1 TIMOTIUS 6:20 - Tanou Moonsoi Timugon

²⁰ Timotius, rayuso' poyo kandoi ondo' pinalansan noyo rirun. Inggaluri' noyo pantataaman ra kolondo' onong am ondo' magasab ri Aki Kapuuno', pagagansangan ondo' piawon rokoon “Kapandayan”, kaa' sotopot no kalo.

1 TIMOTIUS 6:20 ပူးပေါင်းရင်းမြစ်များ

RINALATAN 16:1

Minongoi i Paulus ra Dirbi am Listra. Giu' ra Listra mokoondo' sangulun Kristian, inggalan nali i Timotius. Ina' nano ulun ru Jaudi, ondo' niayuk sangulun Kristian kaa' ama' nano ulun ru Junani.

RINALATAN 17:18

Mokoondo' mangingila' ra pangilaan ru Ipikuros am Stoikos nakimantaam riso, konilo, “Atan nua' raguon ru naupa' ti?” Kaa' bokon i poyo minindagu, “Mampatanou io po lair intor ra dewa ru ulun bansa' ru bokon.” Rinagu nilo ginio sabap ra nambala' i Paulus ra i Jisus ti naayag saguli' intor ra kapatayan.

RINALATAN 17:21

Sabap ra kaindalaman ru ngaangai' mamagun ra Atina am ulun bansa' ru bokon ondo' minayan ra giu' i, koson magail ayuk makimansusunur kapoam mangkirongog ra pangilaan nakabagu.)

ROMA 1:22

Indos nilo mapintar ilo, kaa' sotopot no sasambungon ilo.

ROMA 3:2

Maaru' masuang onong! Intor poyo ra talimpuun i, ulun ru Jaudi noyo napalansanan ri Aki Kapuuno' ra ragu Nano.

1 KORINTUS 2:6

Kabalu' pana koson raginio, koson ra ulun ondo' nakaintutun noyo toojo ra kaayagan Kristian, motopot mindagu aku risilo ra kapintaran. Kaa' kapintaran ti sala' ka intor ra tana' ti kapoam intor ra mangunguasa' ondo' mamarinta ra tana' ti, sabap ra pamarintaan koson raginio mapuso.

1 KORINTUS 3:19

Sabap ra ondo' karaan ru ulun ru tana' ti ra mapintar, karaan ri Aki Kapuuno' ra sasambungon. Sabap ra mokoondo' tinulisan ra Buuk Kitab, “Linandak ri Aki Kapuuno' ulun mangapintar ra kapintaran nilo galama'.”

KOLOSI 2:18

Ginio nai ra pai' polosoo' ra akau ruungon ru ulun ondo' migiangku minggana' guang, am ondo' sumamba ra malaikat. Ulun koson raginio masumbung sabap ra rokoon nilo masuang baal ru suruga' pinakito risilo, kaa' pangkaraan ragitio sumugut ayuk ra paliso malaat nilo galama'.

KOLOSI 2:8

Ginio nga ra ilalai' min, maa' raginio kolondo' sangulun pana mamparuung ramuyun ra pangilaan ru ulun ondo' abau no ayuk am kolondo' onong, sabap ra mampakalayau ayuk ginio. Sala' ka i Jisus Kristus intor ru gitio, kaa' binaal ayuk ru ulun kapoam rondo' pangilaan ru kaulayan ayuk.

2 TISALONIKA 1:4

Ginio ra akai galama' maansukan mantunung ra pasimpungan ulun Kristian no ra ati kulaan kinaikang ru pangintapatan mino ri Kristus paat ra maimbolo' am mapagon ondo' malimanan min.

2 TISALONIKA 2:15

Ginio sabap ra, pabukat kau ngai', pirot kano pangintopot am suguto' noyo pangilaan maili ramuyun, iou pana ondo' rinagu kapoam tinulisan mai ra surat.

1 TIMOTIUS 1:11

ioginio ondo' gumagaya' Tanou Moonsoi intor ri Aki Kapuuno' ondo' matulai am omporon. Tanou ragitio noyo ondo' patanawin raki'.

