Yohanes 20:17 - Kaili Ledo

¹⁷ Nanguli i Yesus ka ia, “Nee rakabe Yaku, apa Yaku dopa neore hau nte TuamaKu. Tapi koimo hau nte sampesuvu-sampesuvuKu bo uli ka ira ivei: ‘Yaku hau nte TuamaKu bo Tuamamiu, haitumo Alatala nisombaKu bo nisombamiu.’ ”

Yohanes 20:17 ပူးပေါင်းရင်းမြစ်များ

Matius 12:50

Apa, isema-sema novia dota nTuamaKu ri suruga, ia haitumo nireke sampesuvuKu bo tinaKu.”

Matius 25:40

Bo Yaku, Magau, mesana, ‘Pariaramo tesaKu hitu! Belo nipoviamiu ka sampesuvu-sampesuvuKu hitu, nau tona naede panggana, haitu nasimbayu mpo belo nipoviamiu ka Yaku.’

Matius 28:7

Bo koimo masalisa ulika ana-anaguruNa natuvu mpanjilimo Ia. Ia mokolu ka komiu hau ri bagia Galilea. Hamai rakitamiu Ia. Toramo anu nitesaku ka komiu!”

Markus 12:26

Berimbamo? Tantu nibacamiu anu nitulisi riara Buku Nabi Musa, tona namatemo matuvu mpanjili. Tora ngena tesa kajadia santungu gumbu navaya tapi ledo napapu. Nau nasaemo kamate i Abraham, i Ishak bo i Yakub, tempo haitu Alatala nanguli ka i Musa,

Markus 16:19

Naupu i Yesus notesa ivesia ka ira, neoremo Ia hau ri suruga bo nonturo ri sabingga nggana nu Alatala.

Lukas 10:4

Nee manggeni doi bara batutu rapomboli baku, bara sapatu ropasa. Nee mokalera gaga ri dala motesa-tesa ka tona.

Yohanes 13:1

Tempo haitu naparamo Eo Mbaso Paskah. Bo nisani i Yesus naparamo gantana rapalaisiNa dunia hitu bo manjili hau nte TuamaNa. Ia mpuu-mpuu nompotove ira anu najadi todeaNa ri dunia bo nipotoveNa sampe ri kaupuna.

Yohanes 13:3

Nisani i Yesus TuamaNa Alatala nombadekei pura-pura kuasa ka Ia. Bo nisaniNa muni Ia nakava lako nte Alatala bo Ia manjili hau nte Alatala.

Yohanes 14:2

Ri banua nTuamaKu naloga ponturo. Yaku hau mompakasadia ponturo ka komiu. Ane ledo ivesia, natantumo Kuuli ka komiu.

Yohanes 14:28

Toramo anu niuliKu pangane, Yaku malai, tapi manjili vai tumai nte komiu. Ane mpuu-mpuu komiu mompotove Yaku, madamba mpuu raramiu sabana Yaku hau manjili nte TuamaKu, anu naogepa pade Yaku.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 16:28

Yaku nakava lako nte TuamaKu tumai ri dunia hitu. Hitupa Kupalaisi dunia hitu bo manjili hau nte TuamaKu.”

Yohanes 17:11

Domo masae Yaku monturo ri dunia hitu. Yaku tou nte Komiu, tapi anaguruKu da monturo ri dunia hitu. O, Tata! Komiu nagasa! Jagaimo ira ante kuasaMiu, haitumo kuasa nidekeiMiu ka Yaku. Jagaimo ira ala ira mosangu rara nasimbayu mpo Yaku nosangu rara nte Komiu.

Yohanes 17:25

O, Tata, Komiu nanoa! Manusia ri dunia hitu ledo nosisani nte Komiu, tapi Yaku nosisani nte Komiu. Bo anaguruKu hitu nisanira Komiu nantudu Yaku.

Yohanes 17:5

Tata, hitupa dekeimo kuasa bo kaoge ka Yaku ri situ nte Komiu, haitumo kuasa bo kaoge anu naria nte Yaku tempo Yaku nosanggani-nggani nte Komiu dopame dunia nipajadi.”

Yohanes 20:27

Naupu haitu, niuliNa ka i Tomas, “Peintamo paleKu hitu. Dikamo koya-mpalemu ri sii. Bo dikamo palemu ri valea ntavala ri usuKu hitu. Tumo mabata-bata raramu, tapi parasayamo!”

Yohanes 7:33

Tempo haitu, i Yesus nanguli ka todea, “Sampalaipa Yaku mosanggani-nggani ante komiu pade hau manjili nte Ia anu nantudu Yaku.

Roma 8:29

Apa lako ri lamba pamulana, kita nipelisiNa bo nipakatantuNa majadi nasimbayu mpo AnaNa i Yesus. PatujuNa ala i Yesus majadi Ana Lumbua bo kita todea majadi tueiNa.

2 Korintus 6:18

Niuli muni ri Buku Gasa ivei: “Yaku majadi Tuamamiu bo komiu majadi ana-anaKu. Ivesiamo panguli nTupu anu Neliu KakuasaNa.” 2 Samuel 7:14, 1 Tawarikh 17:13, Yesaya 43:6, Yeremia 31:9

Galatia 3:26

Jadi, komiu pura-pura nosangu rara nte i Yesus Kristus, komiu najadi ana-ana nu Alatala sabana komiu nomparasaya i Kristus.

Ibrani 11:16

Tapi ira nalentoraka ngata anu nabelopa, haitumo ngata ri suruga. Jadi Alatala ledo naeya mataNa ane Ia niuli Tupura apa naria mami ngata nipakasadiaNa ka ira.

Ibrani 8:10

Tapi iveimo pojanji Kupovia ante toIsrael ri tempo makava: Kuboli atura-aturaKu riara pekirira, bo Kutulisi atura-atura haitu riara ntaira. Yaku majadi Alatala nisombara bo ira majadi todeaKu.

1 Petrus 1:3

Masipato kita mombatoiya Alatala, Tuama nTuputa Yesus Kristus! Nambaso mpuu asi mataNa ka kita, sampe nidekeiNa katuvu nabaru ka kita. Bo katuvu nabaru haitu nitarimata sabana i Yesus Kristus nipakatuvu mpanjili lako ri kamateNa. Haitumo sabana panjarumakata naroso.

1 Yohanes 3:2

Sampesuvu-sampesuvu nipotoveku, kita sii-sii ana-ana nu Alatala mami, tapi dopa nipopaisani ka kita berimba katuvuta ri tempo makava. Anu nisanita, tempo i Kristus makava mpanjili, kita majadi masimbayu mpo Ia, apa rakitata mpuu lenjeNa.

Pompakita 21:3

Bo niepeku suara namangga lako ri Gadera Kamagaua nu Alatala haitu nanguli, “Pariaramo! Sii-sii ponturo nu Alatala nosanggani-nggani ante manusia. Ia monturo ri tatangara bo ira majadi todeaNa. Bo Ia mboto mosanggani-nggani ante ira bo majadi Alatala rasombara.

Pompakita 21:7

Isema-sema padagi, rakavana pura-pura anu niuliKu pangane. Bo Yakumo majadi Alatalara bo ira majadi anaKu.