Marcos 9:7 - Nuevo Testamento Toba Maskoy

⁷ Ka akvai'o lhnak na iephopai'a peskeska ankok, apkellengai'o lhnak nema aliatekama aiseksek iephopai'a, lhna ntemak: —Ko'o eietka ham, avanhek ankek askamelaiam, ellasekho ta nhan ketlhengkap —lhna ntemak ania'a m'a.

Marcos 9:7 ပူးပေါင်းရင်းမြစ်များ

Marcos 1:11

Netamen apkellengai'o lhnak enenlhet'avok ma'a nema aliatekama aniemai'o neten, lhna ntemak hengke'e: —Lheiap eietka askamelaiam, apaiesekha mota evalhok —lhna ntemak ma'a nema aliatekama.

Marcos 9:6

Lhnak aptemak Pedro nkanek apiengvaktengkek nak ma'a, nnavek nak na m'a apketlhelhma'ak.

Marcos 9:8

Kolhvavek ankek nak apkelletsepanei'ak Elias kakpota nhan Moises annenga lhnak ma'a. Mang nak elvetai'ak mokhom ma'a, vanlha lhnak apkaimommakpo Jesús.

Lucas 3:22

apvaiventamo lhnak Espíritu Santo takhaplhet ma'a. Malha konemmaktek na ntemak, aklengammalhko lhnak nema aliatekama neten, lhna ntemak heng: —Lheiap eietka askamelaiam, apaiesakhek evalhok lheiap —lhna ntemak nema aliatekama.

Juan 1:34

Koka asvet'o lhta ko'o m'a, alheno nhan apto Eniapom Neten Apketka m'a —lhta aptak Juan ma'a.

Juan 1:49

Niemaskangkek nak apvalho'ok Natanael aplengai'o m'a, lhnak aptemak apkanemo: —¡Hengetlhekmoskama, lheiap apto Eniapom Neten Apketka, apto nhan apiav'akha apveske Israel! —lhna aptemak.

Juan 12:28

¡Eniapom, elvetaskes enenlhet'avok anak akietnema apmopvana lheiap! —lhta aptak. Kolhvavek anke lhta nlengalhka nema aliatekama aniem'o neten, lhta ntak: —Askelvetaskeskangkek asmopvana, alvetaskesek hata mokhom —lhta ntak nema aliatekama.

Juan 19:7

Koka apkellatemmoma lhta apkelemhama apmaniaie judios, lhta aptangkok: —Nietnek ennengko'o lhema ley aklheianma ntasek ematong ngkanek aplhenakpe lhta apanke apto Eniapom Neten apketka ham —lhta aptangkok.

Juan 20:31

Koka aklhamakho qaselha akietno vakkahak anak, nema aktalheskama kakpota meliaskamek hata ketlhengkap Jesús apto Cristo Eniapom Neten apketka, hata nkoniema' aliennaktema apnenio'ok mankotnengvaianlha nnelha ketlhengkap ma'a aniem'o apvesai'a m'a.

Juan 5:18

Apkellavke lhta apkelemhama apmaniaie judios ma'a, apkenmak'ave lhta ennapok Jesús ngkanek apmakmeiangka aknem sabado nennekhelha, aplhenakpe lhta nha apankek apto Eniapom Neten apketka, apnemo nhan Eniapom Neten.

Juan 5:37

Eniapom na helheianma ko'o astema asiamolhma, ketlhengkap koka mamma nkek apkellengai'a aptakha apaivoma m'a, melvetai'ak na napa'at ma'a.

Juan 6:69

Mangeliaskeiakmok na ennengko'o lheiap, neliavek na apto apokkanma Eniapom Neten lheiap —lhta aptak Pedro.

Juan 9:35

Apleng'a alhta Jesús nema aktepkeskama enenlhet aptaqmalveiam alhta apkaqnekhelha judios, apvetakhe lhta nhan m'a, ka apkenmalhnengka lhta, lhta aptak apkano: —¿Mai'e ei'askakmok lheiap Enenlhet Apketka nak, he? —lhta aptak.

Hechos 1:9

Apkelvetai'o lhnak akpelapkeskama nkek nema akiantemekha neten Jesús ma'a akvakho lhna ntemak allapakho iephopai'a m'a. Nkelpelapkeskangkek nak na apkelenteiapvei'o apqanet enenlhet napaqtavek ma'a, apkenmopai'a lhnak apkelentalhnema m'a, lhna aptaiangkok:

Hechos 7:37

Koka m'a Moises lhnak nanek aptemak apkellanemo Israelitas: "Eniapom Neten hata etepkesek lhema aphapak enenlhet apieseksek anak apkelialheng'a ketlhengkap kakpota etnek apkeltennaskamo ania'a apanko'ok, ka stonak ko'o", lhnak aptemak.

Hechos 8:36

Apketlhengangkek nak mokhom, apkelvetangvekho lhnak akietnemakha iemmen, lhna aptemak apkanemo enenlhet nema alhakkeskama appopok Felipe: —Ka iemmen hengke'e, ¿ntase nlho helavkesek konne iemmen, he? —lhna aptemak.

Hebreos 2:1

Nietnengkek nak nek akientalhnema henganemakha Eniapom Neten apkellaiangko lhnak nanek ángeles kakpota ellangkongvomok ma'a enenlhet'avok. Allelietaskesekho lhnak nanek na aliaqmongkaskesekha apkeltemakha apkellelto la meleliehekho kanhan apkellanekamok la qaselha ngkollatsekama. Ka nkeniemai'ak nkaimelhkek angeltakmelkaso nellailhemo ania'a nak nengelvongkasemmalhka nak tep ngkanek Apveske apankek aplheianma m'a, antakmelkesek nahan kakpota mangel·haivek malha amai la aktaqmanma ngkanek na ennengko'o angetlhevangkok hatelha nhan nema akiaqmongkasekha' mangeliahakho la'a. Hai', apmanie panke lhta aplheianma Apveske ania'a nengelvongkasemmalhka tep, apkellelto lhta nhan apmaniaie apkellengai'a m'a ania'a nak, hengelleltennasakho nhan ennengko'o nenvanlha nak aktema iokhalhmek ankek ma'a ania'a nak.

2 Pedro 1:17

Neksa nellengai'a lhta apaivoma Eniapom Neten apto eniapma'ak, neksa lhta nhan apommatema neten akvaivantamo lhta nhan apaivoma, ai'o lhta m'a, aktemeskeskamo lhta nhan akiavai'a nkek apvesai'a Jesús, lhta ntak: «Ka eietka ham askamelaiam, apto nhan askeliekieskama ko'o», lhta ntak ma'a.

1 Juan 5:20

Nengeliavek na apvai'o lhta Eniapom Neten Apketka, hengellangkongvai'o lhta nhan aknema nengeliamo kakpota angeliekpelkangvomok ma'a apto have niapak anke nak niapom, nelpasmekhek na ennengko'o m'a aniem'o apketka Jesucristo. Koka apto Eniapom Neten, apto nha niapom have niapak anke, hengaikamok na akiennaktema enneniek nkotnengvaianlha nnelha.

Apocalipsis 1:7

Elhiemok hata Cristo aiseksek iephopai'a, etakpok hata lhmankek ham, elvetak hata nhan apkellelto lhta apkeliaqlhai'a akvakmo akteiapvakmo nepketama napokha, lhamakho apkellavakha lhmankek ham eliapqalhek hata aniem'o m'a. Hai', hata ngkotnek ma'a. Amen.