Yeməs 1:12 - Ȧŋlemrȧnɛ Ȧfu

¹² Wuni ka aruba wɔŋ ɔwe mə muyu ɛgbɔnsanɛ, kotȧy-e bepi a po gbɔns kɔ-e, ɔ tə sɔthɔ ȧniyɔ ŋa aŋesəm, aŋa ɔMarki ɔ po lahiri ŋaŋ aŋa bɔthər kɔ.

Yeməs 1:12 ပူးပေါင်းရင်းမြစ်များ

Mathiu 10:22

Afǝm bɛ aŋ tǝ gbɛŋa nu salata ȧŋes a mi, kɛrɛ ɔwe mǝ muyu haŋ ka ɔthalnɛ-e, kɔnɔ kati ɔ tǝ kisi.

Mathiu 25:34

Ka ȧŋlɔkɔ ŋati ɔBȧy ɔ tǝ pa ro ŋaŋ ka kȧdiyɔ kɔŋ, Der nu naŋ aruba ŋa ɔKas kȧmi, wɔŋ nu ka rȧbȧy ara a bɛnɛnɛ ta ȧtȧ nu kǝbi ma ȧdȧru rǝ tǝpɛ.

Luk 6:22

Na aruba, ma afəm aŋ gbɛŋa nu, ɔwa maŋ gbaskinɛ nu, ɔwa aŋ sambos nu, aŋ wurɔ ames ma nu mɔ tȧy tələs salata ɔWan ka wuni.

AŋRomans 5:4

ɔwa kȧmuyu kə tə kom kȧtara, yi kȧtara kə tə kom kȧgbak ȧmerȧ.

AŋRomans 8:28

Ka sə tȧrȧ kəpa mȧtȧy bɛ mə tə yɔnɛ finɔ ta salata ŋaŋ aŋa bɔthər Kuru, pə yi mɔ ta ŋaŋ aŋa a muti kətȧŋȧnɛ ka mȧselɔ mɔŋ.

1 AŋKɔrenth 2:9

Kɛrɛ mɔ mȧgbal mə pa hɔ, Rafɔr rə te tha nənk, aŋləns aŋ te tha təl, Thalɔm ȧŋmerȧ ŋa wuni aŋ te tha nanɛ Mȧtȧy ama Kuru ɔ po bɛnɛnɛ ta ȧtȧ ŋaŋ aŋa bɔthər kɔ.

1 AŋKɔrenth 8:3

Kɛrɛ bepi wuni ɔ bɔthər Kurɔŋ, kɔnɔ Kuru ɔ tȧrȧ.

1 AŋKɔrenth 9:25

Ulaŋgba o langba ɔwe mə gbakanɛ ka ɛwol ya kasɔnka ɔ yi ugbɛt rə koko bɛ. Ɔwa ŋaŋ aŋa yɔ ti tə kəsɔthɔ ȧniyɔ ŋa ɛbɔpər məthey; kɛrɛ saŋ sə yɔ ti tə kəsɔthɔ ȧniyɔ aŋa mə te ləsər thȧnkȧŋ.

2 Timɔthi 2:15

Thəkəs tə kəthesis Kuru mɔ ȧbɔy ɔwe te ba kəlap, ɔwe mə gbay ȧsim ta təteŋ ɔlompi.

2 Timɔthi 4:8

Tiyȧŋ ȧniyɔ ŋa mȧlompi aŋ yi ta ȧtȧ mi, aŋa ɔMarki, ɔThoŋkas ulompi, ɔ tə sɔŋ mi ka ȧŋrey ŋati; ɔwa pə yi hɛ ta ȧtȧ mi gbo son-e, kɛrɛ ta ȧtȧ ŋaŋ bɛ aŋa bɔthər kȧder kɔŋ.

AŋHibru 10:32

Kɛrɛ kala ȧmerȧ ka marey ma thəpaŋ. Rodarəŋ ka ma nə po sɔthɔ ȧŋmothȧ-e, nə po muyu kətim kəbaki mədɛr, rɛ ɛsɔmpanɛ.

