Yohanes 21:22 - Kaili Ledo

²² Nesana i Yesus, “Ane rapana Yaku madota ia matuvu sampe Yaku makava mpanjili ri dunia hitu, haitu ledo paraluu musani. Tapi iko, nee menonto mangoseaka Yaku!”

Yohanes 21:22 ပူးပေါင်းရင်းမြစ်များ

Matius 16:24

Naupu sia pade niulikaNa ana-anaguruNa, “Isema-sema madota mangoseaka Yaku, ia kana mombakabasaka dotana mboto bo mpuu-mpuu mangoseaka Yaku. Ia kana majadi nasimbayu eva tona nanjimbuaka kayu salibna, haitumo, ia kana masadia rapandasa nau ia rapatesi sabana nangoseaka Yaku.

Matius 24:27

Sabana tempo Yaku, Ana nu Manusia, makava mpanjili, kakavaKu malanto rakita ri umba-umba ri dunia, nasimbayu mpo kila novende ri mpandakena bo nevanta sampe ri kasolona.

Matius 24:3

Naupu haitu hau ri Bulu Zaitunmo i Yesus. Tempo Ia da nonturo hamai, ana-anaguruNa nakava motesa nggalino nte Ia. Niulira, “Guru, uli ka kami, maipia majadi pura-pura anu nitesaMiu pangane, bo berimba tandana kakavaMiu bo kaupu nu dunia hitu?”

Matius 24:44

Ivesia muni komiu kana mainga mompopea kakavaKu, apa ledo nisanimiu tempona Yaku, Ana nu Manusia, makava.”

Matius 25:31

“Tempo Yaku, Ana nu Manusia makava mpanjili ri dunia ante reme bo kuasaKu, nosanggani-nggani ante malaeka-malaekaKu, Yaku monturo ri Gadera PoparentaKu mombatangara mpo Magau.

Matius 8:22

Tapi nanguli i Yesus ka ia, “Oseakamo Yaku! Palambakamo tona namate mombatana tona namate.”

Markus 9:1

I Yesus nanguli ka ira, <>

Yohanes 21:19

Ante jalili haitu i Yesus nompopaisani dala nggamate i Petrus bara maipiapa, anu mompopakita kaoge nu Alatala. Naupu haitu nangulimo i Yesus ka i Petrus, “Nee menonto mangoseaka Yaku!”

Yohanes 21:21

Jadi nekutanamo i Petrus, “Pue, nuapa majadi ante roaku moitu?”

1 Korintus 11:26

Apa nggani-nggani komiu mangande roti bo manginu uve anggur hitu, komiu mompatolele kareba kamate i Pue Yesus sampe Ia makava mpanjili ri dunia hitu.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

1 Tesalonika 2:19

Naoge rara kami mosinggava nte komiu, apa ane Tuputa Yesus Kristus meonga mpanjili bo kita mosinggava ri ngayoNa, komiumo majadi asele pokarajaa kami anu nisarumaka kami. Tempo haitu madamba mpuu rara kami sabana komiu, bo masana rara kami sabana pomparasayamiu.

Yakobus 5:7

Sampesuvu-sampesuvuku, komiu kana mosabara sampe makava Tupu. Peintamo posabara ntopotuda, ira nompopea sampe naria vuana nisarumakara. Ira nosabara nompopea uda anu mompakatuvu tuda-tudara.

Yakobus 5:8

Komiu muni kana mosabara bo maroo rara, apa naparamo eo kakava nTupu.

Pompakita 1:7

Peintamo! Ia makava nibungu kulimu. Ia rakita ntona pura-pura, nau ira anu nombatosu usuNa. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!

Pompakita 2:25

Kingisi pakarosomo pepatuduki anu naria nte komiu sampe Yaku makava mpanjili.

Pompakita 22:20

Bo i Yesus anu nompasimbayu pura-pura tesa hitu nanguli, “Nakana! Domo masae makavamo Yaku!” Amin! Maranata! Kakavamo, Pue Yesus!

Pompakita 22:7

Bo nangulimo i Yesus, “Pariaramo! Domo masae makavamo Yaku. Nabelo mpuumo tona nompariara anu niboto ri buku hitu!”

Pompakita 3:11

Domo masae Yaku makava! Jadi kingisi pakarosomo pepatuduki nipatuduki ka komiu ala komiu manggava hadia padagi lako nte Alatala. Nee sampe maria tona mangago hadia haitu lako nte komiu.