1 PITRUS 1:17 - Tanou Moonsoi Timugon

¹⁷ Makiama' kau ri Aki Kapuuno' ralalom ru pakiasian min. Io no niayuk ondo' mangakim ra ulun maya' ra binaal nilono, am kalo mampili' ra ulun. Ginio ra urumato' noyo i Aki Kapuuno' buoi ra akau lakat ayuk poyo soroi ra tana' ti.

1 PITRUS 1:17 ပူးပေါင်းရင်းမြစ်များ

KASAUKAN 47:9

Taam i Jakub, “Umur kutu ra sangulun majajawot ti maatus am talu ngoopor ngambilor noyo. Buoi ru ginio malimanan ra sangkinolor ayuk am masuang kapaganan, sala' ka koson ra kaayagan ru kinamatuaan kuli ra majajawot.”

1 TUNUNG RU BANSA' ISRAIL 29:15

Okou nakapandai, iou Tuhan, ra koson ra kinamatuaan maili, akai pana naayag koson ra ulun minatong am ulun bansa' ru bokon. Kaayagan mai koson ra babara' ondo' mansail, am kalo makalabus akai intor ra kapatayan.

2 TUNUNG RU BANSA' ISRAIL 19:7

Kalaa' kano ra Tuhan, am ilalain ra mampaguang, sabap ra Tuhan, i Aki Kapuuno' takau masisang ra ulun ondo' sumiang, kapoam ondo' kalo matimpok, kapoam ondo' mangapu ra pangngambi'.”

AYUP 34:19

Namangun i Aki Kapuuno' ra moonong ulun; kalo saungon No raja', kapoam kaansayin ondo' langkaya' intor ra musikin.

MAZMUR 39:12

Inukum Mu tula ru ulun ra sawai Muno, am koson ra anai, namuso Kou ra kasagaan nilo. Sotopot no kaayagan ru moonong ulun koson ayuk ra mapaabus ra paminawaan ayuk.

MAZMUR 89:26

Kapilaan Ku kangkou pamarintaan nano intor ra Raat Tanga' saboi ra Sungoi ru Iprat.

AMSAL 14:16

Ulun mapintar kalo maajag-ajag am minggalur ra kalaatan, kaa' ulun sasambungon maajag-ajag am mamatas ra kalo mangkara' pagulu.

AMSAL 28:14

Pakaansuk noyo ulun ondo' gumagaya' ra Tuhan, kaa' ulun mokotog ulu iono pusoon.

JIRIMIA 3:19

Indagu Tuhan, “Israil, moogot Aku mangapu rirun koson ra anak Kuno, am mangani' rirun ra pagun ondo' makabansuk ra guang, pagun ondo' moonsoi kaga' ra titikop ru tana'. Moogot Aku rirun mampiau Raki' ‘Ama' kuno’, am kalo noyo boo tumalikur intor Raki'.

JIPANYA 3:9

Kaa' malupus raginio kulawon Ku guang ru bansa'-bansa' no, saboi makiasi' ilo Raki' ayuk am sala' ka tuhan-tuhan ra bokon. Ngaangai' bansa' no gumagaya' Raki'.

MATIUS 16:27

Sabap ra Anak ru Ulun no mamaar noyo rumatong ralalom katulayan ru Ama' Nano sumbayaan ru malaikat-malaikat Nano. Paat raginio mambalos Io ra moonong ulun maya' ra ondo' binaal nali.

MATIUS 22:16

Panusub ilo ra kukula' ngaulun maamaya' ru Parisi am ulun bala ri Irodis tumuum i Jisus. “Mangingila',” konilo, “Makapandai akai mabanis guang Muno. Mangila' Kou ra ulun ra kasagaan ri Aki Kapuuno' ondo' motopot. Okou niayuk kalo babaya' ra atan ayuk pangkaraan ru ulun am kalo mampili' ra osoi ayuk ulun.

MATIUS 6:9

Sotopot no koson ragitio akau makiasi': ‘Ama' mai giu' ra suruga', omporon inggalan Muno.

ROMA 11:20

Motopot ginio. Inindaanan ilo sabap ra kalo nangintopot ilo, am soroi kau sabap ra pangintapatan mino. Intor raginio, pai' kano limbau, kaa' ilalai' min!

