1 Corintios 5:11 - Nuevo Testamento Toba Maskoy

¹¹ Lhtoka niekhe asketlhenak ma'a melpasmekhek apkellelto nak apketlhenammakpo apankavek aptaikamok Jesucristo apkennemolhema meliamolhma nak, apkellanaktema, apkenmasmo qaselha apankok, apkeltakneskasekamok qaselha akiokha alanemmalhka, nema aliematkeskama, anmen ato'ok, apkenmenielhma, ka enenlhet'avok anak ma'a melpasem ankek aptekamok ketlhengkap.

1 Corintios 5:11 ပူးပေါင်းရင်းမြစ်များ

Lucas 18:11

Apkenmekhek nak neten fariseo, lhna aptemak apkenmalhnonkoma m'a: "Eniapom neten, avanhek astema gracias lheiap ngkanek have stonak ko'o po'ok enenlhet meliamolhma nak. Mamma asmenielhma, have nhan asto mopeivomo, mamma nhan astevaskama heliemhapma. Motnema aptemakha nak hengke'e apkenmama nak patakkom impuesto ankok.

Lucas 21:34

Ellaho ta ketlhengkap nkoliennak apvalho'ok aniem'o apkellanekamok ngkollatsekama, apienaikamok anmen kakpota nhan aleltaikama apvalho'ok, ngkanek nkoplapkesek hata akvai'a nnelha aknem alhma nkek ham takhaplhet'ok ketlhengkap. Ka kto nak nel·hanma nak, nkoplapkesek akmama qaselha nevhak.

Hechos 1:15

Lhema knem na ntemak ma'a, apkelpaqmetkeskamo Pedro m'a apkellelto apkelialheng'a m'a, apkaknekhek nak malha 120 enenlhet'avok ma'a, lhna aptemak apkellanemo:

Hechos 9:17

Ka apmeiekho lhnak Ananias apnakha Saulo, apnengkanvekho lhnak apmeiok takhaplhet ma'a, lhnak aptemak apkanemo: —Eialheng Saulo, Apveske Jesús alhta m'a apvetai'o nak lheiap nalhet amai neksa apmeienta nke'e Damasco, ka heiapaskama ko'o hengke'e kakpota etekha lhma lheiap, elanok na apvalhok Espíritu Santo lheiap —lhnak aptemak Ananias apkanemo Saulo.

Romanos 13:13

Koka elloka m'a malha atsak'elha lhma nak, ellanamok qaselha altaqmelo. Melpasengvom ankek melleskama etavangkok aptekamok, melleskama nak einangkok anmen, menmensangvomanke lhma, mellanamo nkek na qaselha ngkollatsekama, metka apkennapommap nahan, metka nhan apiasepkeskaiam qaselha apanko'ok la po'ok.

Romanos 16:17

Ketlhengkap elialheng'a, ellaho ta mota enenlhet'avok anak apkenmahai'a la elhpankesek, apkenmahai'o nak na eliepkonek ham, apkenmahai'a nhan ellammelhek nema atlhekmoskama lhta apketlhevai'a ketlhengkap. ¡Melpalhkama nkoie'!

1 Corintios 10:14

Ka nkanek ma'a elialheng'a askellamelaiam, ntasek enieniangkok ma'a naqtek qaselha akiokha alanemmalhka.

1 Corintios 11:21

Moklhem'a lhnak aptoiangko pekhai'a apkelletsenta aptekamok ma'a, mang nak ellailhemak po'ok ma'a, moklhem'a lhnak nkennapmak mek ham, po'ok nak menieskamak apiamo akvakmo nkeso akieihama lhma.

1 Corintios 6:6

Mangkolatsema apkellammelhammakpo apankavek apieseksek anak ham, netamen tep ankek na ngkolatsekama nkek apkelioiakmo mota hengiekpelkemo niapom metno Jesucristo apnemolhema kakpota enmaskeskesek ma'a.

1 Corintios 6:9

¡Ellaho ta m'a melietehek aptangkolha! Enenlhet la apkeltemengveiakmo lhma metnangkek hata apkennemolhema akieto nak aptemakha Apveske Eniapom Neten, apkellelto la apkellanaktema, apkeltakneskasekamok qaselha akiokha alanemmalhka, apnaqtevaskamo la aliemhapekamok, aptaikamok iama ngkelvana'ak, apkenmekha apkenno lheme', apkenmenielhaikamok, apkenmasmo qaselha apanko'ok, anmen ato'ok, apkeltaknevaikamaha, apkenmopvanka'a eliennengkesek po'ok. Ka lhamakho nak hengke'e metnangkek hata apkennemolhema akieto nak ma'a aptemakha Apveske Eniapom Neten.

1 Corintios 7:12

Kolhva askeltavek aleltennasangkok ania'a ehenkok ehenke', have aniem'o Apveske, lhema enialheng la'a aptava koka akiaskeiam, akleio la av'alhok nkoipetkama mota m'a, ntasek meienievek ma'a.

1 Corintios 7:15

Ka aliemhapma la ngkelvana nkoi'askeiam, atava koka apiaskeiam. Netamen apmak'o la eieniok aptava m'a, apvankek ma'a kakpota mmaskek akno apmangka m'a ngkelvana enialheng ngkanek Eniapom Neten apkeltave nkoloka metka akmaska.

