1 TISALONIKA 2:13 - Tanou Moonsoi Timugon

¹³ Gitio rondo' poyo sasaban ra akai masalok maringkuanang ri Aki Kapuuno', ra nangkirongog am nangapu kau po ra tanou intor ri Aki Kapuuno' ondo' pinasaboi maili. Nangapu kau ra tanou no sala' ka koson ra tanou intor ra ulun, kaa' koson ra totopot i Aki Kapuuno' noyo intor ru tanou no. Am Io po nampasauk ramuyun nangintopot ri Kristus.

1 TISALONIKA 2:13 ပူးပေါင်းရင်းမြစ်များ

JIRIMIA 44:16

“Marara' akai mangkirongog ra ragu ondo' raguon muno ra ralalom inggalan ru Tuhan.

AGAI 1:12

Kopongo raginio i Jirubabil am i Josua am niayuk ngaangai' ulun ru Israil ondo' siminaguli' noyo intor ra namatiran giu' ra Babilonia, giminagaya' ra ragu-ragu ri Nabi Agai, ulun sinusub ru Tuhan no. Nambaal ilo ra atan ondo' sinusub ru Tuhan risilo, sabap ra malaa' ilo ra Tuhan.

MATIUS 10:20

Sabap ra ragu ondo' raguon mino sala' ka intor ra guang mino galama', kaa' io no matong intor ra Ambiluo ri Aki Kapuuno', ondo' sabiton ra Ama' min. Io noyo mangindangan ramuyun.

MATIUS 10:40

“Osoi ayuk ondo' mangapu ramuyun, Aku niayuk apuon no, am osoi ayuk ondo' mangapu Raki', Io ondo' nanusub Raki' ti noyo ondo' apuon nano.

LUKAS 11:28

Kaa' taam i Jisus, “Sotopot no, pakaansuk noyo ilo ondo' mangkirongog ra ragu ri Aki Kapuuno' am gumagaya'!”

LUKAS 5:1

Paat ra rondo' orou, nangintairoi i Jisus ra nagas ru tasik Ginisarit. Masuang ulun liminimpu Riso koson mangkirongog ra Bala' intor ri Aki Kapuuno'.

LUKAS 8:11

“Gitio noyo arati' ru abig no: Sampug no am bala' intor ri Aki Kapuuno'.

LUKAS 8:21

Kaa' indagu i Jisus risilo, “Ulun ondo' sumugut ra bala' ri Aki Kapuuno' am gumagaya', ilo no ina' am pabukat-pabukat Kuno.”

JUANIS 15:3

Kinapasau kano ru pangilaan ondo' pinasaboi Kuno ramuyun.

JUANIS 17:17

Sauko' ilo no ra Ulun Muno ralalom ru katapatan Muno; bala' Mu noyo katapatan.

JUANIS 17:19

Taakin Ku kaayagan Kutu Rirun, maa' raginio totopot mampataak ilo ra kaayagan nilo mangandoi ayuk Rirun.

RINALATAN 10:33

Ginio sabap ra nampiau aku rirun ra mataki' am naringkuanang akai ra minatong kou ragiti. Raino tumimung akai ra saang ri Aki Kapuuno' koson mangkirongog ra atan ayuk panusuban nano koson pabalaan muno ramon.”

RINALATAN 13:48

Pakaining ayuk ulun sala' ka Jaudi ragu raginio, naansukan ilo toojo saboi mongongompor ilo ra bala' intor ra Tuhan i. Ulun ondo' inaru' noyo ri Aki Kapuuno' koson mokoowot ra kaayagan motopot am mantilayun, nangintopot ilo ri Jisus niayuk.

RINALATAN 16:14

Sangulun intor risilo i, i Lidia, ondo' mantatalan ra konoon matanggilung. Io no intor ra Tiatira am nangintopot ri Aki Kapuuno'. Ginio ra ukabo' ri Aki Kapuuno' guang nano koson nangapu ra pangilaan ri Paulus.

RINALATAN 17:11

Giu' ra Biria, ulun ru Jaudi moonsoi guang intor ra ulun ru Jaudi giu' ra Tisalonika. Naansayan ilo mangkirongog ra tanou intor ri Jisus. Moonong orou mambasa' ilo ra Buuk Kitab koson magilong ra motopot kia pangilaan ri Paulus ti.

