2 Corintios 11:1 - Nuevo Testamento Toba Maskoy

¹ Elvaskapekho hellanei'o ko mota, niekhe stema malha anema neksa askeliatekama mota. ¡Elvaskapekho ta!

2 Corintios 11:1 ပူးပေါင်းရင်းမြစ်များ

Hechos 18:14

Nietemavek nak apmahai'o eliata Pablo kakpota eniatemmoma aplhenammap, koka gobernador Galion lhna aptema apmanie: —Have akiav'o qaselha ngkolatsekama apkelanai'a enenlhet anak, mankaimelhkak atnek asiekpelkemo. Vanlha apketlhekmosengko mota mok apkelvesai'a kakpota nhan ley apanko'ok apankave nak ketlhengkap judios, ellanekha ta apankavek ketlhengkap, momak'ak ko atnek ma'a —lhna aptemak.

Hechos 26:29

Koka lhna aptemak Pablo apkatemmoiangka: —Nkolkok hata evalhok iakvatakho nlho ka la nhan vangkakho lheiap kanhan aplhamakho enenlhet'avok anak hengke'e apkellelto nak hellailhemo etnangkok na astemakha nak ko'o, koka have m'a akto nak nemo nak helpelhketemo nak cadenas —lhna aptemak Pablo.

1 Corintios 1:21

Mankollapvankek enenlhet'avok eliekpelkok Eniapom Neten aniem'o apanko'ok apankave nak apkeliangveiakmo, koka apiangveiakmo nak Eniapom Neten nkeltavek nkolvongkesek tep aniem'o nhan ania'a apanko nak, apkeleltaiangko nak enenlhet'avok taikama nkek ma'a.

1 Corintios 3:18

Apno la apieseksek ketlhengkap apkanema la nkoietnak apiangveiakmo apankok apanke', apiennengkasekpe pankek na m'a enenlhet anak, ntasek eihangvakhok apankok apanke apto meihangveiakmo, netamen hata m'a nkovak aptema apiangveiakmo m'a.

1 Corintios 4:10

Netlhenalhkek na ennengko'o metka enqatko'ok aniem'o nellasennaikama Cristo, ketlhengkap koka apkeltemeskaskek Cristo nema apkeliamo. Netlhenalhkek na ennengko'o nengelelto mongeliennaktema, ketlhengkap koka apkeliennaktema. Manghengellak'ok na enenlhet'avok, ketlhengkap koka apkellak'ok ma'a.

1 Corintios 4:8

Nketlhenke mota apvalho'ok ketlhengkap apkellelto ngkeskama qaselha apanko'ok, mankaimommalhka qaselhaha nhan, nketlhenkek na apvalho'ok malha apkeliav'akha apkelveskai'e la'a, malha mongelaimelhkak na ennengko'o angelpasmok ma'a. Ntasek hatelha m'a etnangkok apkeliav'akha apkelveskai'e ketlhengkap kakpota antangkok ennengko'o lha malha apkelveskai'e nentemo lhemek la'a.

2 Corintios 11:19

Apkellanek ketlhengkap nema apkeliamo apankavek, koka apkelvaskapak apkellan'o enenlhet'avok anak malha alanema.

2 Corintios 11:21

Smangkakkek ko'o asmak'o alhenek kolhvave nak, ennengko'o nlho lhta nhan ntase lhta niekhe antangkok angellanhok aptaiangkolha nak ma'a. Apkelammakpek ma'a aniem'o apkenmakmekama lhta apieseksek anak ketlhengkap, ko'o ta nhan nkalhkok evalhok niekhe heleltaikamok malha anema.

2 Corintios 11:4

Asleng'a lhta nhan ko'o ania'a ketlhengkap apkenmaiangko lhna lhta takha alleklemo nkek apvalho'ok nema aleltennaskama ania'a mok aktemakha koka netlheianmo na mota apvesai'a Jesús. Hai, apkenmaiangko lhna lhta takha ania'a mok aktemakha nkek ania'a aktaqmanma, apkenmaiangko lhna lhta nhan takha lhema espíritu, have koka m'a Espíritu apketlhevaiangko lhta sekhe lhta.

2 Corintios 12:11

Astek ko malha la anema aniem'o anmalhko evalhok ehenkok ehenke, have nhan asto neten ehenke, ketlhengkap koka nkelleniemai'ak mankollekkasekama apvalho'ok hellanhoho, ka nkeniemai'ak na nkalhkok evalhok ehenkok ehenkek aniem'o asmakmekama apieseksek anak ketlhengkap. Snavek na ko'o m'a nema allapaskamo lhta apkellelto lhta neten apankavek apkenmakmeiangka lhta nhan apieseksek anak ketlhengkap.

2 Corintios 5:13

Malha lhnak ennengko'o alanema lhna aptaiangkok enenlhet hengetlheianmo aniem'o nhan hengellasennaikama Eniapom Neten, have koka niekhe ennengko'o alanema, vanlha koka nenmahai'o angeltakmelkeskesek apkellangiemhaikama ketlhengkap ham.

Hebreos 5:2

Ka apiav'akha nak sacerdote meienna'ak ma'a ngkanek enenlhet apankek ma'a, apvankek koka nhan elietnahok napaqta'a enenlhet'avok la meliangveiakmo kanhan malha apketlheneiam anak.