Yohanes 15:25 - Kaili Ledo

²⁵ Haitu najadi ala madupa tesa nitulisi riara Buku Gasa ivei: ‘Ira navuu matara nanggita Yaku nau ledo naria sabana.’

Yohanes 15:25 ပူးပေါင်းရင်းမြစ်များ

Matius 10:8

Pakabelo tona nadua, pakatuvu mpanjili tona namatemo, pakabelo tona nadua oge, popalai seta-seta anu nesua ri karo ntona. Kuasa haitu nidekei bayangi ka komiu, ledo nialimiu. Jadi dekeimiu bayangi muni ka tona ntanina.

Lukas 24:44

Naupu haitu, niuliNamo ka ira, “Hitumo niuliKu ka komiu bara ipia tempo Yaku da naria nosanggani ante komiu. Pura-pura anu niboto nu nabi-nabi nggaulu nantesaki Yaku, kana rapakadupa. Haitumo, anu nitulisi ri Buku Atura Agama nitulisi Nabi Musa, Buku Nabi-nabi ntanina, bo Buku Mazmur.”

Yohanes 10:34

Nesana i Yesus, “Riara Atura-atura agamamiu, naria tesa nu Alatala ka pakeni ntoYahudi nggaulu nitulisi ivei: ‘Komiu pura-pura ana-ana nu Alatala.’

Yohanes 13:18

Anu niuliKu pangane ledo nambela komiu pura-pura. NisaniKu mamimo tona nipelisiKu, bo kana rapakadupa anu nitulisi riara Buku Gasa ivei: ‘Tona nangande nosanggani-nggani ante Yaku, iamo najadi baliKu.’

Yohanes 19:36

Pura-pura haitu najadi ala madupa anu nitulisi riara Buku Gasa ivei: “Ledo ria sangua bukuna rapakakoto.”

Roma 3:19

Jadi lako ri tesa ri Buku Gasa, nisanita ledo ria manusia nanoa. Nisanitamo pura-pura anu nitulisi riara Atura agama nambela ka toYahudi anu natundu ri Atura haitu. Jadi ledo ria saitoa tona namala manguli karona mboto nanoa. Pura-pura manusia masipato rapambela pehuku nu Alatala.

Roma 3:24

Tapi Alatala nombareke kita nanoa ri panggitaNa sabana kamate i Yesus Kristus anu nombakabasaka kita lako ri pehuku nu dosa. Haitu nipovia nu Alatala ka kita lako ri kabelo raraNa, ledo nibayarita.

2 Korintus 11:7

Tempo yaku nompatolele Kareba Belo ka komiu, yaku ledo ntoto nerapi gaji lako nte komiu. Yaku nompakaede raraku nokarajaa ante paleku mboto nompaelo ala manggeni belo ka komiu pura-pura. Jadi, berimba nirasaimiu? Nasala poviaku ivesia?

Galatia 2:21

Yaku ledo nompoara kabelo rara nu Alatala haitu. Apa ane rapana kita mamala majadi manoa ri panggita nu Alatala ante mangoseaka Atura agama, tantumo kamate i Yesus Kristus ledo maria gunana!

2 Tesalonika 3:8

Kami ledo nangande kandea anu ledo nibayari kami. Tapi bara eona bara bongina, kami nokarajaa ntamo ala ledo mompakasesa komiu.

Pompakita 21:6

Bo niuliNa ka yaku, “Naupu puramo! Yakumo hii Pamulana bo Kaupuna. Yaku nompamula bo Yaku muni nompakaupu. Isema-sema nabai tambolona Kudekeika uve lako ri mata nu uve anu nombadekei katuvua nabelo sampe ri kasae-saena. Uve haitu Kudekei bayangi, ledo paraluu rabayari.

Pompakita 22:17

Nosa Gasa bo boti mombine anu nasadia rapoberei nu Ana Bimba haitu nanguli, “Kamaimo!” Bo pura-pura tona nangepe tesa hitu kana manguli, “Kamaimo!” Isema-sema nabai tambolona, kamaimo! Isema-sema madota, kamaimo manginu uve anu nombadekei katuvua. Uve haitu nidekei bayangi, ledo paraluu raali.