AŋƐfisɔs 5:3 - Ȧŋlemrȧnɛ Ȧfu

³ Kɛrɛ kȧrəp-o, kȧtayanɛ bɛ-o, ta a pa ras ɛmilɛ-o, ta a te sɔ bont yi kətɔŋ ka nu, mɔ mȧ aŋsəm aŋ yi tə kəyɔ.

AŋƐfisɔs 5:3 ပူးပေါင်းရင်းမြစ်များ

Mathiu 15:19

Ȧtesoma-e ɛnanɛ ɛlǝs-o, kǝdifǝth-o, kǝrǝp-o, rǝkeiyo, mǝseri ma rǝyem-o yi kǝfɔf Kuru ɔlǝs-e, ɛ wur ka ȧŋmerȧ.

Luk 12:15

kɔ pa ro ŋaŋ, Botnɛ nu, ɔwa bumnɛ nu ta ɛfɔr ɛyamari, ȧtesoma-e aŋesəm ŋa wuni aŋ yi hɛ ka mȧyɛt məgbathi ama ɔ ba.

Luk 16:14

AŋFarisi sɔ aŋ təl mȧtȧy ame bɛ; ɔwa maŋ yi afəm aŋa bɔthər akala aŋ sel kɔ.

Mȧyɔs ma aŋsom 15:20

kɛrɛ ta sə gbalər ŋa kȧmȧ aŋ gbapɛ rayifa ra ɛyɛt ɛpath, yi kərəp, yi ɛsɛm a dif kəte loŋ mətir, yi mətir.

Mȧyɔs ma aŋsom 20:33

I la hɛ fela akala ȧferȧ, abɔŋɔ thalɔm ɛlopra ya wuni o wuni.

AŋRomans 1:29

Ŋaŋ-e aŋ po la yi mələs tətəp tətəp, mȧkənȧ-o, kȧtut-o, ȧmerȧ aləs-o, amilɛ-o, kȧdif kəsias-o, kȧgbal dɛ yi kȧtɔns tȧy.

AŋRomans 16:2

kȧmȧ nə malanɛ kɔ salata ɔMarki, mɔ mə aŋfəm ŋa Kuru aŋ yi tə kəyɔ, yi kȧmȧ nə mar kɔ rə tȧy o tȧy ȧtȧ ɔ yema. Ȧtesoma-e kɔn kɔnɔnɛ sɔ ɔ poŋ mar afəm agbȧthi, dɛ yi minɛ sɔ.

AŋRomans 6:13

Te sɔnd malaŋktha ma madɛr ma nu ka ahakɛ mɔ ɛyɛt ɛtima ya mȧkənȧ, kɛrɛ sɔndnɛ ka Kuru mɔ afəm akəli aŋa po wur ka rəfi kəkɔ ka aŋesəm, yi malaŋktha ma madɛr ma nu mɔ ɛyɛt ɛtima ya məlompi salata Kuru.

1 AŋKɔrenth 10:8

Ta a pa ras sə yɔ kərəp, mɔ alɔm kətɔŋ ka ŋaŋ aŋ po yɔ, kaŋ fi ka ȧrey ŋin ɛwul kəgba ɛsas.

1 AŋKɔrenth 5:1

A po pa ti gbafəth kəpa kərəp kə yi kətɔŋ ka nu, kərəp kəwunɔŋ ȧke te yi hali kətɔŋ ka aŋkafri tə kəpa ye ukin ɔ gbasi ɔrani ka ɔkas kɔŋ.

1 AŋKɔrenth 6:13

Ɛyɛt ɛdi ɛ yi ta akor, ɔwa akor kə yi ta ɛyɛt ɛdi; kɛrɛ Kuru ɔ tə yɔ yi bɛ ɛ tiyȧ fu. A bɛmpa hɛ ȧŋdɛr ta kərəp, a bɛmpa ŋi ta ɔMarki; dɛ yi ɔMarki ta ȧŋdɛr.

1 AŋKɔrenth 6:18

Gbukɛ nu kərəp. Ahakɛ o hakɛ aŋa wuni mɔ yɔ aŋ yi hɛ ka ȧŋdɛr, kɛrɛ ɔwe mə yɔ kərəp-e, ɔ sap ahakɛ ka ȧŋdɛr ŋɔŋ gbeŋ.

