1 SAMUIL 17:46 - Tanou Moonsoi Timugon

⁴⁶ Orou raiti' niayuk Tuhan no mapataak rirun ra ralalom ru kalindu' kutu. Kalaan tokou am manginggulu' ra ulu muno. Pataakin ku inan ru saujor Palistin ra susuit am bibiag maa' raginio akanon. Kon raginio noyo ra titikop ru tana' ti makapandai ra akai, bansa' ru Israil ti mokoondo' ri Aki Kapuuno'.

1 SAMUIL 17:46 ပူးပေါင်းရင်းမြစ်များ

KASAUKAN 40:19

Ralalom kataluan ti palabuson kou ru raja' – am ingguluin no ulu muno! Mopongo raginio pilikon baangkai muno ra rondo' lugu' am ongoyon boo tinduko' kual muno ru susuit-susuit.”

2 SAMUIL 18:28

Golok i Agimaas koson manabi' ra raja', am igulatur am indagu, “Koompor noyo Tuhan, i Aki Kapuuno' muno. Nangani' io noyo rirun ra kamanangan ra ulun ondo' giminuor rirun!”

2 SAMUIL 21:10

Kopongo raginio i Rijpa, ruandu' parulug ru Raja' Saul, napaapin ra konoon karung ra io galama' giu' ra rasawat ru batu intok ru baangkai-baangkai no nakabanta'. Minayan io ra giu' no intor ra talimpuun ru bulintok mangkumos saboi ra rasam riminatu' ra bulintok ru tumutu' raun. Paat ra matawang mangunjau io ra susuit intor ra morop ra baangkai, am paat ra rondom, manindung io ra baangkai no intor ra bibiag masigo.

1 RAJA'-RAJA' 8:43

rongogo' noyo pakiasian nano. Rongogo' noyo io intor ra intok inayanan Muno giu' ra suruga', am iowo' noyo kitaakon nano maa' raginio ngaangai' bansa' ra tana' ti makaulig Rirun am gumagaya' Rirun, koson ra ulun Muno Israil. Makapandai ilo boo ra Baloi ondo' binaal kutu iono intok sumambayang Rirun.

1 RAJA'-RAJA' 8:60

Koon raginio ra ngaangai' bansa' ra tana' ti makapandai ra Tuhan ayuk i Aki Kapuuno', am kolondo' bokon.

2 RAJA'-RAJA' 19:19

Ginio ra bayago' akai intor ra ulun ru Asyur, iou Tuhan, i Aki Kapuuno' mai maa' raginio ngaangai' bansa' ra tana' ti makapandai ra Okou, Tuhan rorondo' ayuk i Aki Kapuuno'.”

2 RAJA'-RAJA' 5:15

I Naaman nabaya' ra ngaangai' ru namaya' riso no siminaguli' ri Ilisa. Kon ri Naaman, “Raino nakapandai aku ra rondo' ayuk i Aki Kapuuno' ra titikop ru tana' ti, iono i Aki Kapuuno' ru Israil. Kasaga' no mangapu ra taak kutu.”

MAZMUR 31:8

Maansukan am magitapap aku ra longon, sabap ra Okou noyo monogom raki'. Makito Mu imbolo' kuno; am mapandayan Mu kapaganan kuno.

MAZMUR 46:10

Pinolonggo' No pangayawan ra titikop ru tana' ti; pinandak No tanggayan ru panah, tanggulan am gagampin sinolob.

KAINGKUALAN 9:16

Kaa' polosoon Tokou maayag koson mapakito rirun ra kuasa' Kuno, maa' raginio inggalan Kuno mauligan toojo ra titikop ru tana' ti.

JISAYA 37:20

Ginio ra, bayago' akai intor ra ulun ru Asyur, iou Tuhan i Aki Kapuuno' mai, maa' raginio ngaangai' bansa' ru tana' ti makapandai ra Okou noyo rondo'-rondo' ayuk Tuhan.”

JISAYA 52:10

Tuhan mapakito ra kuasa' Nano ra saang ru mato ru nansalinut bansa'. Titikop ru tana' pana makainono' ra pamayagan intor ri Aki Kapuuno' takau.

JISAYA 56:9

Nanusub Tuhan ra bansa'-bansa' suai matong koson ra bibiag masigo ondo' mansaam ra ulun Nano.

JIRIMIA 19:7

Intok ragitio sulangon Ku ngaangai' inatangan ru ulun ru Jiuda am mamagun ru Jirusalim. Polosoon Ku ilo kalaan ru pantula' am potoyon ralalom ru pangayawan. Polosoon Ku baangkai nilo akanon ru susuit am bibiag masigo.

JIRIMIA 34:20

Pataakon Ku ilo ra pantula' ondo' masaga' mamatoi risilo. Baangkai nilo akanon ru susuit am bibiag masigo.

DANIL 2:47

Kon ru raja', “Sotopot no i Aki Kapuuno' muno matulai ra gino ngai' ru dewa; Io no Tuhan ru ngaangai' raja', am nanulu' Io ra ngaangai' ondo' nakasibuni. Nakapandai aku ra baal raginio sabap ra makapambala' kou ra sinail ondo' nakasibuni no.”

DANIL 3:29

“Raino rongogo' raguon kutu: Osoi ayuk intor ra bansa', bansa' boborok kapoam ragu ra atan ayuk ondo' magasab ri Aki Kapuuno' ri Sadrak, Misak am niayuk i Abidnigo, puputulon, am baloi nano gabaan am saukon ra tuntur ru nalunsai. Kolondo' dewa ondo' makapambaal ra ondo' binaal ri Aki Kapuuno' nilo.”

MATIUS 24:28

“Ati mokoondo' ra baangkai, ginio timungan ru susuit mangakan ra baangkai no.”

SAGULION 28:26

Paat ra akau matoi, susuit am bibiag masigo matong am mangakan ra baangkai min. Kolondo' sangulun pana mangunjau ra susuit am bibiag raginio.

SAGULION 7:2

Paat Tuhan i Aki Kapuuno' min napataak ra bansa'-bansa' ragitio ramuyun am kalaan min ilo, akau musiti' mamatoi risilo ngaangai'. Pai' pakimabantu' risilo, am pai' pakaasi' risilo.

SAGULION 7:23

Pataakon ru Tuhan ramuyun pantula', am mangkinibit Io risilo magalabo saboi pusoon ilo.

JOSUA 10:8

Indagu Tuhan ri Josua, “Pai' kalaa' risilo. Nanaak Aku noyo rirun ra kamanangan. Kolondo' sangulun pana intor risilo makaanggal rirun.”

JOSUA 4:24

Ra sauk raginio, ngaangai' ulun ru tana' makapandai ra mapara' gayo ru kuasa' ru Tuhan. Ginio ra mangurumat kau ra Tuhan i Aki Kapuuno' min ra sabuoi-buoi no.”

1 SAMUIL 14:6

Kon ri Jonatan ra buayoi no, “Ibok ongoi to ra pangkiman ru ulun ru Palistin ondo' kalo nakaulig ri Aki Kapuuno'. Maaru' lair ru mangindangan Tuhan no rito, sabap ra makapangani' Io ra kamanangan, iou ra masuang ulun kapoam ra sanganu ulun.”

1 SAMUIL 17:44

Indagu io poyo koson manggal ri Daut, “Ibok, pataakin ku inan muno ra susuit kapoam bibiag maa' raginio akanon!”