Tiyȧŋ ba məbɔnɛ munɔ kȧriyana, dɛ yi naŋ sɔ aŋa yirȧ ri. Sɛkɛ nu-o, naŋ aŋa yi ka ȧdȧru, dɛ yi ka kȧbȧŋ kəbana; pəkasifɛ Sethani ɔ po thor do rɔnu, ɔwa ɔ ba rəbaŋ rəbana, kotȧy-e ɔ tȧrȧ kəpa ɔ ba gbo alɔkɔ agbut.
Ka i təlȧ sɔ rim rəbana ara wur ka kawaŋ ka rȧbȧy, rə pa, Kəla, ɔyirȧ wa Kuru ɔ yi rɛ afəm a kəpet, ɔwa ɔ tə yirȧ kətɔŋ ka ŋaŋ-e, ɔwa aŋ tə yi aŋfəm ŋɔŋ, ka Kuru kɔn kɔnɔnɛ ɔ tə yi rɛ ŋaŋ, ɔwa ɔ tə yi ɔKuru ka ŋaŋ gbeŋ.
Kədarəŋ kati i kəli, ka i nənk kədare kə kanthɛ ro riyana, ɔwa ȧrim ara i mɔtha təl rə bȧlȧnɛ mɔ kəthɛma ȧke bɔ fɔfȧnɛ mi, kəpa ye, Der ŋat anɔ, i ti tɔri mu mȧtȧy ama ba tə kəder.
Ka rəka o rəka bɛ ro riyana, yi ka ȧdȧru, yi ratha ka ȧdȧru, yi ro bȧŋ, dɛ yi koko bɛ ara yi ri, i təl ma aŋ pa-e, Aruba-o, ayiki-o, kȧthɔkəs-o, dɛ yi aŋfɔsɔ ɛ yi do rɔŋɔŋ ɔwe yirȧ ka kawaŋ ka rȧbȧy, yi ka kaLɔmɛ kəfɛth thȧnkȧŋ o thȧnkȧŋ.
Kədarəŋ kati, i nənk runiya rəbana ara wuni ɔ gbəli hɛ lɔm kəwur ka təbona bɛ, yi ka ɛbɔnsɔŋ bɛ, yi ka afəm o afəm, dɛ yi kənt o kənt, aŋ təmȧ rodi ka kawaŋ ka rȧbȧy, dɛ yi rodi ka kaLɔmɛ kəfɛth, kaŋ lopra suma təfera, kaŋ wop ɛrɔŋkɔ ka mȧta maŋ.