1 PITRUS 2:5 - Tanou Moonsoi Timugon

⁵ Akau pana mogondo' ra batu naayag. Ginio ra polosoo' noyo kaayagan min alapon ru Ambiluo ri Aki Kapuuno' mambaal ra Baloi Tuhan. Bagu masauk kau koson ra imam Nano ondo' mapasau, am sabap ri Jisus Kristus makapangani' kau ri Aki Kapuuno' ra taak ondo' iowon Nano, maya' ra indangan ru Ambiluo Nano.

1 PITRUS 2:5 ပူးပေါင်းရင်းမြစ်များ

1 RAJA'-RAJA' 7:11

Rasawat ru batu-batu maatang no, inanian ra batu-batu ra bokon ondo' mologo, ondo' binonsoi ra pahat sumugut ra tutuku', am sinilian ra tataun sidar.

MAZMUR 141:2

Apuo' noyo pakiasian kutu koson ra rondo' taak ra kaminyan, am apuo' noyo kalindu' ra patunuyon kutu koson ra taak ra rondom.

MAZMUR 50:14

Pataako' min noyo ragu paringkuanangan koson ra taak simbalui ri Aki Kapuuno', pataako' min noyo ngaangai' taak ra binantu' min Riso Ondo' Maayo Kaga' Kuasa'.

MAZMUR 50:23

Ulun ondo' mapataak ra ragu paringkuanangan koson ra taak simbalui no koson mangurumat Raki', am ulun ondo' gumagaya' Raki' no bayagon Kuno.”

KAINGKUALAN 19:6

Masauk kau ra ulun ondo' patimpokon Raki' galama', am mangandoi kau ayuk Raki' koson ra imam.”

AMSAL 9:1

Mapintar mambaal ra baloi nano, mapatansok tulu' ngantaun lugu' ru baloi no.

JISAYA 61:6

Piawon kau koson ra imam-imam ru Tuhan, koson ra ulipon ri Aki Kapuuno' takau. Makasia' kau ra kinalangkayaan ru bansa'-bansa', am mamanggo makaalap ra kinalangkayaan no.

JISAYA 66:21

Santayaran risilo no pasaukon Ku ra imam am ulun ru Liwi.

GOSIA 14:2

Saguli' no ra Tuhan, i Aki Kapuuno' min, ulun ru Israil kau. Tula min nangkinibit ramuyun nakasunsuyar am naratu'.

MALIAKI 1:11

Urumaton Aku ru bansa'-bansa' ra titikop ru tana' ti. Solobon nilo kaminyan giu' ra ngaangai' intok koson mangurumat Raki', am mampataak ilo ra taak simbalui ondo' maaya' pataakon. Ilo ngaangai' mangurumat Raki'!

ROMA 12:1

Pabukat kau ngaangai', sabap ra i Aki Kapuuno' makaasi' ritakau kitaakon takamin tojojo: Patimpoko' noyo kaayagan mino ri Aki Kapuuno' ayuk koson ra rondo' taak ondo' maayag, am ginio noyo mapabansuk Riso. Ginio noyo bayaan ra matanda' sumamba ri Aki Kapuuno'.

ROMA 15:16

Pinili' No aku masauk ra ulipon ri Kristus Jisus koson mangindangan ra ulun sala' ka Jaudi. Mampaugar aku ra kandoi koson sangulun imam ondo' mampabala' ra Tanou Moonsoi intor ri Aki Kapuuno'. Maa' raginio, ulun sala' ka Jaudi patimpokon ri Aki Kapuuno' ru Ambiluo Nano koson rondo' taak ondo' mapabansuk Riso.

1 KORINTUS 3:16

Kalo kia nakapandai kau ra akau koson ra baloi ri Aki Kapuuno' am Ambiluo Nano sumimpung ramuyun.

1 KORINTUS 3:9

Akai masisinggau' mangandoi ri Aki Kapuuno'; am akau koson ra umo Nano. Koson ra tinambalayan kau niayuk ri Aki Kapuuno'.

1 KORINTUS 6:19

Musiti' makapandai kau ra inan mino noyo ayanan ru Ambiluo ri Aki Kapuuno', ondo' tinaakan Nano koson paayanon ra guang min. Ginio ra inan mino sala' ka akau galama' tatangan, kaa' i Aki Kapuuno'.

2 KORINTUS 6:16

Mokoondo' kia sinungkalalaing sambaan ra Baloi Tuhan? Maaru' kolondo'! Itakau ti noyo Baloi Tuhan, ioginio i Aki Kapuuno' ondo' maayag. Sabap ra i Aki Kapuuno' galama' minindagu, “Rumondon Aku risilo am luminjau Aku ra tatanga' nilo. Masauk Aku ra Tuhan nilo, am masauk ilo noyo ra ulun Kuno.

GALATIA 6:10

Intor raginio, buoi ra itakau makakaluagan, alapo' takau noyo ginio koson mobobonsoi ra moonong ulun, mulu' poyo risilo ondo' makimambukat takau mulu' poyo ra mogondo' pangintapatan.

