1 JUANIS 5:19 - Tanou Moonsoi Timugon

¹⁹ Nakapandai takau ra itakau ti intor ri Aki Kapuuno', kabalu' pana ngaangai' ulun ru tana' ti kinuasa' ru Tingganai ru riwato.

1 JUANIS 5:19 ပူးပေါင်းရင်းမြစ်များ

LUKAS 4:6

Indagu Tingganai ru riwato no ri Jisus, “Pataakin ku Rirun ngaangai' kuasa' am kalangkayaan ti. Sabap ra ngaangai' no pinataak noyo raki' am pataakin ku ra osoi ayuk pana ondo' kasagaan kuno.

JUANIS 12:31

Raino ti noyo pangakiman ra ulun ru tana' ti; raino ti alapon noyo kuasa' intor riso ondo' manguasa' ra tana' ti.

JUANIS 14:30

Kalo boo masuang raguon Kutu ramuyun, sabap ra nasuku' noyo paat ra io ondo' manguasa' ra tana' ti matong. Kaa' kalo makapanguasa' io Raki'.

JUANIS 16:11

I Aki Kapuuno' niayuk nakatalimpuun noyo mangukum, sabap ra io ondo' manguasa' ra tana' ti inukum noyo.

JUANIS 17:15

Kalo kitaakon Ku Rirun maa' raginio ilo paingkualon intor ra tana' ti, kaa' alungin Mu ilo intor ri Malaat no.

ROMA 8:16

Intor raginio Ambiluo ri Aki Kapuuno' mabaya' ra guang takau mindagu ra itakau noyo anak ri Aki Kapuuno'.

2 KORINTUS 1:12

Maringkuanang akai toojo sabap ra bolos ru guang mai maminson ramon ra kiralan ru kaayagan mai ra tana' ti, mulu' poyo pabukatan mai ti ramuyun, masalok mabanis am matanda'. Ginio mabaal mai ralalom ru kuasa' ri Aki Kapuuno' am asi' Nano galama', am sala' ka mansail ra kapintaran ru ulun.

2 KORINTUS 4:4

Guang ru ulun ondo' kalo mangintopot ti kinolondom ru tingganai malaat ondo' mamarinta ra tana' ti. Io noyo ondo' manginga' risilo makakito ra sinda intor ra Tanou Moonsoi, ioginio katulayan ri Kristus ondo' mogondo' ri Aki Kapuuno'.

2 KORINTUS 5:1

Makapandai akai ra amon ru inayanan takau ra tana' ti pusoon boo, ioginio inan takau, makaayanan takau niayuk ra suruga'. Am ayanan raginio mantilayun ondo' binaal ri Aki Kapuuno' galama' am sala' ka ulun.

GALATIA 1:4

Maya' ra kasagaan ri Aki Kapuuno', Ama' takau, nampataak i Kristus ra painawo Nano. Iniru' No tula takau koson mamayag ritakau intor ra kalaatan ondo' manguasa' ra raino ti.

IPISUS 2:2

Paat ragili minaya' kau ayuk ra paliso malaat ru ulun ru tana' ti. Giminagaya' kau ra tingganai ru mangunguasa' ra limbowon, am raino pana manguasa' ra ulun ondo' minanggal ri Aki Kapuuno'.

2 TIMOTIUS 1:12

Ginio boo puun ru aku maimbolo' ra ngaangai' ti, kaa' kalo lumawo pangintapatan kuno sabap ra naintutunan ku toojo osoi Io ondo' inintopot kuli. Am mangintopot aku toojo ra mampalayun Io ra kandoi ondo' pinalansan Nano raki' i, saboi ra Orou Pupus no.

TITUS 3:3

Itakau pana galama' ragili sasambungon, maanggal-anggal am makasala. Inulipon takau ru nansalinut kalaayan am kasagaan ru guang saboi kaayagan takali napanu' ra solon am ingot. Ulun nasisang ritakau am itakau pana galama' nasisang niayuk risilo.

JAKUBUS 4:4

Akau no ulun kalo malansanan. Nakapandai kano ra maguyum ra kasagaan ru tana' ti mogondo' ayuk ra makimantula' ri Aki Kapuuno'. Ginio ra osoi ayuk maguyum ra kasagaan ru tana' ti, io masauk ra pantula' ri Aki Kapuuno'.

1 JUANIS 3:14

Nakapandai takau no ra iniruanan takau noyo kapatayan am minanding takau no ra kaayagan mantilayun. Napandayan takau gitio sabap ra motogom takau ra rondo' am bokon. Osoi ayuk kalo motogom, io no lakat ayuk poyo inonggom ru kapatayan.

1 JUANIS 3:24

Ngaangai' ulun ondo' maya' ra susuban ri Aki Kapuuno', maayag sumimpung ri Aki Kapuuno', am i Aki Kapuuno' pana sumimpung risilo. Am nakapandai takau ra i Aki Kapuuno' maayag sumimpung ritakau, sabap ra nangani' Io ritakau ra Ambiluo Nano.

1 JUANIS 5:10

Ginio ra osoi ayuk mangintopot ra Anak ri Aki Kapuuno', nakaapu io noyo ra kaintutunan ragitio ralalom ru guang nano. Kaa' osoi ayuk kalo mangintopot ri Aki Kapuuno', manguu' io ri Aki Kapuuno' magabau, sabap ra kalo nangintopot io ra atan ondo' rinagu ri Aki Kapuuno' intor ra Anak Nano, i Jisus Kristus.

1 JUANIS 5:13

Tulisin ku gitio ramuyun ondo' mangintopot ra Anak ri Aki Kapuuno', maa' raginio mapandayan min ra akau no mokoondo' ra kaayagan motopot am mantilayun.

1 JUANIS 5:15

Nakapandai takau ra rongogon No paat ra itakau makiasi' Riso. Ginio ra nakapandai takau ragitio motopot, mapandayan takau niayuk ra mangani' Io ritakau ra atan ayuk kitaakon takau Riso.

1 JUANIS 5:18

Nakapandai takau ra ngaangai' ulun ondo' nasauk ra anak ri Aki Kapuuno' kalo marayus mambaal ra tula, sabap ra Anak ri Aki Kapuuno' mangampin riso am Tingganai ru riwato no kalo makaguut riso.

1 JUANIS 5:20

Nakapandai takau ra minatong noyo Anak ri Aki Kapuuno' am nangani' ritakau ra kaintutunan koson makaulig takau ri Aki Kapuuno'. Maayag takau sumimpung ri Aki Kapuuno' am niayuk i Jisus Kristus. Io noyo i Aki Kapuuno' ondo' motopot, am gitio noyo kaayagan motopot am mantilayun.

PINAINTALANG 12:9

Ginio nai ra tambuakal maayo no pinatiran ra liwar! Io ti kukuo intor ra galing i ondo' ininggalanan ra “Tingganai ru riwato”, kapoam “Ambiluo Malaat”, ondo' nampakalayau ra ngaangai' ulun ru tana' ti. Pinatiran io ra tana' ti nabaya' ra ngaangai' malaikat nano.

PINAINTALANG 20:3

Papatiro' io ru malaikat no ra intok ru ulun namagatoi no am kunsio' am tandui' no angob no ra segel. Intor raginio tambuakal no kalo boo makapamparuung ra bansa'-bansa' suku' saribu ngambilor no makai'. Mopongo ginio palabuson io ra kalo kukula' buoi.