Filipenses 2:7 - Nuevo Testamento Toba Maskoy

⁷ malha lhta nhan aptemak apkel·hatsoskama la apvalhok qaselha apmopvana ma'a, aptemeskesammakpo lhta nhan malha nema asennaikama nema apianmoma, aptaiekho lhta nhan enenlhet apankek ma'a.

Filipenses 2:7 ပူးပေါင်းရင်းမြစ်များ

Marcos 9:12

Ka apkellatemmoiangka lhnak Jesús ma'a, lhna aptemak: —Hai, have niapak evak hata apmanie m'a Elias kakpota elanekhak lhamakho qaselha m'a. Nietnengkek na aktalhesammalhka m'a vakkahak Eniapom Neten apaivoma avanhek hata nhan ngkotnek aplengaiangko akientalhnema m'a Enenlhet Apketka m'a, ngkolhek hata aktaknevangka nhan ma'a.

Lucas 22:27

Apieseksek la enenlhet'avok apto apnema nak nekha asota apto nhan neten apankek ma'a, koka apto la nema annengkasekama nak koneng apankek ma'a, ko'o koka hellasennama mota ketlhengkap.

Juan 1:14

Apaivoma nak aktaiekho lhnak enenlhet apanke, apnengke lhta nhan nenieseksa ennengko'o m'a. Nelvetai'a lhta nhan apmopvana ka nhan apientalhnemo ngkanek apto lhta vanlha lhema Eniapom Neten Apketka m'a, akiavai'a nke lhta hengamelaiakmo kanhan akto iokhalhmek ankek ma'a.

Romanos 1:3

Ka ania'a aktaqmanma nak aplhenammap ma'a apketka Jesucristo, apto nhan Apveske enganko'ok, aptaiekho lhnak enenlhet apankek ma'a, apto nhan aptaven neptamen apveske David annenga. Apketsepke lhta m'a Jesucristo, netamen aplhatekhaskeiakmo aniem'o apmopvana Espíritu Santo. Apkelpeivesekho lhta nhan ma'a enenlhet'avok apto have niapak anke Eniapom neten apketka m'a.

Romanos 15:3

Ka aptemakha lhta mota Cristo meteniai'ak ngkolhek akiaspengka apankok apanke, ka aktemo nak aktalhesammalhka Vakkahak Eniapom Neten apaivoma hengke'e: «Nteiakme lhta tekhelhet ko'o aptaqnommap lheiap»

Romanos 15:8

Asmak'ak aleltennaksek ketlhengkap lhema qaselha, apvai'a lhta Cristo kakpota etnek apkellasennaikama apkellelto nak apkelieplavkeskama aliaqtemenammalhka nekhatko'ok apkellammelhakha. Apieplavkeskamo nhan aptemakha lhnak nanek apeneskamo apaivoma Eniapom Neten aplheianma apkeleltennaskamo nelieihengka'a kakpota elvetaskesek na iokhalhmek ankek aplheianmo lhnak nanek Eniapom Neten.

Romanos 8:3

Ley anak Moises mmahai'a lhta niekhe hengelvongkesek tep, ma lhtoka nkomovanak ma'a aniem'o ennengko'o mangeleliehekho m'a, aniem'o mongeliennaktema. Ka nkeniemai'ak Eniapom Neten eniapaksek apketka aptemeskasekho enenlhet apanke. Aptemengvai'o nhan meiennaktema m'a kakpota enietsepok hengeliaqmoiekha ennengko'o, niekhe aptemongvai'a enenlhet apanke, meiennaktema nhan, nkaqhok koka ntevaskangkek ngkollatsekama nak.

2 Corintios 13:4

Malha lhta niekhe meiennaktema la neksa nema aliaqlhaklhema apmeio'ok apmanko'ok neten iamet aktenneskama m'a, kolhva koka aploka mokhom aniem'o Eniapom Neten apmopvana. Ennengko'o nhan malha mongeliennaktema la'a ka aktemo lhta nhan Cristo, koka nelpasmekhak Cristo nkeniemai'ak neliennaktema nak, hata angenmama nenmopvanka'a kakpota eltaqmelkeskesek apkellangiemhaikama ketlhengkap ham.

2 Corintios 8:9

Apkeliavek na ketlhengkap aptemakha lhta Cristo, malha aknema apketsekama lhta m'a, koka aptemongvai'ak hengke'e metka apketsekama aniem'o apkellamelaiam ketlhengkap, kakpota eltemeskeskak na ketlhengkap malha nema apkelletsekama la'a.

Galatas 4:4

Koka nietemavek akvai'o aknem Eniapom Neten aplheianmakha, apkapaskamo apketka apanke', malha lhta aptemak enenlhet apankek apteiaiakmo m'a, neksa alhta nhan akientalhnema ley.

Filipenses 2:6

niekhe apnemo lhta Eniapom Neten ma'a, koka ma lhta epathetmak qaselha altaqmelo m'a neten, apieniekhe lhtoka m'a,

Hebreos 12:2

Ntasek antangkok malha nengammelhmo apnakha Jesús apto hengellaikamok nentaikamok mongeliaskeiam ma'a, apto nhan apsavheskeskaiakmo akvanekamok mongiaskeiam anak. Apvaskapme lhta m'a neksa akientalhnema neten iamet aktenneskama, niekhe qaselha henmankaskama m'a, koka apvaskapme lhta aniem'o nietnek akietnaikama apaqtek akpaihekha ta apvalhok apmanie, netamen koka m'a apnekho napokha akiennakha aptanema Eniapom Neten.

Hebreos 13:3

Elpasem hata nhan aplhatmommap anak kakpota nhan metka nak ngkolhek altakmelkaso, ketlhengkap hatelha nhan ngkotnek ma'a.

Hebreos 4:15

Ka apiav'akha sacerdote nak ma'a apvankek elietnahok nengaqta'a ennengko'o neksa mongeliennaktema la'a, ngkanek apvetai'a lhta apmanie akiepkonma m'a, nnavek ennengko'o kolhvave nak, koka m'a melanai'ak qaselha ngkolatsekama la m'a.