2 AŋKɔrenth 12:21

ɔwa kȧmȧ pə te yi ma i der sɔ-e, ɔKuru kȧmi ɔ tə thora mi rodi ka nu, ɔwa i ti bok ta ȧtȧ ŋaŋ aŋa po la yɔ ahakɛ, kɛrɛ aŋ te tha thupi ta katayanɛ yi kərəp tətəp tətəp ȧtȧ aŋ po yɔ.

AŋƐfisɔs 5:12

Pəkasitɛ pə yi məlap hali tə kəbont mȧtȧy ama mə aŋ yɔ rə ȧmȧnknɛ.

AŋƐfisɔs 5:5

kotȧy-e nə tȧrȧ ti tə tɛntɛnɛ kəpa wuni rəpi, thalɔm wuni nɔkɔ-e, thalɔm wuni ba ɛfɔr ɛyamari-e, ɔwe yi mɔ ubȧtho arɔŋ-e, ɔkati ɔ ba hɛ ani ka rȧbȧy ra Krayst yi Kurɔŋ.

AŋFilipai 1:27

Kɛrɛ yɔ nu kȧmȧ mȧyɔs ma nu mə yi məgbɛt ta ȧkɛra kəfinɔ ka Kraystȧŋ; kȧmȧ pə yi-e, bepi i der kori nu, thalɔm i bəpər hɛ, i gbəli təl ta mȧyɔs ma nu, kəpa nə təmȧ kəŋkəŋ ka mȧyi min dɛ yi ȧmerȧ ŋin tə kətim ta kȧlanɛ ka ȧkɛra kəfinɔ ka Kuru.

AŋKɔlɔsi 3:5

Tiyȧŋ dif nu mafela ma ȧdȧru, pə yi mɔ-e kȧrəp-o, mȧnɔkɔ-o, ɛnanɛ ɛyifas-o, mȧfela mələs-o, dɛ yi ɛfɔr ɛmara ɛyɛ yi mɔ kȧbatho ɛrɔŋ.

1 AŋThɛsȧlonika 4:3

kotȧy-e mȧselɔ ma Kuru, miyȧŋ, hali kasəməs ka nu, kȧmȧ nə te yɔ kərəp.

1 AŋThɛsȧlonika 4:7

kotȧy-e Kuru ɔ tela hɛ su salata mənɔkɔ, kɛrɛ ta rəsəm.

1 Timɔthi 2:10

kɛrɛ ta aŋ yesinɛ yi məyɔs məfinɔ ama mar afəm abom aŋa nesa Kuru Məsaba.

1 Timɔthi 3:3

Ta ɔ te yi wuni mun məber, thalɔm wuni sɔŋkɔ sɔŋkɔ, ta ɔ te ba rədir ta akala-e; kɛrɛ ta ɔ yi umuyu, uthɔfəl, ɔwe te fela rəka ra wuni lɔm;

1 Timɔthi 6:10

kotȧy-e mabɔthər ma akala mȧ yi anthəŋk ŋa mȧləs tətəp tətəp bɛ; ta salata mafela ame-e, alɔm aŋ po bɔlȧnɛ kȧlanɛ, kaŋ po sɔthɔnɛ ɛpa ɛbaŋ dəbuth ɛgbathi.

2 Timɔthi 3:2

kotȧy-e afəm aŋ tə yi abɔthərnɛ, aŋa ba ɛfɔr ɛmara, aŋa mə gbək ɛyoŋka, afəm akabanɛ, aŋa mə fɔf Kuru ɔləs, aŋa mə te sanɛ ka ŋaŋ aŋa kom ŋa, afisrəwali, aba hɛ məsəm,

Taytɔs 1:11

Mə yi tə kəyɔ ŋa aŋ tȧŋk, pəkasifɛ aŋ ləsər kȧlanɛ ka təkomra təlay, kaŋ thəksa ȧtȧ aŋ yi hɛ naŋ tə kəthəksa, salata akala.

Taytɔs 1:7

kotȧy-e ugbəka ka aŋchɔch-e, ta ɔ yi upaŋi tȧy mɔ ȧŋbɔy ŋa Kuru, ɔwa ɔ yi hɛ tə kəyi ubaki rəbomp thalɔm ulɛmp rə rəbaŋ-e, ta ɔ te bɔthər məber, thalɔm kətim thalɔm məfela məbaŋ ta akala.

