1 TIMOTIUS 6:18 - Tanou Moonsoi Timugon

¹⁸ Pinsono' ilo poyo mambaal ra moonsoi, koson maluoi mangani' ra indangan am maansayan mantayar ra ulun ra bokon.

1 TIMOTIUS 6:18 ပူးပေါင်းရင်းမြစ်များ

2 TUNUNG RU BANSA' ISRAIL 24:16

Linobong io giu' ra kalabangan ru raja' giu' ra Bandar Daut, koson mangkara' ra binaal moonsoi nano ri Aki Kapuuno', Baloi ru Tuhan am ulun ru Israil.

MAZMUR 112:9

Pataakon no rapu' nano ra ulun musikin, masalok io mataau, manguasa' io am urumaton ru ulun.

MAZMUR 37:3

Pangintopot no ra Tuhan am pambaal kano ra ondo' moonsoi; ayan no ra pagun ragitio am akau pana maayag.

MAMPATANOU 11:6

Patiaso' noyo sampug tampilon ra susuab ti am niayuk ra mai' no, sabap kalo makapandai takau ru ngaangai' no tumuu', kapoam ati rondo' tias tumuu' ra malabung poyo.

MAMPATANOU 3:12

Ginio ra, nakaliman aku boo ra ondo' moonsoi baalon takau iono masalok maansukan am mirot toojo paat ra itakau lakat poyo maayag.

JISAYA 32:8

Kaa' ulun mabanis guang mangatang ra baal ondo' matimpok, am mamatas ralalom katimpakan.

JISAYA 58:7

Pataako' noyo akanon muno ra ulun naitilan, apuo' noyo ulun-ulun musikin ondo' kolondo' ayanan ra baloi muno. Ulun nagibaang anii' ra saluar am bayang, am pai' inggio' pabukat muno ondo' maaya' indanganon.

MATIUS 5:42

Amon ru mokoondo' sangulun makitaak ra atan ayuk pana intor ramuyun, anii' io no. Amon ru mokoondo' sangulun magira' ra atan ayuk intor ramuyun, pairaa' io no.”

LUKAS 12:21

Pupusi' boo ri Jisus, “Gitio noyo pinambalos ra ulun ondo' lumuntuk ayuk manimung ra kuliamos, kaa' sotopot no musikin io ra pagilangan ri Aki Kapuuno'.”

LUKAS 3:11

Taam i Juanis, “Osoi ayuk makabayang ruo, taaki' rondo' ra ulun kolondo' bayang! Osoi ayuk mokoondo' ra akanon, tayaro' akanon no!”

RINALATAN 10:38

Nakapandai kau poyo ra i Aki Kapuuno' nampili' noyo ri Jisus, ulun Nasarit i, am inanian No ra Ambiluo ri Aki Kapuuno' am niayuk kuasa'. Minongoi Io ra ati ayuk intok koson mambaal ra moonsoi am mamabas ra ulun masuang ondo' kinuasa' ru Tingganai ru riwato, sabap ra mabaya' i Aki Kapuuno' ri Jisus.

RINALATAN 11:29

Ginio ra ngaangai' maamaya' ri Jisus ra giu' i nangiou koson mangindangan ra ulun Kristian ra Judia; nangani' ilo maya' ra kamaanan ru sasangulun.

RINALATAN 9:36

Giu' ra Jopi mokoondo' poyo sangulun ruandu' makainggalan ri Tabita. Nangintopot io ri Jisus. (Inggalan nano ralalom ragu ru Junani am i Dorkas ondo' makaarati' “Tambang”.) Masalok moonsoi baalon nano am mangindangan io niayuk ra ulun musikin.

ROMA 12:13

Pangani' kano ra rapu' mino ra ulun Kristian ondo' musikin, am pai' kano karara' tambuluyon ru pabukat ra Kristian ondo' kalo nauligan min.

