Romanos 5:17 - Nuevo Testamento Toba Maskoy

¹⁷ Aveske lhta ntemak nengetsepma nak apieseksek enenlhet'avok aniem'o lhta lhema enenlhet meliehekho apkaskamakha Eniapom Neten. Kolhva koka nkoltemeskesek hata apkelientalhnemo apkellelto apketlhevaikamok alhnankok apkellangiemhaikama, nema altemeskeskama nhan apkelpeivomo metka akianmoma aniem'o lhema enenlhet apvesai'a Jesucristo.

Romanos 5:17 ပူးပေါင်းရင်းမြစ်များ

Juan 10:10

Apkeliavek ketlhengkap apmenielhma nak vanlha mota apmahai'a emenielhek, kakpota nhan hengaqhek, hentevaksek nahan. Koka ko'o asva'ak kakpota allangkok aplhamakho aliennaktema apnenio'ok, lhamakho qaselha alaimommalhkelha la'a.

Romanos 5:12

Ka akvai'o lhnak nanek mongeleliehekho hengaskamakha Eniapom Neten aniem'o lhema aphapak enenlhet apvesai'a Adan. Meliehekho lhnak nanek apkaskamakha m'a Eniapom Neten. Netamen akpaihekho lhmankek ham nengetsepma nak ngkanek aplhamakho nhan enenlhet'avok meleliehekho m'a.

Romanos 5:15

Akvai'o akientalhnema nak aniemai'o Adan, koka mo'ok aktema Eniapom Neten hengellaiangko metka akianmoma. Akvai'o nak apkeletsepma lhamakho enenlhet lhmankek ham aniem'o meliehekho lhema aphapak enenlhet, Adan apvesai'a m'a. Koka Eniapom Neten na hengellaiangko qaselha metka akianmoma altakmelkeskamo nak nengellaniemhaikama nenlhamakho aniem'o koka nhan lhema enenlhet apvesai'a Jesucristo.

Romanos 5:20

Ka aktemakha lhnak nanek akvai'o ley Moises ma'a atlhenkeskekho apvalho'ok enenlhet meleliehekho apkellaskamakha Eniapom Neten, niaveiangkek nak nanoka meleliehekho m'a, koka neten ankek nak nanek na ntemak akiavekamok aktaqmanma apkellanei'o Eniapom Neten.

Romanos 6:14

Ka apkellanengko la m'a astakha lhkek alheianma, mmaskek anmangka ngkollatsekama, mmaskek na apkellava koneng ley, kolhva koka apkelloka koneng aktaqmanma nak hengellanei'o Eniapom Neten.

Romanos 6:23

Nelan'o la ngkollatsekama nak, ngva'ak na nengetsepma nak. Koka Eniapom Neten na hengellangkok aliennaktema ennenio'ok mankotnengvaianlha nnelha metka akianmoma aniem'o Apveske engankok Cristo Jesús.

Romanos 8:39

Mamma akmovana aniem'o neten anak kakpota nhan konne ankek nalhepop anak, mamma qaselha apkelentepkeskama lhta Eniapom Neten, mankollavankek na hengelienievkesek hengamelaiam Eniapom Neten aniem'o Apveske engankok Cristo Jesús.

1 Corintios 15:49

Ka kolhvave nak neliokha nak malha apiokha m'a enenlhet apkelanemmakpo lhnak nanek apkeniemai'o nalhepop, koka alhaiek hata m'a mo'ok neliokha malha enenlhet apkeniemai'o neten.

1 Corintios 4:8

Nketlhenke mota apvalho'ok ketlhengkap apkellelto ngkeskama qaselha apanko'ok, mankaimommalhka qaselhaha nhan, nketlhenkek na apvalho'ok malha apkeliav'akha apkelveskai'e la'a, malha mongelaimelhkak na ennengko'o angelpasmok ma'a. Ntasek hatelha m'a etnangkok apkeliav'akha apkelveskai'e ketlhengkap kakpota antangkok ennengko'o lha malha apkelveskai'e nentemo lhemek la'a.

Filipenses 3:9

aspasmekho nhan ma'a. Asieniekhek astema moi'askeiam askanemo lhta aspeivomo aniem'o lhta askeliehekho ley Moises, kolhva koka asiavek asto aspeivomo aniem'o moi'askeiam Cristo. Hai, hetneskaskek aspeivomo Eniapom Neten aniem'o m'a mongiaskeiam anak.

