Yohanes 16:17 - Kaili Ledo

¹⁷ Nangepe tesaNa haitu, nosipekutana anaguruNa, “Nuapa ntoto patujuNa nanguli ka kita sampalaipa domo rapeintata Ia, bo ledo masae kaliuna haitu, rapeintata vaimo Ia? Bo nuapa muni patuju ntesaNa nanguli Ia hau nte TuamaNa?”

Yohanes 16:17 ပူးပေါင်းရင်းမြစ်များ

Markus 9:10

Niturusira pepaingaNa haitu, tapi ira mboto nosimpekutana nuapa patuju i Yesus nanguli matuvu mpanjili lako ri kamateNa.

Markus 9:32

Tapi ledo nisanira batua ntesaNa haitu, bo naeka rarara mompekutana batuana nte Ia.

Lukas 18:34

Pura-pura anu nitesa i Yesus haitu ledo nipaha nu anaguruNa. Batua ntesaNa haitu nitabuniaka ka ira. Jadi ledo nisanira nuapa nitesa i Yesus.

Lukas 9:45

Tapi ledo nisani nu anaguruNa batua ntesaNa. Batua nu tesa haitu nitabuniaka ala ledo rapahara. Bo ledo muni nabia ira nompekutana nuapa batua ntesaNa.

Yohanes 12:16

Jadi nibila ntodea mpuu i Yesus tempo Ia nesua riara ngata Yerusalem. Tapi dopa nisani nu ana-anaguruNa batuana. Naliu Ia natuvu mpanjili lako ri kamateNa bo neore hau ri suruga, pade nisanira pebila ntodea ka i Yesus nompakadupa anu nitulisi riara Buku Gasa pangane.

Yohanes 14:22

Bo nekutana i Yudas (ledo i Yudas Iskariot), “Pue, nuapa sabana Komiu aga mompopaisani karoMiu ka kami, ledo ka pura-pura manusia ri dunia?”

Yohanes 14:5

Nangulimo i Tomas ka Ia, “Pue, ledo nisani kami hau ri umba rakalauMiu. Jadi berimbamo rasani kami dala hau?”

Yohanes 16:1

I Yesus nompapola tesaNa ka ana-anaguruNa ivei: “Pura-pura haitu niuliKu ka komiu ala komiu ledo moura momparasaya.

Yohanes 16:16

I Yesus nompapola tesaNa ka anaguruNa ivei: “Sampalaipa domo rapeintamiu Yaku. Ledo masae kaliuna haitu, rapeintamiu vaimo Yaku.”

Yohanes 16:18

Nosipekutana njuumo ira, “Nuapa patuju ntesaNa ‘Sampalaipa’? Ledo ntoto nisanita patuju ntesaNa haitu.”

Yohanes 16:19

Nisani i Yesus ira madota mompekutana Ia. Jadi niulikaNa ira ivei: “NikitaKu komiu nosipekutana nuapa patuju ntesaKu pangane tempo niuliKu ‘Sampalaipa domo rapeintamiu Yaku bo ledo masae kaliuna haitu, rapeintamiu vaimo Yaku’.

Yohanes 16:5

Tapi sii-sii Yaku hau nte TuamaKu anu nantudu Yaku, bo ledo ria saitoa komiu nompekutana hau ri umba Kukalau.