Yohanes 16:27 - Kaili Ledo

²⁷ Sabana, TuamaKu mboto nompotove komiu. Ia nompotove komiu sabana komiu nompotove Yaku bo niparasayamiumo Yaku hii nakava lako nte Ia.

Yohanes 16:27 ပူးပေါင်းရင်းမြစ်များ

Matius 10:37

Isema-sema nipotovenapa tina-tuamana pade Yaku, ledo masipato rauli topangoseaka Yaku. Bo tona nipotovenapa anana pade Yaku, ledo muni masipato rauli topangoseaka Yaku.

Yohanes 14:21

Isema-sema mompariara bo mangoseaka parenta-parentaKu, iamo nompotove Yaku. Bo isema-sema nompotove Yaku, ia muni rapotove nTuamaKu, bo Yaku mboto mompotove ia bo mompopaisani karoKu ka ia.”

Yohanes 14:23

Nesana i Yesus, “Isema-sema nompotove Yaku raoseakana tesaKu. Bo TuamaKu mompotove ia bo Yaku ante TuamaKu makava monturo mosanggani-nggani ante ia.

Yohanes 16:30

Nisani kamimo Komiu nangisani mpengaya-ngaya. Ledo paraluu tona nompekutana Komiu sabana nisaniMiu mamimo pompekutanara. Haitumo sampe niparasaya kamimo Komiu mpuu-mpuu nakava lako nte Alatala.”

Yohanes 17:23

Yaku nosangu rara nte ira bo Komiu nosangu rara nte Yaku ala ira mpuu-mpuu mosangu rara. Ane ira mpuu-mpuu mosangu rara, kana rasani nu manusia Komiu nantudu Yaku bo Komiu nompotove ira, nasimbayu mpo pompotoveMiu Yaku.

Yohanes 2:11

Haitumo kabaraka pamulana nipovia i Yesus tempo Ia ri ngata Kana ri bagia Galilea. Ia nompopakita kuasaNa ante kabaraka haitu bo ana-anaguruNa nomparasaya Ia.

Yohanes 3:13

Dopa ria saitoa tona neore hau ri suruga nanggita anu najadi hamai. Aga Yaku, Ana nu Manusia anu nanau lako ri suruga tumai ri dunia nanggitana.

Yohanes 7:29

tapi Yaku nosisani ante Ia, sabana Yaku nakava lako nte Ia bo Iamo nantudu Yaku tumai.”

Yohanes 8:42

Nanguli i Yesus ka ira, “Ane Alatala tuamamiu, tantu rapotovemiu Yaku, sabana Yaku nopuna lako nte Ia. Yaku nakava ledo nangoseaka dotaKu mboto, tapi nangoseaka dota nu Alatala anu nantudu Yaku.

Roma 8:3

Atura agama ledo namala mombakabasaka kita lako ri kuasa dosa sabana kita manusia ledo nompakule mangoseaka Atura haitu. Tapi anu ledo namala nipovia nu Atura agama, namala nipovia nu Alatala. NituduNa AnaNa mboto tumai ri dunia, bo AnaNa najadi manusia ante karo nasimbayu mpo karo nu manusia nadosa ala Ia mombarasai pehuku nu Alatala ri karoNa sabana dosata. Bo ante pohuku karo i Yesus, Alatala nombadagi kuasa nu dosa riara ntaita.

1 Korintus 15:47

Manusia paratama haitu nipajadi lako ri tana bo nonturo ri dunia hitu. Tapi i Kristus, anu nireke i Adam karanduana, nopuna lako ri suruga.

1 Korintus 16:22

Isema-sema ledo nompotove i Pue Yesus, masurukavumo ia! Maranata! Tupu kami, kakavamo!

2 Korintus 5:14

Tove i Kristus nombakuasai kami sampe kami nokainggu ivesia. Apa niparasaya kami, saito tona namate nanjambei kita pura-pura, jadi nasimbayu mpo kita pura-pura namate.

Galatia 4:4

Tapi nakavapa tempo nipakatantu nu Alatala, nisuroNa AnaNa makava ri dunia. AnaNa haitu nipoanaka nu mombine, bo Ia natundu nte Atura-atura agama Yahudi.

Efesus 6:24

Kuperapi Alatala bate-batena nabelo nte pura-pura tona anu ledo naupu-upu nompotove Tuputa Yesus Kristus. Amin. Tabe lako nte yaku Paulus

1 Timotius 1:15

Naria tesa nanguli ivei: “I Yesus Kristus nakava ri dunia ala mompakasalama tona nadosa.” Tesa haitu nakana bo masipato ratarimata bo raparasayata mpuu. Bo yakumo nelabipa nadosa pade pura-pura tona ntanina.

Ibrani 12:6

Sabana Tupu nompatuduki bo nomparajea pura-pura tona nipotoveNa. Ia noparajea pura-pura tona nipangakuNa ana-anaNa.” Ayub 5:17, Amsal 3:11-12

1 Petrus 1:8

Nau ledo nikitamiu Ia bara ipia, komiu nompotove Ia. Bo nau ledo nikitamiu Ia sii-sii, tapi komiu batena nomparasaya Ia. Bo kadamba raramiu naoge mpuu sampe ledo rapakule mombasovadakana.

1 Yohanes 4:19

Kita nepotove sabana Alatala nokolu nompotove kita.

Pompakita 3:19

Isema-sema nipotoveKu, Kuonteaka bo Kujeani ala mompatuduki ira. Haitu sampe Kuuli ka komiu, pakadidi raramiu bo kajeamo lako ri dosamiu.

Pompakita 3:9

Naria tona najadi todea Magau nu Seta anu nanguli iramo toYahudi, tano mai ledo, aga davara. Tapi epemo! Ira kana Kupopantaputu ri ngayomiu. Bo raulira Yaku mpuu-mpuu nompotove komiu.