1 Timoteo 1:14

Nkaqhok koka avanhe kanke lhta aktaqmanma helanei'o Apveske engankok, heiaiangko lhta nhan moi'askeiam, nengasekhai'o aniem'o m'a Cristo Jesús.

2 Timoteo 2:12

Ka nengvaskapo la nhan neksa nellengaiangko akientalhnema metka nengai'a nhan, antangkok hata malha apkelveskai'e lhemek ma'a, kanhan nenlheno la mangiamo apvesai'a Cristo, elhenek hata nhan manghengiamo m'a.

Santiago 2:5

Eltaqmelkaso no apkellailhemo elialheng'a askellamelaiam, apkeliekieskek Eniapom Neten enenlhet'avok anak metka apkelletsekama kakpota ngkoitek akiavai'a meliaskeiam, etnangkok na apkennemolhema aptemakha lhnak nanek apeneskamo aplheianma ellangkok hata m'a apkellelto la apkellasekhai'o m'a.

1 Pedro 2:9

Ketlhengkap koka apkeliekiesaiangkek Eniapom Neten kakpota etnangkok apkennemolhema, apkellelto nhan sacerdotes apkellasennaikama apiav'akha apveske, apkellelto nhan lhema apkavakha apkelpokkenammap aniem'o apkenmama apianmongkeskama Eniapom Neten, apkeleltemo nhan eleltennasangkok lhamakho qaselha hempelapkeskama apkelanai'a m'a, aplaqlosengvekho m'a ienaqtesakha lhma ketlhengkap, aplaqlekho m'a akieto malha apommatmakha atsaskamo nke lhma

Apocalipsis 1:6

Hengeltemeskaske lhta nhan malha apkeliav'akha apkelveskaie ennengko'o kakpota nhan sacerdotes kakpota angellasennama mota m'a Eniapom Neten apto apiapom ma'a. Ka ngkanek na ntasek ellaho mota apvesai'a m'a, etlhenama mota akietnema neten apankek apientalhnemo kanhan apmopvana panke metka akvaiam annelha aliekaikamok iantelhkapa. Amen.

Apocalipsis 20:4

Asvet'o lhta mokhom apkelveskai'e apkakhangko apkeltanema apkelveskai'e m'a neten, nne lhta allangko apkenmopvanka'a kakpota eliekpelkok apkeltemakha enenlhet'avok lhamakho aiempek lhmankek ham. Asvet'o nhan apkel·hangok ma'a nema aliaqtemanma lhta apiaspok aniem'o mota apkelpaieskama ania'a aplhenammap Jesús kakpota nhan apkeleltennaikama Eniapom Neten apaivoma. Ma lhta nhan elteklheiangkok aptapno'ok naqtavek qaselha nevhak alhta nengai'o kakpota nhan nema akietkeskamo akiokha nke alanemmalhka m'a. Meleltemo lhta nhan ngkolhek apnaqtalheso akvesai'a alpaihakha napaqta'a, apmeio'ok nahan. Koka apnaklhatekhangvakme lhta nhan ma'a apieseksek apkenmaskengvaiakmo enenlhet'avok alhta m'a, aptangkokho lhta nhan apkelveskai'e apkelpasmekha Cristo akvakmo ta 1.000 anio.

Apocalipsis 20:6

¡Aktaqmelakho nkek apkellelto apnaklhatekhangveiakmo apmaniaie! Apkelpokkenammap asongkek ma'a, mellengankek hata mokhom hanet aktaiekho nengetsepma m'a. Etnangkok hata sacerdotes Eniapom Neten apankok kakpota nhan Cristo, etnangkok hata lhemek apkelveskai'e akvakmo 1.000 anio.

Apocalipsis 22:5

Melhek hata pelhasep ma'a, mankaimalhkek hata nhan talha alhankok ma'a kakpota nhan aknem apommatema la'a, ngkanek Eniapom Neten apto apveske hata eniapommetek ma'a. Etnangkok hata nhan apkelveskai'e metka akvaiam annelha aliekaikamok iantelhkapa.

Apocalipsis 3:21

Apkellelto ta apkeliephongveiakmo, altok hata eniakhangkok lheme astanema nak, ko lhta nhan asto asiephongveiakmo, asnek na aptanema nak Tata".