Taytɔs 2:3

Ya pəyi sɔ yi ŋaŋȧŋ, kȧmȧ mȧyɔs maŋ mə yi mɔ afəm asəm, kȧmȧ aŋ te yi afəm anafiki-e, ɔwa aŋ yi hɛ tə kəmun məber məgbathi, kɛrɛ ta aŋ thəksa mȧtȧy məfinɔ,

AŋHibru 12:16

Kəli nu finɔ kȧmȧ wuni rəpi thalɔm wuni ləs mɔ Isɔŋ, ɔwe thila rabȧki rɔŋ ta da rədi ɔ te yi kətɔŋ ka nu.

1 Pitar 5:2

Wɔnthər nu akuthi ka Kuru ȧke a po laŋklia nu, pə yi hɛ rə kəte ba məyɔ, kɛrɛ ka mȧselɔ ma nu gbeŋ; pə yi hɛ sɔ ta məkaŋya mənɔkɔ, kɛrɛ rə ȧmerȧ ŋa məbɔnɛ.

2 Pitar 2:10

Kɛrɛ pə tha gbethi thaŋka ŋaŋ aŋa kɔth ka mafela ma mȧdɛr yi mȧnɔkɔ mati, ɔwa aŋ farki təbȧy. Ŋa mə yi abȧki rəfɔr-e, aŋ nesa hɛ tə kəfofiya aŋyiki ŋa rȧbȧy ra Kuru.

2 Pitar 2:14

Ɛfɔr yaŋ gbeŋ ɛ la kərəp, ɛyɛ te gbəli tey kəyɔ ɔləs, kaŋ pəŋis ŋaŋ aŋa ba ɛmerȧ ɛlȧfthɛ lȧfthɛ; a rusəm ɛmerȧ yaŋ ta salata ɛmilɛ. Ŋa awuth ŋa ȧranka ŋaŋ.

2 Pitar 2:3

Ɔwa kətȧŋȧnɛ ka radir ra ŋaŋ aŋ tə pəŋis nu yi təyem salata akala: kɛrɛ kȧbi ka thəpaŋ kathoŋkas ka ŋaŋ kə linsa hɛ, mba, ȧŋranka ŋaŋ aŋ dirȧ dirȧ hɛ.

Kȧŋȧibinɛ 2:14

Kɛrɛ i ba kəthɛkɛ mu ta tȧy təlɔm, pəkasifɛ mə ba ŋaŋ kətɔŋ ka mu aŋa wop mathəksa ma Belam, ɔwe thəksa Belak tə kəgbɔns aŋwuth ŋa Isrɛl kȧmȧ aŋ di ɛyɛt ɛyɛ a po wurɔ sathka ka ɛrɔŋ-e, dɛ yi tə kəyɔ kərəp.

Kȧŋȧibinɛ 2:21

I po sɔŋ kɔ afɛrɛ tə kəthupi, kɛrɛ ɔ thupi hɛ ka kȧrəp kɔŋ.

Kȧŋȧibinɛ 21:8

Kɛrɛ ŋaŋ aŋa ba rənes yi ante lanɛ, dɛ yi aŋləs-e, yi ŋaŋ aŋa dif kəsias-e, yi aŋfəm arəpi, dɛ yi anthupəs-e, yi ŋaŋ aŋa ramnɛ ɛyɛt ɛbumərnɛ, dɛ yi afəm ayem bɛ-e, aŋ tə ba ɛgbap yaŋ ka ȧŋbonka ŋa nȧnt dɛ yi salfər. Rafi ara bekȧ mȧrəŋ, riyȧŋ.

Kȧŋȧibinɛ 22:15

Ȧtesoma-e, maȧən-o, aŋmɛn-o, aŋfəm arəpi-o, aŋfəm adif-o, ŋaŋ aŋa ramnɛ ɛyɛt ɛbumərnɛ-o, dɛ yi wuni o wuni ɔwe bɔthər rəyem-o, ama ɔwe fɔf rəyem, ŋa bɛ aŋ yi rokaŋ ka kȧpet.

Kȧŋȧibinɛ 9:21

Aŋ thupi hɛ ras ta mȧdif maŋ, thalɔm ta mȧthupəs maŋ, thalɔm ta marəp maŋ, ta a pa ras ta takey taŋ.