1 KORINTUS 14:1 - Tanou Moonsoi Timugon

¹ Pirot kano motogom ra ulun bokon. Gogoto' min niayuk taak intor ra Ambiluo ri Aki Kapuuno', mulu' poyo ra kasagaan koson mampasaboi ra bala' intor ri Aki Kapuuno'.

1 KORINTUS 14:1 ပူးပေါင်းရင်းမြစ်များ

AMSAL 15:9

Masisang Tuhan ra ralan kaayagan ru ulun maanggal-anggal, kaa' tagamin No ulun ondo' gumogot mambaal ra kasagaan Nano.

AMSAL 21:21

Ulun mabanis guang am moonsoi guang makaumur maawar. Urumaton io am matimpok pamakuan nilo riso.

JISAYA 51:1

Tuhan mindagu, “Rongogo' Aku no, akau ondo' masaga' bayagon am ratong kano Raki' makiindangan. Karaan noyo gunung batu intor min natulisan, am pangkalian ra batu intor min nakali.

ROMA 12:6

Ginio ra musiti' takau pakayon kapandayan ra nansusuai ondo' pinataak ri Aki Kapuuno' no ritakau sigagama', maya' ra asi' Nano. Osoi ondo' inanian ra kapandayan mampabala' ra tanou ri Aki Kapuuno', kondoyon no ginio maya' ra pangintapatan nano ri Jisus.

ROMA 14:19

Intor raginio, kasalok takano mirot maayag ra rondo' guang am magigikang ra pangintapatan.

ROMA 9:30

Gitio noyo arati' ru raguon mai; ulun sala' ka Jaudi ondo' kalo mirot mobonsoi saguli' ri Aki Kapuuno', ilo noyo pinobonsoi saguli' ri Aki Kapuuno' ralalom ru pangintapatan nilo Riso.

1 KORINTUS 12:1

Raino mambala' aku ati kulaan taak intor ra Ambiluo ri Aki Kapuuno'. Pabukat kau ngaangai', masaga' aku ra akau makatutun toojo ra atan sotopot no taak raginio.

1 KORINTUS 12:31

Ginio nai ra gogoto' min noyo toojo kapandayan ondo' maatang no. Kaa' ralan ondo' moonsoi toojo tiluon min am koson ra sumunu' ti.

1 KORINTUS 13:13

Pupus no, ondo' pantilayunon am talu ringai': mangintopot ri Kristus, malansan ri Aki Kapuuno' am motogom ra ulun bokon. Ondo' maatang toojo intor ra katalu-talu, io no motogom ra ulun bokon.

1 KORINTUS 13:2

Kabalu' pana mapandai aku mampasaboi ra tanou intor ri Aki Kapuuno', kapoam makarati' ra katapatan ri Aki Kapuuno' ondo' kalo igondo' pinabala', am makapandai ra ngaangai' am poyo pangintapatan ku ri Aki Kapuuno' maikang kaga', saboi gunung no pana maalap ku pakabanding, kaa' amon kalo motogom aku ra ulun bokon, kolondo' noyo onong kuti.

1 KORINTUS 14:22

Ginio boo ra kapandayan mindagu ra ragu imuagan, ginio rondo' tatandu' intor ri Aki Kapuuno' ra ulun ondo' kalo mangintopot no, am sala' ka ra ulun mangintopot ri Kristus. Kaa' kapandayan mampasaboi ra bala' intor ri Aki Kapuuno', io no tatandu' ra ulun mangintopot ri Kristus, sala' ka risilo no ondo' kalo mangintopot.

1 KORINTUS 14:37

Osoi ayuk mangkara' ra io no sinusub ri Aki Kapuuno', kapoam mokoondo' ra kapandayan ra bokon intor ra Ambiluo ri Aki Kapuuno', ulun no musiti' makatutun ra atan ondo' tinulisan kuni, io no susuban ru Tuhan.

1 KORINTUS 14:39

Pabukat kau ngaangai', gogoto' min noyo mampasaboi ra bala' intor ri Aki Kapuuno', am pai' min inggalari' ulun ondo' masaga' mindagu ra ragu imuagan.

1 KORINTUS 16:14

Ngaangai' ru baalon mino musiti' mabaya' ra togom.

IPISUS 1:3

Paringkuanang takano ri Aki Kapuuno', io no Ama' ru Tuhan takau i Jisus Kristus. Sabap ra ralalom pasimpungan takau ri Kristus, nangani' Io no ritakau ra nansalinut barakat ralalom ru Ambiluo Nano ondo' intor ra suruga'.

1 TISALONIKA 5:20

Pai' kano pagasab ra pambalaan ondo' intor ra Ambiluo ri Aki Kapuuno'.

1 TIMOTIUS 4:14

Pai' polosoo' ayuk kandoi tinaakan ri Aki Kapuuno' no rirun, paat ra tingganai-tingganai napabanta' ra kalindu' nilai ra ulu muli liliwa' nabi-nabi nampabala' ondo' inaru' rirun ri Aki Kapuuno'.

1 TIMOTIUS 5:10

am kauligan mambaal ra moonsoi koson; matanda' nampasukor ra anak nano, mataau mangapu ra tambului, maluoi mangindangan ra ulun Kristian suku' ra kandoi kalo maatang, mangindangan ra ulun makakapaganan am mapirot io mambaal ra atan ayuk kandoi moonsoi.

1 TIMOTIUS 6:11

Kaa' okou ulun noyo ri Aki Kapuuno', ginio nai ra inggaluri' noyo ngaangai' baal malaat raginio. Singkotog no sumauk ra ulun motopot, matanda', makapangintapatan, motogom, tumaan guang am molomoi.

2 TIMOTIUS 2:22

Inggaluri' noyo kalaayan ru guang ru mamulok. Singkotog no sumauk ra ulun mabanis guang, ulun mangintopot ra Tuhan, motogom am mobonsoi risilo ondo' masalok makiindangan ra Tuhan mabaya' ra guang mapasau.

IBRANI 12:14

Gogot kano pobonsoi ra ngaangai' ulun am poyo kaayag kano ra mapasau, sabap ra kolondo' sangulun pana makakito ra Tuhan, amon ru kalo maya' io raginio.

2 PITRUS 1:7

Am kaayagan min kasagain ri Aki Kapuuno' no, ruangin ra guang motogom ra ulun Kristian; am ginio ruangin ra guang motogom ra ngaangai' ulun.

3 JUANIS 1:11

Pabukat ondo' tagamin kuno! Pai' tiluo' paliso ra malaat, kaa' tiluo' ondo' matanda' no. Ulun ondo' mambaal ra matanda', io anak ri Aki Kapuuno'. Ulun ondo' mambaal ra malaat, io no kalo poyo nakaulig ri Aki Kapuuno'.

1 SAMUIL 10:5

Mopongo raginio ongoi ra bulur ri Aki Kapuuno' giu' ra Gibia. Giu' no mokoondo' ra pangkiman ru ulun ru Palistin. Giu' ra kulobon mumpos ra bandar, makatuum kou ra sampulalai nabi ondo' mambusul intor ra bulur, intok ru altar no. Mangkuli ilo ra gambus, rabana, suling am jitor. Saliligo' am sogogolok ilo.