1 Corintios 8:11

Nkotvaksek hata m'a aniem'o apiangveiakmo nak lheiap ma'a. Mangkolatsema nkek ma'a ngkanek apkamelaiam Cristo enenlhet anak.

Galatas 2:12

Aptavokhe lhta Pedro lheme Jesucristo apkennemolhema metnangko nak judios ma'a, koka apkelvateske lhta aptaveikokho lhemek ma'a ngkanek apkelva'a lhta aknaikamo nak nema aliaqtemenkeskama nekhatko'ok apkellammelhakha, apkelapaskama lhta Jacobo, apkak'a alhta songkek Pedro judios aptengiaikamo na mota apkeleltemo nkoiaqtemennalhka nekha atkok apkellammelhakha m'a.

Efesios 5:18

Metnamo nkek na akvakmo alieiesolhma vino ngkanek nkoltemeskesek hata malha metka apkelielhnengvaiam ma'a, ntasek koka elleltok ellanangkok apvalho'ok Espíritu.

Efesios 5:5

Koka apkellelto nak apkenmensangveiam alhma, apkelanai'a qaselha malha akpaiseiam, apvannaikamok na qaselha apanko'ok apteniai'a, apkeltakneskasekamok na qaselha akiokha allanemmalhka', metnangkek hata m'a apkennemolhema akieto nak aptaiangkelha apkelveskai'e Cristo kakpota nhan Eniapom Neten, have niapak anek astakha nak alheianma.

Colosenses 3:5

Ennapekha' ngkollatsekama anmahai'o apvalho'ok, elvatesamok apkenmensangveiam alhma, mellanamok qaselha malha alpaisengkeskama nak apvalho'ok, mellanko nkek nkoliatangkok apvalho'ok allapelhkasekama apnenio'ok ellanangkok qaselha ngkollatsekama, meleliehekho nkek na aliaspongkomakha nak apvalho'ok, metnamo nkek na apkenmeiavkesammakpo qaselhaha ngkanek malha apkeltakneskasekamok qaselha akiokha la alanemmalhka m'a.

2 Tesalonicenses 3:14

Hata apkelvet'o ta po'ok meliehekho vakkahak nennaktalheskeskama nak, meliepetkamankek ma'a kakpota nhan enmankangvomok ma'a.

2 Tesalonicenses 3:6

Ketlhengkap elialheng'a, akieplomo apvesai'a apveske engankok Jesucristo mangeleltok eliepetkangvomok engelialheng'a nentemo lheme nak akhemo nak apkellangiemhaikama metka apkenmakmekama nak kanhan melieplavkeskama netlhekmosekamo lhta.

1 Timoteo 3:3

Have apto nak anmen ato', apkennapommap anak, ntasek koka etnek apiamolhma apanko ie, etenia mota metka akmaska, ntasek na etnek metka apiaspekamok apteniai'a patakkom.

1 Timoteo 6:5

apkeliamenammap anak apieseksek enenlhet'avok anak malha alieihama lhma, meliohok akto have niapak ankek, apketlhenakpave apankek nahan apkellelto meliaskeiam koka apteniangke mota apkennaksepma patakkom apanko'ok apankavek

2 Juan 1:10

Ka apvo'o ta lhema enenlhet ham apsoiam la mo'ok aktemakha hengetlhekmoskama, ¡menmamonkek takha m'a, metnamo nkek na aktaqmanma apvai'a m'a!

Apocalipsis 2:14

Koka mankoleklemo evalhok lheiap ketsek ankek qaselha ngkolatsekama apkelanai'a, apkenmaiangko na mota takha enenlhet apkellelto nak mankonmahai'a elvatesangkok hengetlhekmoskama Balaam annenga. Apiateiangko lhnak nanek m'a apkaiangko apaivoma Balac kakpota eliennengkesek ma'a israelitas, eleltennaksek ania'a ellanak etavangkok apkennapekamok apnaqtoskama apkellaikamok qaselha akiokha alanemmalhka nak ma'a, kakpota nhan nelanaktema.

Apocalipsis 2:20

Koka mankoleklemok evalhok apmamo takha lheiap ngkelvana nak Jezabel, aklhenammalhka nke mota aktema altennasemmalhka ania'a, koka vanlha akteniaikama nkoliennenkesek askellasennaikama nak ko'o, aliateiangko nhan ntasek etavangkok apkennapekamok apnaqtoskama apkellaikamok qaselha akiokha alanemmalhka, kanhan apkellanaktema.

Apocalipsis 21:8

Koka enenlhet la ai'a apvalhok, apiaskeiam, aposkama qaselha, apkaqhema po'ok, apkenmensangveiam alhma, aptema apiolhma melatsekama, apiavenkaskesaikama akvesai'a qaselha akiokha alanemmalhka kakpota nhan apmopvana ania'a, ngkolhek hata akiantemakho akieto m'a sanga akietnemakha alaivomakha talha kanhan azufre, koka akvesai'a m'a hanet aktaiekho nengetsepma —lhta aptak heiano m'a.

Apocalipsis 22:15

Koka melentelhek hata m'a malha aptangko nak semheng, apkellelto nak na apkeliatmekama la apkeliolhma mellatsekama, apkenmensangveiam alhma, ntekioma niapma'ak, kanhan apkellelto nak apkelteklheikamok aptapno'ok naqtek qaselha akiokha alanemmalhka, alleklemo mota nhan apvalho'ok eliennengkesek po'ok.