1 TIMOTIUS 1:2

Timotius, pinakaanak tokou sabap ra pangintapatan muno ri Kristus. Gama' ru i Aki Kapuuno', Ama' takau, am i Jisus Kristus, Tuhan takau manaak rirun ra barakat, asi' am pabansayan.

1 TIMOTIUS 1:4

Balai' ilo ra kalo babaya' ra tutunungon kapoam intaran ru tuu'-lair ondo' kolondo' pupupus no. Ngaangai' ragitio mangkinibit ayuk ra pansasangaran am kalo mampaintutun ritakau ra inatang ri Aki Kapuuno' ondo' mauligan mimpuun ra pangintapatan takau ayuk.

1 TIMOTIUS 1:6

Kaa' mokoondo' kukula' ngaulun timinalikur intor ra baal raginio am nakalayau ilo boo ralalom pansusunuran ra kolondo' ampos i.

1 TIMOTIUS 1:9

Karaa' takau boo ra ukum ti pai' ru pinataak koson mampatanda' ra ulun moonsoi, kaa' ulun mangalaat ondo' manggal ra ukum, ioginio ondo' makatula, ondo' tumalikur am kalo mangurumat ri Aki Kapuuno', am poyo ulun ondo' mamatoi ra matuo nilai, kapoam mamamatoi ra bokon.

1 TIMOTIUS 4:7

Kaa' inggaluri' noyo tutunungon ondo' binaal-baal ayuk ra kolondo' onong no. Igigila' no ra kaayagan ondo' kasagaan ri Aki Kapuuno'.

1 TIMOTIUS 6:11

Kaa' okou ulun noyo ri Aki Kapuuno', ginio nai ra inggaluri' noyo ngaangai' baal malaat raginio. Singkotog no sumauk ra ulun motopot, matanda', makapangintapatan, motogom, tumaan guang am molomoi.

1 TIMOTIUS 6:14

suguto' noyo toojo ngaangai' panusuban ragitio mabaya' ra guang mapasau koson kolondo' makapanguu' rirun, suku' ra Orou ratangan ru Tuhan takau i Jisus Kristus.

2 TIMOTIUS 2:1

Timotius ondo' tagamin kuno, mikang kou toojo ra kataawan ondo' moowot takau sabap ra pasimpungan takau ri Jisus Kristus.

2 TIMOTIUS 2:16

Inggaluri' noyo pantaaman ra kolondo' onong no am ondo' magasab ri Aki Kapuuno'. Raragu koson ragitio mampainggalur ayuk risilo intor ri Aki Kapuuno'.

TITUS 1:14

Am kalo boo makaaya' ilo ra pangilaan ru ugama Jaudi kapoam tutunungon ondo' binaal ayuk ru ulun ondo' timinalikur intor ra pangilaan motopot.

TITUS 1:4

Titus, pinakaanak tokou niayuk sabap ra mogondo' ayuk pangintapatan tati. Gama' ru i Aki Kapuuno', Ama' takau am i Jisus Kristus, Mamamayag takau, manaak rirun ra barakat am pabansayan Nano.

TITUS 1:9

Io ti poyo musiti' mangintopot toojo ra bala' ondo' malansanan am ondo' naila' noyo riso. Maa' raginio makapangikang io ra guang ru ulun bokon-bokon no mimaya' ra pangilaan motopot am poyo makapampainono' ra kasalaan ru ulun-ulun ondo' manggal no.

TITUS 3:9

Kaa' inggaluri' noyo pantataaman ra kolondo' onong, tutunungon ondo' binaal-baal ayuk ru ulun, pangayawan am pansasangaran intor ra Ukum ri Musa. Sabap raginio ngai' kolondo' onong kapoam ampos no.

PINAINTALANG 3:3

Karaa' atan ondo' inila' ra galing i ramuyun am atan ondo' rinongog min. Gagayaa' noyo gitio am talikur no intor ra tula mino. Amon ru kalo kumarat kau, matong Aku ramuyun koson ra mantatakou no am kalo mapandayan min sanggilan ratangan Kuno.