ROMA 12:8

Osoi ondo' inanian ra kapandayan mampaikang ra guang ru ulun, papiroto' noyo. Osoi ondo' inanian ra guang mangani' ra rapu' no ra bokon, pangani' no maya' ra kataawan. Osoi ondo' inanian ra kapandayan maningganai, paningganai no toojo. Osoi ondo' inanian ra guang makaasi' ra ulun bokon, pakaasi' no mabaya' ra maansukan.

1 KORINTUS 16:2

Koson ragitio: moonong orou Minggu', akau ngaangai' musiti' manimung ra ruit sumugut ra maalap ru sigagama'. Timungo' min kalalair ruit no saboi ra aku makaratong, maa' raginio, kalo pana timungon ra aku makasuku'.

2 KORINTUS 8:12

Amon maayo guang min mangani', apuon ri Aki Kapuuno' taak mino maya' ra atan ondo' mataakan min, sala' ka maya' ra ondo' kalo mataakan min.

2 KORINTUS 8:9

Makapandai kano toojo ra kataawan ru Tuhan takau i Jisus Kristus. Kabalu' pana langkaya' Io, kaa' koson ra kaatangan min, siminauk Io ra musikin, maa' raginio mansail ra kinamusikin nano lumangkaya' kau ra pagilangan ri Aki Kapuuno'.

GALATIA 6:10

Intor raginio, buoi ra itakau makakaluagan, alapo' takau noyo ginio koson mobobonsoi ra moonong ulun, mulu' poyo risilo ondo' makimambukat takau mulu' poyo ra mogondo' pangintapatan.

IPISUS 4:28

Osoi ayuk mantatakou, moonsoi langgain no am mangandoi koson maginakan io galama' am niayuk makapangindangan boo ra ulun musikin.

1 TIMOTIUS 5:10

am kauligan mambaal ra moonsoi koson; matanda' nampasukor ra anak nano, mataau mangapu ra tambului, maluoi mangindangan ra ulun Kristian suku' ra kandoi kalo maatang, mangindangan ra ulun makakapaganan am mapirot io mambaal ra atan ayuk kandoi moonsoi.

TITUS 2:14

Pinataak No painawo Nano, maa' raginio makapamayag Io ritakau am mampainggalur ritakau intor ra nansalinut kalaatan am makapagibit ritakau masauk ra ulun Nano ondo' mirot poyo mambaal ra kandoi moonsoi.

TITUS 3:8

Motopot ragu raginii. Masaga' aku ra mampakaatang kou toojo ra kaintutunan raginio, maa' raginio ilo ondo' mangintopot ri Aki Kapuuno' makapambaal ra kandoi moonsoi. Ngaangai' ti moonsoi toojo am mokoonong ra ngaangai' ulun.

IBRANI 13:16

Pai' kano pakalilian mambaal ra moonsoi am mangindangan ra rondo' am bokon, sabap raginio noyo koson ra taak simbalui ondo' mapabansuk ra guang ri Aki Kapuuno'.

JAKUBUS 2:5

Pabukat kau ngai' ondo' tagamin ku, karaa' min gitio! Ulun musikin giti ra tana' ti, pinili' noyo ri Aki Kapuuno' sumauk ra langkaya' ru pangintapatan. Makaliman ilo ra pamarintaan ri Aki Kapuuno', sumugut ra atan ondo' binantu' Nali ra ulun ondo' motogom Riso.

1 PITRUS 3:11

Moonsoi ru inggalurin no kalaatan am mambaal ayuk ra moonsoi; am poyo gumogot toojo paguyum ra pabansayan, suku' moowot no.

1 JUANIS 3:17

Amon ru sangulun langkaya' makakito ra pabukat musikin nano, kaa' maagat guang nano mangindangan, ati kulaan motogom io rokoon ri Aki Kapuuno'?

3 JUANIS 1:11

Pabukat ondo' tagamin kuno! Pai' tiluo' paliso ra malaat, kaa' tiluo' ondo' matanda' no. Ulun ondo' mambaal ra matanda', io anak ri Aki Kapuuno'. Ulun ondo' mambaal ra malaat, io no kalo poyo nakaulig ri Aki Kapuuno'.