1 Corintios 8:6 - Nuevo Testamento Toba Maskoy

⁶ Koka neliavek ennengko'o vanlha lhema aphapak Eniapom Neten, apto nhan apkelentepkeskama lhamakho qaselha alhma nkek ham, nelloka nhan ennengko'o aniem'o apmopvana m'a. Neliavek na apnek lhema Apveske engankok apvesai'a Jesucristo, apto apmaikama Eniapom Neten apkellanei'o lhamakho qaselha alhma nkek ham, ennengko'o nhan,

1 Corintios 8:6 ပူးပေါင်းရင်းမြစ်များ

Juan 1:10

Nnengkek nak nanek tep nak nanek hengke'e nalhepop anak, nkelanei'ak nak nanek lhamakho qaselha nalhepop anak aniem'o Eniapom Neten apmaikama m'a, koka menmaiangkok na takha enenlhet'avok lhmankek ham.

Juan 1:3

Apkellanei'akhasekha lhnak na nek lhamakho qaselha Eniapom Neten apmaikama lhnak ma'a Apaivoma kakpota elanak na m'a. Man nak elanai'a qaselha Eniapom Neten metko nlho apmaikama Apaivoma nak ma'a.

Juan 10:30

Ko'o kanhan Eniapom anak enlhema ennengko'o m'a —lhta aptak Jesús.

Juan 13:13

Ketlhengkap heleltangke mota apveske kakpota nhan hengetlhekmoskama, nietave niekhe ko'o m'a.

Juan 14:20

Netamen akvakmo ta aknem asvaktamo mokhom hengke'e, eliangvakhok hata ketlhengkap ko'o kakpota nhan Tata nelelto enlhema, ko'o kakpota nhan ketlhengkap nelpasmommalhko m'a.

Juan 17:3

Etlhevangkok hata aliennaktema apnenio'ok aniem'o apkeliekpelkangveiam lheiap apto lhema aphapak aknema apmopvana, apkeliekpelkangveiam na Jesucristo apto lhta apkapaskama lheiap.

Juan 20:17

koka Jesús lhna lhta aptemak apkanemo: —Mma', manghemangva', movakhak mokhom ko'o apnakha Tata. Koniakha koka koleltennaskakha askeltamesaikamok alhta, aniakhak hata apnakha Tata, ka Apiapma'ak na m'a, Eniapom Neten ehenkok, Eniapom Neten apanko'ok na m'a —lhna lhta aptemak.

Hechos 17:28

hengellangkek apmopvana kakpota anlokaha. Lhta aptemak na lhema enenlhet apmopvana eltennama iokhalhma nak hengke'e: "Ennengko'o nengelelto Eniapom Neten apketkak", lhta aptemak.

Hechos 2:36

Ellailhono enenlhet ko Israel, have niapak anke ketlhengkap apkeliaqlhaiangke lhta apmeiok apmankok neten iamet aktenneskama Jesús alhta, Eniapom Neten alhto ka aptemeskasak Apveske kanhan Cristo —lhna aptemak Pedro apkellanemo enenlhet'avok ma'a.

Hechos 5:31

Ka nhan aptemeskeskamo apto neten apankek ma'a, apneskekho nhan akieto akiennakha apoktong, kakpota nhan etneskesek apto Aplaqlekama niapom kakpota nhan Elvongkesek tep enenlhet'avok ko Israel. Kakpota eliaqmongkasekhak na mo'ok apvalho'ok, etneskesama apankek na meleliehekho apkellaskamakha m'a.

Romanos 11:36

Nkanek Eniapom Neten apto apkellanai'a lhamakho qaselha lhmankek ham, apanko'ok apankavek ma'a, apkellaikamok na aliennaktema m'a qaselha lhta apkelentepkeskama kakpota nkollokaha. Hai', ntasek ma'a ngkolhek aktakneskasengko apvesai'a lhma nkek ham. Amen.

1 Corintios 1:2

Nketlhenkek engelvalho'ok apkellelto iglesia apankok Eniapom Neten apkakhangko ham Corinto. Apkellelto nak nema alpokkanma kakpota elpasmekhak Cristo Jesús, etnangkok na Eniapom Neten apkennemolhema. Apkelpasmekha nhan aplhamakho lhmankek ham apkeltakneskasekamok na apvesai'a Jesucristo, apto apveske apanko'ok kakpota nhan apveske engankok ennengko'o.

1 Corintios 12:3

Ka nkeniemak ma'a askelelto nak eliohok ketlhengkap enenlhet apto la apietnema apmopvana Espíritu apankok Eniapom Neten, mankapvankek na eihemetkesek apvesai'a Jesús. Vanlha koka apvankek enenlhet elhenek Jesús apto Apveske koka aniem'o m'a apmopvana Espíritu Santo

1 Corintios 6:13

Ka aptaiangkok na apketlheianma enenlhet'avok: —Nentoma ankok ankek envakmo, kakpota nhan envakmo' ankok ankek nentoma —ka aptaiangko mota m'a. Koka Eniapom Neten hato ka enaqtevasekhak ma'a hanet anak. Koka neniokha nak have antek ankok nenmensangveiam alhma', koka neniokha nak ankok ma'a Apveske, kanhan Apveske apankok neniokha nak.

1 Corintios 8:4

Ka aktemakha nak meleltammakpelha nak nlho ka la nhan ntase etavangkok apnaqtoskama apkennapekamok apkellaikamok anak qaselha akiokha alanemmalhka, neliavek ennengko'o qaselha akiokha nak mamma aniemhaikama m'a, mankolhenek nahan. Vanlha koka lhema aphapak apto Apveske, Eniapom Neten apvesai'a m'a.

Efesios 1:3

Asiavenkaskesama mota apvesai'a Eniapom Neten apto Apiapom Apveske engankok Jesucristo, ngkanek apkellaiangko ngkeskama qaselha altaqmelo aniem'o Espíritu aniem'o nhan neten kakpota hengeltaqmelkeskesek engvalho'ok aniem'o nelpasmekha mota Cristo.

Efesios 3:14

Ka nkeniemai'ak ma'a askelteklheklhemo ko'o etapno'ok nalhepop napaqtek Eniapom,

Colosenses 1:6

akvai'o sekha lhta. Ka ania'a nak mpaihakhek aklengammalhka halhmankek ham, aliaqmongkaskesekho nhan mo'ok apvalho'ok enenlhet'avok apkellelto la apkellengai'a, ka aktaiangko lhta nhan ketlhengkap ma'a aliaqmongkaskesekho mo'ok apvalho'ok neksa apkenmaikamo lhta takha aktaqmanma nke nak apkellanei'o Eniapom Neten, kakpota nhan akto have niapak anke nak.

1 Pedro 1:21

Eniapom Neten aplhatekhaskeiam Cristo, aptemeskeskamo nhan neten apankek ma'a, ka meliaskeiakmo nhan ketlhengkap Eniapom Neten aniem'o nhan apkeltemeskeskama Cristo, nnankek na alel·halhnekama apvalho'ok eltaqmelkeskeskamok hata apkellangiemhaikama m'a Eniapom Neten.

Apocalipsis 1:18

Asto ehalhnankok, asketsepme lhta ko'o sekhe lhta, kolhva koka astakhek ehalhnankok metka akvaiam annelha ta aliekaikamok iantelhkapa, nietnek na llave ankok ngkolatsenkolha apkeletsepma.