2 KORINTUS 5:6

Ginio ra masalok akai kalo malaa'. Nakapandai akai ra buoi mai mayan ra inan ti, maalur akai intor ra ayanan ru Tuhan.

2 KORINTUS 7:1

Pabukat kau ngaangai' ra tagamin ku! Binantu' noyo ri Aki Kapuuno' ngaangai' no ritakau. Sabap raginio musiti' takau magipasau intor ra ngaangai' baal am pamaguangan majamol, maa' raginio i Aki Kapuuno' urumaton takau am maayag takau toojo ayuk Riso.

2 KORINTUS 7:11

Ilai' min noyo ampos ru guang mangiluk min ondo' sumugut ra kasagaan ri Aki Kapuuno': mirot kau mampainono' ra kalo makasala kau. Mumpara' boo sisang min ra tula i am mumpara' boo laa' min ra sonor no. Mumpara' poyo ondom min raki' am kasagaan min mangukum ra baal makasala. Nampakito kano ra ralalom ru ngaangai' baal ti ra kolondo' sala min.

GALATIA 2:6

Kaa' koson ilo ondo' karaan tingganai ru Kristian, kalo nangulau ilo ra pangilaan kutu. Sotopot no kalo pana nakiiou aku risilo sabap ra itakau ulun ti mogondo' ayuk ra pagilangan ri Aki Kapuuno'.

IPISUS 1:17

Makiasi' aku ri Aki Kapuuno', Ama' ra kolondo' pogondo', ioginio Ama' ru Tuhan takau i Jisus Kristus, maa' raginio mangani' ramuyun ra Ambiluo Nano. Io no mampasauk ramuyun mapintar am niayuk paintalangon No ramuyun osoi Io koson totopot kau makaulig Riso.

IPISUS 3:14

Ginio ra aku migulatur, koson makiasi' ri Ama'.

IPISUS 6:9

Tuan kau ngai', akau pana musiti' mampakito ra paliso matanda' ra ulipon mino. Karaa' min ra akau am ulipon mino mokoondo' sangulun Tuhan giu' ra suruga', am Io kalo mampili' ra ulun.

SAGULION 10:17

Tuhan i Aki Kapuuno' mino makakuasa' ra ngaangai' tuhan ra bokon am ngaangai' kakuasaan. Matulai am makakuasa' Io, am musiti' gagayaan Io. Kalo magimbas am kalo mangapu ra rasua.

PILIPI 2:12

Sabap raginio pabukat ondo' tagamin kuno, koson masalok kau niayuk giminagaya' raki' paat ra aku soroi ramuyun, mulu' poyo gagaya' mino ra raino ti ra itakau nakapaginggalur. Pirot kano mompogogot ra kaansayan ru pamayagan minti, ioginio mansail ra ati kulaan kinapirot ru guang min sumugut am mangurumat toojo ri Aki Kapuuno'.

KOLOSI 3:25

Am osoi ayuk ondo' mambaal ra tula, io galama' magiba' ra balos ru tula nano sabap ra ukum ri Aki Kapuuno' pogondoon ra ngaangai' ulun.

IBRANI 12:28

Intor raginio, paringkuanang takano ri Aki Kapuuno', sabap ra inanian takau ra rondo' pagun ondo' kalo maalap kauyog. Pongompor am samba takano Riso maya' ra kasagaan Nano, ioginio mabaya' ra urumat am inggana' ru guang.

IBRANI 4:1

Raino, bantu' ri Aki Kapuuno' ni lakat poyo soroi ra tumangus takau mabaya' Riso. Intor raginio, ilalai' takau noyo ra kolondo' ra sangulun kalo makatangus mabaya' Riso.

1 PITRUS 2:11

Pabukat ondo' tagamin ku, akau koson ra ulun bansa' ru bokon ondo' kolondo' karandanan ra tana' ti, maa' raginio kitaakon ku ramuyun, inggaluri' min noyo kinibit malaat, ondo' masalok gumula' ra kasagaan min gumagaya' ri Aki Kapuuno'.

1 PITRUS 3:15

Kaa' urumato' noyo i Kristus ralalom ru guang mino koson ra Io noyo manguasa' ra kaayagan min. Musiti' kau tumampos kalalair koson makapangani' ra taaman ra osoi ayuk ulun ondo' makibala' ramuyun ra puun ru kalansanan mino.