Yohanes 16:15 - Kaili Ledo

¹⁵ Pura-pura anu naria nte TuamaKu, anuKu pura. Haitumo sampe niuliKu ka komiu, anu nitarima nu Nosa Gasa lako nte Yaku, haitumo rapopaisaniNa ka komiu.”

Yohanes 16:15 ပူးပေါင်းရင်းမြစ်များ

Matius 11:27

Naupu haitu, i Yesus notesa ka tona ri sia, “Pura-pura nidekei nTuamaKu ka Yaku. Ledo ria tona mpuu-mpuu nosisani ante Yaku, Ana nu Alatala, aga TuamaKu Alatala. Bo ledo ria tona mpuu-mpuu nosisani ante TuamaKu aga Yaku, AnaNa, bo isema-sema Kupodota, Kupopaisanika TuamaKu ka ia.

Matius 28:18

I Yesus nanggaparai ira bo nanguli, “Pura-pura kuasa ri suruga bo ri dunia nidekei ka Yaku.

Lukas 10:22

Pade nanguli i Yesus ka tona ri sia, “Pura-pura nidekei nTuamaKu ka Yaku. Ledo ria tona mpuu-mpuu nosisani nte Yaku Ana nu Alatala, aga TuamaKu Alatala. Bo ledo ria tona mpuu-mpuu nosisani ante TuamaKu, aga Yaku, AnaNa mboto bo isema-sema Kupodota, Kupopaisanika TuamaKu ka ia.”

Yohanes 13:3

Nisani i Yesus TuamaNa Alatala nombadekei pura-pura kuasa ka Ia. Bo nisaniNa muni Ia nakava lako nte Alatala bo Ia manjili hau nte Alatala.

Yohanes 14:21

Isema-sema mompariara bo mangoseaka parenta-parentaKu, iamo nompotove Yaku. Bo isema-sema nompotove Yaku, ia muni rapotove nTuamaKu, bo Yaku mboto mompotove ia bo mompopaisani karoKu ka ia.”

Yohanes 17:10

Pura-pura tona anu najadi todeaKu, najadi todeaMiu muni. Bo pura-pura tona anu najadi todeaMiu najadi todeaKu muni. KuasaKu bo kaogeKu nalanto nikita riara nggatuvura.

Yohanes 17:2

NidekeiMiumo kuasa ka Yaku, kuasa moparenta pura-pura manusia ala mamala Kudekei katuvua mabelo sampe ri kasae-saena ka tona nidekeiMiu ka Yaku.

Yohanes 3:35

Tuamata Alatala nompotove AnaNa, bo nidekeiNa Ia mombakuasai pura-pura.

Kolose 1:19

Dota nu Alatala mboto sampe pura-pura ingguNa bo kuasaNa naria muni nte AnaNa, bo ledo ria nakura.

Kolose 2:3

I Kristusmo topompopaisani pura-pura noto bo pangisani nu Alatala anu dopa nisani ntona.

Kolose 2:9

Apa nau i Kristus najadi manusia, pura-pura inggu bo kuasa nu Alatala naria riara karoNa bo ledo nakura nuapa-nuapa.