1 KORINTUS 9:24 - Tanou Moonsoi Timugon

²⁴ Pabukat kau, maaru' nakapandai kano ra ralalom pagugulaan masimbul, moonong ulun ondo' maya' raginio masimbul, kaa' sangulun ayuk mokoowot ra taak kamanangan. Pasimbul kano koson riso, saboi mokoowot kau ra taak raginio.

1 KORINTUS 9:24 ပူးပေါင်းရင်းမြစ်များ

PILIPI 3:14

Ginio boo puun ra aku marayus ayuk mompogogot ra taak nangulaan ti, ioginio kaayagan giu' ra suruga'. Am gitio noyo pampiawan ritakau ri Aki Kapuuno' sabap ri Jisus Kristus.

IBRANI 12:1

Ngaangai' sasi' ra raitii' ni makakito ritakau; intor raginio tatango' takano ngaangai' ondo' mongompong ritakau am niayuk tula ondo' masalok mumbir ritakau, am pirot takano baya' ra pasimbulan ondo' inaru' ri Aki Kapuuno' ritakau.

PINAINTALANG 3:11

Kalo boo mabuoi am matong Aku! Alungi' noyo ondo' soroi poyo ramuyun no, maa' raginio kalo matakou ru ulun bokon ampos ru kamanangan mino.

PILIPI 2:16

ra akau mampasaboi ra Tanou Moonsoi risilo. Amon ru koson raginio kaayagan min, tauli no, paat ra ratangan saguli' ri Jisus mokoondo' paringkuanangan kuno, sabap raginio mampakito ra kinandoi kuli kalo malubat am sala' ka kolondo' ampos.

1 KORINTUS 9:26

Ginio nai ra mangandoi aku ayuk ri Aki Kapuuno', mogondo' ra sangulun masimbul gumogot ra kamanangan kapoam mogondo' ra sangulun peninju mompokono' ra gonggom nano ra pantula' nano.

GALATIA 5:7

Ragili matanda' toojo binaal mini! Kaa' raino osoi nangkinibit ramuyun kalo boo mampagagaya' ra pangilaan motopot intor ri Aki Kapuuno'? Ati guat kulaan kau nakimaitan poyo?

JIRIMIA 12:5

Indagu Tuhan, “Okou Jirimia, amon ru naagui kono nakimagilou ra ulun, atan piboo kulaan kou makimagilou ra kuda? Amon ru kalo mokosoloro' kou ra intok mamimio, atan piboo kulaan kou mokosoloro' giu' ra kataunan, giu' ra kiing ru Sungoi Jordan?

GALATIA 2:2

Minongoi aku ra Jirusalim maya' ra nanusuban ondo' pinatalang ri Aki Kapuuno' no raki'. Ralalom pagugumaan mai ra tingganai ru Kristian ayuk, pinabala' ku toojo risilo Tanou Moonsoi ondo' pinasaboi kuno ra ulun sala' ka Jaudi. Marara' aku ra ondo' pinasaboi ku noyo kapoam ondo' posoboyon kutu malubat ayuk.

JAKUBUS 1:12

Pakaansuk noyo ulun ondo' tumaan paat ra io makatiu' ra pangkinaman. Sabap ra amon ru magula' no ra io kinamin, makaapu io ra ampos no, ioginio, kaayagan ondo' binantu' ri Aki Kapuuno' ra ulun ondo' motogom Riso.

MAMPATANOU 9:11

Mokoondo' poyo ondo' nakito ku ra tana' ti: ulun masimbul ondo' maribok kalo masalok manang, am ulun ondo' baani kalo masalok manang ralalom pangayawan. Ulun mapintar kalo masalok makaalap ra ruit, ulun mapandai kalo masalok masauk ra langkaya', am ulun ondo' maikang kalo masalok makaalap ra intok masawat kaga'. Nasip malaat lumumpa' ra moonong ulun.

KOLOSI 2:18

Ginio nai ra pai' polosoo' ra akau ruungon ru ulun ondo' migiangku minggana' guang, am ondo' sumamba ra malaikat. Ulun koson raginio masumbung sabap ra rokoon nilo masuang baal ru suruga' pinakito risilo, kaa' pangkaraan ragitio sumugut ayuk ra paliso malaat nilo galama'.

MAZMUR 19:5

kaa' tanou raginio morongog ra titikop ru tana' ti, am potonowon ra pompor ru tana' ti. I Aki Kapuuno' napabigor ra kim giu' ra limbowon koson pataakon no ra mato ru orou;

GOSIA 12:10

Aku noyo Tuhan, i Aki Kapuuno' min ondo' naningganai ramuyun miningkual intor ra Misir; pinaayan Ku poyo akau ra kim koson ragili, paat ra Aku minatong ramuyun giu' ra tana' kaagisan.

ROMA 6:16

Maaru' mapandayan min amon ru polosoon noyo kaayagan min kuasaan ru sasangulun koson mampagagaya' ra susuban nano, akau noyo ulipon ru ulun no – iou pana ulipon ru tula ondo' magibit ra kapatayan, kapoam ulipon ondo' gumagaya' ra kasagaan ri Aki Kapuuno' ondo' mopobonsoi ramuyun Riso.

1 KORINTUS 9:13

Nakapandai kano ra ulun ondo' mangandoi ra Baloi Tuhan makaapu ra akanon intor ra pangandayan nano. Mogondo' niayuk ra ulun ondo' mapabandai ra taak simbalui ra altar, makasia' intor ra taak raginio.

1 KORINTUS 9:23

Ngaangai' ti baalon ku sabap ra kaatangan ru Tanou Moonsoi no, maa' raginio aku pana mabarakat.

PILIPI 3:12

Kalo noyo lair mindagu aku ra matanda' aku no am kolondo' sala ku. Kaa' rayuson ku ayuk mompogogot ra taak ondo' pinatampos noyo raki' kalalair ri Jisus Kristus. Ginio boo puun ra Io nampasauk raki' ra maamaya' Nano.