Yohanes 8:31 - Kaili Ledo

³¹ Naupu haitu, i Yesus nanguli ka toYahudi anu nomparasaya Ia, “Ane komiu maroo mangoseaka tesaKu, komiu mpuu-mpuu topangoseaka Yaku.

Yohanes 8:31 ပူးပေါင်းရင်းမြစ်များ

Matius 24:13

Tapi tona maroo mangoseaka Yaku sampe ri kaupuna, iramo rapakasalama.

Yohanes 1:47

Tempo i Yesus nanggita i Natanael nakava nte Ia, niulikaNa, “Peintamo! Hitumo saito toIsrael mpuu! Ledo ntoto naria katenggona.”

Yohanes 2:2

I Yesus bo anaguruNa muni nigaga hau ri posusa haitu.

Yohanes 6:55

Apa, isi karoKu haitumo kandea mpuu bo raaKu haitumo panginu mpuu.

Yohanes 8:36

Jadi, ane Ana nu Alatala mbotomo mombakabasaka komiu lako ri dosa, makabasaka mpuumo komiu!

Suro-Suro 13:43

Naupu puramo tona nesuvu lako ri banua petupu pangane, nadea toYahudi bo tona ntanina anu nesua agama Yahudi, nomporoa i Paulus bo i Barnabas. Suro-suro haitu nompakaroso rarara ala ira bate-batena manjarumaka kabelo nu Alatala.

Suro-Suro 14:22

Ri ngata-ngata haitu ira nompakaroso rara ntopangoseaka i Yesus bo nompopatora ira nee molengga-lengga momparasaya. Niulira, “Kita kana mombarasai kasusa bo kapari ruru pade mamala kita mombarasai kasana ri Poparenta nu Alatala.”

Suro-Suro 26:22

Tapi sampe sii-sii yaku da nisaliku nu Alatala sampe da namalapa yaku neangga nosabi ka pura-pura tona, tona nalanga panggana bo todea biasa. Anu nitesaku hitu ledo nosisala ante anu niboto i Musa bo nabi-nabi ntanina nggaulu,

Roma 11:22

Jadi lako rahaitu nisanita kabelo rara nu Alatala, bo nisanita Ia nasadia mombahuku. Ia nombahuku topesapuaka, tapi nabelo raraNa nte komiu anu nomparasaya, asaa komiu maroo manjarumaka kabeloNa haitu. Ane ledo, komiu muni rapoaraNa!

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Kolose 1:23

Jadi komiu kana batena momparasaya bo nee molengga-lengga. Nee radekei tona mombabagiu komiu. Nee menonto manjarumaka anu nijanji nu Alatala ka komiu riara Kareba Belo. Kareba Belo haitu niepemiumo bo nipatolele sampe ri njumangu dunia. Bo yaku muni, i Paulus, nianggataka najadi topompatolele Kareba haitu.

1 Timotius 2:15

Tapi naupa ivesia, ane mombine maroo momparasaya i Yesus, mompotove tona ntanina, bo matuvu nte pokainggu nabelo bo masipato, ia rapakasalama tempo moana.

1 Timotius 4:16

Jagaimo pokainggumu bo jagai muni pepatudukimu. Iko kana matutu movia pura-pura anu nipatudukiku ka iko. Apa ane mupovia ivesia, iko mboto rapakasalama bo topangepe pepatudukimu muni rapakasalama.

2 Timotius 3:14

Tapi iko, Timotius, kana bate-batena manggangisi pepatuduki nakana anu nipegurumu bo mpuu-mpuu niparasayamu. Nisanimu tona nompaguru haitu, nipaguruna nakana ka iko.

Ibrani 3:14

Apa kita manggava bagia lako ri pura-pura anu naria nte i Kristus asaa anu niparasayata lako ri pamulana bate-batena raparasayata sampe ri kaupuna bo ledo molengga-lengga.

Ibrani 8:9

Pojanji haitu ledo masimbayu mpo pojanji nipoviaKu nokolu ante totuara nggaulu tempo Yaku nanggeni ira nesuvu lako ri tana Mesir. Ira ledo naroo nangoseaka pojanji haitu. Jadi haitu sampe domo nipeiliKu ira.

Yakobus 1:25

Atura nu Alatala nagana mpuu bo naria kuasana mombakabasaka manusia lako ri dosa. Isema-sema nompariara pakabelo-belo bo batena nangoseaka Atura nu Alatala, bo ledo aga neepe bayangi bo nalinga, iamo radekeika nu Alatala belo riara bara nuapa-nuapa rapoviana.

1 Yohanes 2:19

Bali-bali i Kristus nesuvu lako nte kita, tapi kakanana ira ledo nosangu pomparasaya ante kita. Ane ira mpuu-mpuu nosangu pomparasaya ante kita, natantu ira da mosanggani-nggani ante kita. Tapi nipalaikaramo kita, jadi nisanita ira ledo mpuu nosangu pomparasaya ante kita.

1 Yohanes 2:24

Jadi pariaramo pakabelo-belo pepatuduki niepemiu lako ri pantepuuna pomparasayamiu i Kristus. Ane pepatuduki haitu mpuu-mpuu rapariaraimiu, komiu bate-batena matuvu mosangu rara nte Ana nu Alatala bo Alatala, TuamaNa.

2 Yohanes 1:9

Isema-sema nasalandala lako ri pepatuduki nakana bo ledo nioseakana pepatuduki i Kristus, ia ledo nosangu rara nte Alatala. Tapi isema-sema naroo nangoseaka pepatuduki i Kristus, ia nosangu rara nte Tuamata Alatala bo i Yesus, Ana nu Alatala.