Filipenses 2:17 - Nuevo Testamento Toba Maskoy

¹⁷ Meliaskeiam anak ketlhengkap malha niekhe ntak akmatnama nak nentoskama nengaikamok Eniapom Neten, ka asketsepo la ko'o neksa helasennaikama ketlhengkap, ema ehenkok malha ntakhak nema aliangkenaikama nak takhalhet qaselha nema akmeskama Eniapom Neten, hata akto ta askaniemhaikama m'a nkaqhok hato ka ngkotnek ma'a nkopaihekhok ankek hata evalhok lhemek ketlhengkap ma'a.

Filipenses 2:17 ပူးပေါင်းရင်းမြစ်များ

Hechos 20:24

Koka mamma aptaikama evalhok angvetsepok kelhaha, askeltavek ko'o asavhok asmakmekama malha askelpaivasemmalhka aptakha lhta apaivoma Apveske Jesús heiano akieplomo akpaihekha evalhok, apkeltemo lhta apaiaksek ania'a aktaqmanma aplhenammap hengellamelaiam Eniapom Neten.

Hechos 21:13

Koka lhta aptak Pablo hengellatemmongka: —Mollaiose nke apvalho'ok ketlhengkap, meliapqalh ankek nahan, aniakha ta ko'o Jerusalen niekhe astetemmalhka ta m'a, niekhe nhan asmatnama ta aniem'o apvesai'a Apveske Jesús —lhta aptak hengellano m'a.

Romanos 12:1

Ketlhengkap elialheng'a, avanhek ankek apkeltakmelkeskeskama apkellangiemhaikama Eniapom Neten, ka ngkanek ntasek etnangkok malha apkennapekamok anak apnaqtoskama apkellaikamo na mota Eniapom Neten. Koka apkeliokha nak ketlhengkap akieplomo malha aphalhnanko'ok, metka aktemongveiakmo lhma nhan, nkolekkasama nhan apvalhok Eniapom Neten ma'a. Koka akto akietemo nkek eliavenkaskesama Apvesai'a m'a.

Romanos 15:16

kakpota atnek heiasennaikama Cristo Jesús. Apaiaksek na ania'a aktaqmanma apieseksek ma'a metnangko nak judios kakpota nhan eltangkok apkelpokkanma Eniapom Neten, malha qaselha nengaikamok anak apiaspongkomakha la Eniapom Neten, aniem'o Espíritu Santo.

2 Corintios 12:15

Nnavek na ko'o ntasek ankek aietepok lhamakho qaselha ehenkok anak kakpota nkoltaqmelkeskesek apkellangiemhaikama ketlhengkap, ntasek na nkovaiventak asmakmose aniem'o hellasennaikama ketlhengkap. Niekhe akvanekamok askellasekhai'o ketlhengkap, aselhtek koka nhan hellasekhai'o ketlhengkap.

2 Corintios 4:12

Kelha niekhe antekio'ok ma'a nenmeiakho la apieseksek anak ketlhengkap angelpaieskakhak ania'a aktaqmanma, nkaqhok koka angenmeianta kakpota etlhevangkok ketlhengkap akiennaktema enneniek mankotnengvaianlha nnelha.

2 Corintios 6:10

Malha anmaiosak'a engelvalho'ok hengeltemeskeskamak ma'a, koka avanhek ankek alpaihekha engelvalho'ok. Lhamakho aknem nellaniemhaikama metka qaselha engankok, koka nkaqhok nelpasmongkek enenlhet'avok kakpota etlhevangkok akiavai'a malha aknema apkelletsekama la'a aniem'o ania'a aktaqmanma nelpaieskama. Malha nhan nentaiangkok enenlhet la metka apkelletsekama, koka nnaiangkek niekhe qaselha alaimommalhkelha la'a ennengko'o.

2 Corintios 7:4

Iokhalhmek ankek alheianma nak avanhek ankek ammalhko evalhok askellan'o ketlhengkap ammelhanto evalhok ham. Niekhe nellengaiangko akiavai'a akientalhnema, avanhek ankek koka nhan asvaskapekho kanhan akpaihekha evalhok.

Filipenses 1:20

Hai', nkel·halhnema evalhok manghenmangkaksek hata enenlhet'avok, have niapak ankek, elvetak hata aplhamakho akietnema asmopvana aniem'o Cristo, niekhe astema ehalhnankok mokhom nlho ka la angvetsepok hatelhaha.

Filipenses 2:18

Hai, eltaqmelkaso ta apvalho'ok ketlhengkap astemakha nak ko'o.

Filipenses 2:30

Niekhe atlhengkeskama lhta enietsepok aniem'o apieplavkeskama apkanemakha Cristo, nketlhengkaske lhta nhan enietsepok aniem'o hepasmoma ko'o ngkanek taiepek apkakhaiangkelha ketlhengkap mankollapvankek elpasengvatak hengke'e.

Filipenses 4:18

Alhevangvaktek qaselha hellapaskeskama ketlhengkap apsenta koka Epafrodito hengke'e, heiekangvakme', nlekama nhan evalhok malha nta kto nak akmases la aimes nema akmeskama nak Eniapom Neten kakpota nkolkama nhan apvalhok ma'a.

Colosenses 1:24

Mpaihakhek ko evalhok aklengangko akmaska asiokha nak aniem'o hellasennaikama ketlhengkap, ngkanek asavhok hata aktemakha lhta aplengaiangko Cristo aniem'o nkotaqmelekha ta iglesia, ngkanek malha Cristo apiokha ntak ma'a iglesia.

1 Tesalonicenses 2:8

Avanhek anke lhta nellamelaiam ketlhengkap, nellankongvaiakmo ania'a aktaqmanma, niekhe lhta atlhenkeskama angelletsepok aniem'o hengellasennaikama ketlhengkap. ¡Ka m'a avanhek anke lhta aknaikamok nengellamelaiam ketlhengkap ma'a!

2 Timoteo 4:6

Ko'o koka ketsek nkaimelhkak asketsepmakha, atnek hata kto nak malha nentoskama nak apmatnama nengaikamok la Eniapom Neten,

1 Pedro 2:5

Ketlhengkap na malha apkellelto metaimong aliennaktema kakpota enmama Eniapom Neten elanak na lhema pa'at akiavai'a nemakha' la alletsevaskesaiangkolha apvesai'a m'a aniem'o nhan apvalho'ok ma'a. Ketlhengkap na apkellelto sacerdotes apkelpokkenammap kakpota ellangkok malha qaselha nengaikamok anak aniem'o apvalho'ok anak, akleklemelha la apvalhok Eniapom Neten, apvanka'ak etnangkok ketlhengkap ma'a aniem'o m'a Jesucristo.

1 Juan 3:16

Hengelvetaskaske lhta Jesús nentemakha nengasekhai'o emmo'ok neksa apketsepma lhta m'a henianmoma ennengko'o, ntasek na ennengko'o angankoho aklhamakho aimommalhkelha la'a akvakmo nhan nengetsepo akiaqmoiekha m'a emmo'ok.