AŋHibru 11:17

Rə kəlanɛ Ebraham ma a mɛmər kɔ-e, ɔ wurɔ Aysak sathka; yao kɔn ɔwe po sɔthɔ ɛlahiri ɔ selɔ tə kəsɔnd ɔwan kɔŋ ukin,

AŋHibru 12:5

Nə po pənɛ ȧŋmȧŋ aŋa fɔfȧnɛ nu mɔ awuth-i? Kəpa hɔ, Wan kȧmi, te farki ȧŋmȧŋ ŋa ɔMarki, Ɔwa te thamrɔ ma ɔ thalər mu;

AŋHibru 6:15

Ɔwa ma Ebraham ɔ po muyu haŋ-e, ɔ sɔthɔ tɛn aŋlahiri.

Yeməs 2:5

Su aləns aŋwɔnt a mi abɔthər, ŋaŋ aŋa ȧdȧru rə bont amɔnɛ-e, Kuru ɔ thith hɛ ŋa tə kəyi ayola ka kȧlanɛ-i, yi tə kəsɔthɔ rȧbȧy ara ɔ po lahiri ŋaŋ aŋa bɔthər kɔ-i?

Yeməs 5:11

Kəla sə bont ŋa aruba aŋa muyu. Nə po təl ta kamuyu ka Yob, yi ȧte ɔMarki ɔ yɔna kɔ; kotȧy-e ɔMarki ɔ yi ɔla məthɔth yi ȧney.

1 Pitar 3:14

Kɛrɛ halisa bepi nə nakasi ta salata məlompi-e, ta pə bɔnɛ nu; te nu nesa maninisanɛ maŋ, ɔwa ta pə te kɛtha nu.

1 Pitar 4:13

Kɛrɛ ba ti məbɔnɛ ma nə ba ȧgbȧp ka ȧŋnȧkȧsi ŋa Krayst, kȧmȧ ma aŋyiki ŋɔŋ aŋ ŋaibinɛ-e, nə tə yasanɛ yi məbɔnɛ məbana.

1 Pitar 4:14

Bepi nə sɔthɔ məsambo salata ȧŋes ŋa Kraist-e, ta pə bɔnɛ nu; kotȧy-e ɔ Yina ka ayiki, pə yi mɔ-e, ɔ Yina ka Kuru, ɔ rensa nu; ka ȧŋgbȧp ŋaŋ a fɔf kɔ ɔləs, kɛrɛ ka ȧŋgbȧp a nu ɔ sɔthɔ ayiki.

1 Pitar 5:10

Kɛrɛ ɔKuru ka aboŋa bɛ, ɔwe po tela su tə kəwɔŋ ka aŋyiki ŋɔŋ athəbana-e, kətaŋ ka Krayst Yisɔsȧŋ, ma nə po nakasi ɔthan-e, kɔn kɔnɔnɛ ɔ tə gbenthis nu, ɔ tə bȧksər nu, ɔ tə lompəs nu.

1 Pitar 5:4

Ɔwa ma ɔTɔl ubana mɔ tɔrinɛ-e, nə tə sɔthɔ ȧniyɔ ŋa ayiki aŋa te ba kəferər.

1 Yɔn 4:19

Sə bɔthər kɔ, pəkasifɛ kɔnɔ mɔtha bɔthər su.

Kȧŋȧibinɛ 2:10

Te nesa tȧy o tȧy ȧtȧ mȧ mə ba kənakasi. Sethani ɔ tə fak alɔm kətɔŋ ka mu ka ȧŋseth ȧtərənkȧ kȧmȧ a mɛm mu, ɔwa mə tə sompanɛ mərey tɔfɔt. Ta mə yi ubɔthi lanɛ haŋ ka rȧfi, ɔwa minɛ i ti sɔŋ mu ȧniyɔ ŋa aŋesəm.

Kȧŋȧibinɛ 3:19

I ŋal ŋa bɛ aŋa i bɔthər, ɔwa i sirans ŋa sɔ; tiyȧŋ ta mə yi uyasyas, ɔwa thupi thɔŋ.

Kȧŋȧibinɛ 3:21

Ɔwe mə tham i ti sɔŋ kɔ mamari tə kəyira yi minɛŋ ka kawaŋ ka rȧbȧy ra mi, mɔ mə minɛ sɔ i po tham, ka i yirȧ yi ɔKas kȧmi ka kawaŋ ka rȧbȧy rɔŋ.