Hechos 13:52 - Nuevo Testamento Toba Maskoy

⁵² Koka neptamna'ak nema altamesaikamok ma'a akieto Antioquia nkelpaihekhek nak apvalho'ok kakpota nhan apkellaneiangkek nak apvalhok Espíritu Santo m'a.

Hechos 13:52 ပူးပေါင်းရင်းမြစ်များ

Hechos 11:29

Netamen nema altamesaikamok akieto Antioquia atlheianvekho lhnak apvalho'ok moklhem'a apkelleltakha la elpasmok kakpota ellapaskesek alpasmoma apkelialheng'a ko Judea.

Hechos 2:4

Apkelapvei'o lhnak na aplhamakho Espíritu Santo m'a, ka ampai'akha lhnak apkelpaqmetekama mo'ok apkelpaqmeiasma aniem'o m'a Espíritu.

Hechos 2:46

Lhamakho knem nak apkaqnekha mota akieto Eniapom Neten apnemakha m'a, kakpota nhan apkelpasmekho m'a apkakhaiangkelha nentoma aktaqmanma. Aptaveikokho nhan nentoma nkek akieplomo alpaihekha apvalho'ok ma'a kakpota nhan allakhaiangka apvalho'ok.

Hechos 4:31

Ka akvaiakmo lhnak nnelha apkelelmalhnongkoma m'a, akievheiangka lhnak akietemelha apkaqnekhelha m'a, apkellapvai'o lhnak Espíritu Santo aplhamakho m'a, apkelteniaiavek nak na apiempeiok apketlheianma Eniapom Neten apaivoma m'a.

Hechos 5:41

Ka apkellenteiapmo lhnak nema alapaskamo napaqtave apkelientalhnakha apkelveskaie, nkelpaihekhek nak apvalho'ok ngkanek apkellengaiangkek nak akmaska aniem'o apketlheianma Apvesai'a m'a.

Romanos 14:17

Koka akieto nak aptemakha apveske Eniapom Neten, mamma nema hengaskama m'a aktemakha anto'ok, kanhan neniama. Koka m'a akto neten ankek akiaspommalhka anteniangkok nentaikamok nelpeivomo, altaqmelaikama engvalho'ok kakpota nhan akpaihekha engvalho'ok aniem'o Espíritu Santo.

Romanos 15:13

Hai, Eniapom Neten apto niapom al·halhnekama engvalho'ok angvetak aktaqmanma, ellangkok hata alpaihekha apvalho'ok kakpota nhan altaqmelaikama apvalho'ok apkellelto nak meliaskeiam apvesai'a m'a, ellaneskasangkok hata nhan apvalho'ok alel·halhnekama elvetak hata aktaqmanma aniem'o Espíritu Santo apmopvana.

Romanos 5:3

Nkelpaihakhek na engelvalho'ok ngkanek ntepkaskek na nenvaskapekho neksa akvai'a la akientalhnema.

2 Corintios 8:2

Avanhe lhta apkellengaiangko niekhe m'a, koka nkakhemave lhtoka m'a nheklhe lhta alpaihekha apvalho'ok ma'a, niekhe aptaikamok metka qaselha apanko'ok, apkellankesaikokhek koka patakkom metka apkenmeiavkesammakpo apkellapaskeskamo Jesucristo apkennemolhema m'a.

Galatas 5:22

Koka qaselha aptepkeskama Espíritu alvesai'a nengasekhai'o, akpaihekha engvalhok, aktaqmelaikama engvalhok, have nav'a envahek nelloma, antangkok akmomhape engvalhok, neniamolhma, mongiaskeiam,

1 Tesalonicenses 1:6

Apketlhengkeskangkek ketlhengkap hengelvanekamo nentaiangkolha ennengko'o kakpota nhan aptemakha lhta Apveske, avanhe lhta niekhe apkellengaiangko akientalhnema ketlhengkap ham, nkaqho lhtoka apkenmaiangkek takha ania'a aktaqmanma akieplomo alpaihekha apvalho'ok aniem'o Espíritu Santo m'a.

Santiago 1:2

Ketlhengkap elialheng'a, nkolpaihekha ta apvalho'ok neksa akvai'a la akientalhnema koka akmahai'a nkoiepkonek

1 Pedro 4:13

Kolpaihekha toka mota apvalho'ok apkelvet'o la apkellengaiangko, ka aktemo lhta nhan Cristo m'a, netamen nkolpaihekhak hata nhan apvalho'ok apkelhiakmo ta m'a akieplomo akiavai'a apientalhnemo.