nano noyo ngaangai' no nasauk am intor Riso niayuk itakau naayag.

KOLOSI 1:22

Kaa' raino, ralalom pinatayan ru Anak Nano, i Aki Kapuuno' nopobonsoi ramuyun saguli' Riso. Ginio noyo ralan ra akau maapu No koson ra ulun ondo' mapasau guang, kolondo' kasalaan am ondo' motopot.

IBRANI 2:17

Ginio noyo sabap ra musiti' Io masauk ra ulun koson ra pabukat Nano ralalom ngaangai' baal. Maa' boo raginio nasauk Io ra Tingganai Maayo Imam ondo' makaasi' toojo ritakau am masalok gumagaya' ra susuban ri Aki Kapuuno'. Intor ra kandoi Nano raginio tula ru ulun ampunon boo ri Aki Kapuuno'.

JAKUBUS 1:17

Ngaangai' taak ra moonsoi am kolondo' sala, intor noyo ra suruga'; ioginio intor ri Aki Kapuuno' ondo' nampasauk ra ngaangai' sinda ru limbowon. Io ti kalo noyo makulau koson ra babara' ondo' kalo rumoro'.

1 JUANIS 2:2

I Jisus galama' pabansayan ra tula takau. Sala' ka tula takau ayuk, kaa' tula ru ngaangai' ulun.

1 JUANIS 4:10

Gitio noyo togom: sala' ka itakau nonogom ri Aki Kapuuno', kaa' i Aki Kapuuno' nonogom ritakau. Am nanusub Io ra Anak Nano sumauk ra pabansayan ru tula takau.