RINALATAN 17:32

Paat ra ilo nakaining ri Paulus minindagu ra ulun matoi maayag saguli' intor ra kapatayan, kuriti' io boo ru kukula' ngaulun. Kaa' mokoondo' niayuk minindagu ra, “Masaga' akai mangkirongog poyo raginio.”

RINALATAN 2:41

Masuang ulun nangintopot ra rinagu ri Pitrus, am ilo pana riniu'. Suang ru ulun nangintopot ri Kristus paat ra orou raginio riminuang poyo ra talu ngaribu ngaulun.

RINALATAN 8:14

Kaining boo rasul-rasul ru Jirusalim ra ulun Samaria nangapu ra Tanou Moonsoi, susubo' nilo boo i Pitrus am i Juanis minongoi ra giu' i.

ROMA 10:17

Ginio ra mansail ra pangkirangagan nilo ra tanou no mangintopot ilo, am morongog nilo tanou no sabap ra mokoondo' mambala' risilo ra tanou intor ri Kristus.

2 KORINTUS 3:18

Raino bulos takau ngai' kalo nasilian am mapatampulau takau boo ra sinda ru katulayan ru Tuhan. Sinda ru katulayan raginio niayuk ondo' mangulau ritakau masauk nogondo' Riso, koson buoi-kabuoi gumaai sinda ru katulayan takau. Ngaangai' ti intor noyo ra Ambiluo ru Tuhan.

GALATIA 4:14

Kabalu' pana maruol kuli rondo' pangkinaman toojo ra pangkaraan min, kalo nagasab kapoam nanginggalar kau raki'. Kaa' inuma' min aku koson akau manguma' ra malaikat ri Aki Kapuuno'. Inapu min aku koson akau mangapu ri Kristus Jisus.

KOLOSI 1:6

Tanou Moonsoi ti nagibit ra barakat am nakatabual ra ati ayuk intok ra tana' ti, koson niayuk ra tatanga' min. Kataawan poyo ri Aki Kapuuno', ondo' naining min ra kasaa' i, maintutunan min ra atan ginio sotopot no.

IBRANI 4:12

Bala' ri Aki Kapuuno' makakuasa' am maayag koson Riso. Mogondo' ra ilang ondo' inasa' ruo larom manguntas saboi bungul am utok nano suayon, koson niayuk ra bala' ri Aki Kapuuno' tumunsok ra salibuor am ambiluo saboi mampatalang ra kasagaan am pamaguangan ru ulun.

IBRANI 4:2

Sabap ra Tanou Moonsoi no pinabala' noyo ritakau mogondo' ra ulun ra galing i. Kaa' koson risilo, tanou no kolondo' onong, sabap ra paat ra ilo nakaining kalo inapu nilo mabaya' ra pangintapatan.

JAKUBUS 1:18

Sumugut ra kasagaan Nano galama', itakau pinakaanak No mansail ra bala' Nano ra motopot ondo' pinasaboi ritakau. Ginio sabap ra nangani' Io poyo ritakau ra intok kasaa' intor ra ngaangai' sinauk Nano.

1 PITRUS 1:23

Sabap ra mansail ra bala' ri Aki Kapuuno' ondo' maayag am mantilayun, akau sinauk ra ulun nakabagu ondo' sala' ka sayat ru ulun, kaa' sotopot no sayat kau ri Ama' ondo' mantilayun.

1 PITRUS 1:25

kaa' bala' ru Tuhan kalo makulau am mantilayun.” Bala' ragitio noyo Tanou Moonsoi ondo' pinasaboi mai ramuyun.

1 PITRUS 2:2

Mogondo' ra sangulun lalagang ondo' kakaanak ra masalok maguyum ayuk ra gatas, akau pana musiti' masalok maguyum ayuk ondo' mampaikang ra pangintapatan min. Maa' raginio mapiot pangintapatan min am bayagon kau.

1 JUANIS 3:3

Moonong ulun ondo' malansan ri Kristus, magalung io ra kapasawan ru kaayagan nano mogondo' koson ri Kristus mapasau.