SAGULION 18:2

Ondo' apuon nilono iono tungkuson nilo, koson ondo' binantu' noyo ru Tuhan. Ginio sabap ra kalo makaalap ilo ra tana' koson ra bansa'-bansa' ra bokon no.

PILIPI 1:11

Intor raginio, kaayagan mino mauli' ra baal topot-topot moonsoi ondo' kondoyon ri Jisus Kristus, am bagu raginio katulayon am omporon boo i Aki Kapuuno'.

PILIPI 2:17

Kaa' amon ru potoyon aku pana, am raraa' kuno masauk koson ra taak ri Aki Kapuuno', mabaya' ra pangintapatan min, maansayan aku ayuk am maansukan mababaya' ramuyun ngai'.

PILIPI 4:18

Am raino suang ru pinataak min raki' i, mauli' poyo toojo intor ra kaukapan kuno. Am ngaangai' no pinasuku' noyo raki' ri Ipaproditus. Ondo' pinataak mino raginio, mogondo' ra taak maamis owou, am koson ayuk ra taak simbalui pataakon ri Aki Kapuuno' ondo' mampakatasu' ra guang Nano.

KOLOSI 3:17

Ngaangai' ondo' baalon am raguon min sauko' no ralalom inggalan ru Tuhan Jisus ayuk. Paringkuanang kano ri Aki Kapuuno', Ama' takau ra atan ondo' binaal ri Jisus Kristus ramuyun.

1 TIMOTIUS 3:15

Kaa' amon ru kalo makaratong aku ra mataki', okou mokoondo' noyo ra kaintutunan ra ati kulaan musiti' takau maayag koson ra anak ri Aki Kapuuno', ioginio pasimpungan ru ulun ondo' mangintopot ri Aki Kapuuno' ondo' maayag. Itakau noyo ondo' mampabala' am manungka' ra katapatan.

IBRANI 3:6

Kaa' i Kristus gumagaya' koson ra Anak ondo' maningganai ra ngaangai' ulun ri Aki Kapuuno'. Itakau ti noyo ulun Nano amon ru makakau' takau am mangintopot ra makaalap atan ondo' lansanin takau.

1 PITRUS 2:9

Kaa' akau ti noyo bansa' ondo' pinili' ri Aki Kapuuno', imam ru Raja', bansa' inaru' mangandoi Riso, ulun Nano. Pinili' kau ri Aki Kapuuno' am piniau kau intor ra kalandaman sumubol ra sinda Nano ondo' makaimuag, koson mampatanou kau ra baalon Nano ondo' makaimuag.

1 PITRUS 4:11

Osoi ayuk inanian ra kapandayan mindagu, moonsoi ru mampasaboi io ra bala' intor ri Aki Kapuuno'; am osoi ayuk mangindangan ra ulun bokon, musiti' io mangindangan mabaya' ra ikang intor ri Aki Kapuuno'. Maa' raginio, ralalom ngaangai' ondo' kondoyon min, i Aki Kapuuno' urumaton sabap ri Jisus Kristus. Io no makakuasa' am maaya' omporon ra sabuoi-buoi no. Amin.

1 PITRUS 4:17

Maar noyo masuku' paat ri Aki Kapuuno' mangakim ra ulun ru tana' ti, am Ulun Nano akimin No galing. Amon ru itakau noyo talimpuunan Nano, atan masauk ra tauli no risilo ondo' kalo nangintopot ra Tanou Moonsoi intor ri Aki Kapuuno' i?

PINAINTALANG 1:6

Nampasauk Io ritakau ra imam ondo' mabaya' Riso makapamarinta takau am poyo mangandoi ra Ama' Nano, i Aki Kapuuno'. I Jisus Kristus noyo ondo' matulai am makakuasa' ra mantilayun. Amin!

PINAINTALANG 20:6

Pakaansuk no ulun ondo' paayaan bayagon saguli' ra kasaa' ti. Kapatayan karuo kalo manguasa' risilo. Masauk ilo boo ra imam ri Aki Kapuuno' am ri Kristus, am mamarinta ilo mababaya' Riso buoi saribu ngambilor.

PINAINTALANG 3:12

Osoi ayuk mangala ra kuasa' ru kalaatan, baalon Ku io ra lugu' ralalom Baloi ri Aki Kapuuno' Kuno, am mantilayun io ra giu'. Patulison Ku riso inggalan ri Aki Kapuuno' am inggalan ru bandar ri Aki Kapuuno', ioginio bandar Jirusalim bagu ondo' tumuun intor ra suruga', intor ri Aki Kapuuno' Kuno. Am inggalan ra nakabagu Kuno niayuk patulison Ku riso.

PINAINTALANG 5:10

Nampasauk Kou risilo koson ra imam ondo' mabaya' Rirun mangandoi ri Aki Kapuuno', am mamarinta ilo ra tana' ti.”