Yohanes 14:27 - Kaili Ledo

²⁷ Katinonto rara Kudekei ka komiu, haitumo katinonto nu raraKu mboto. Bo anu Kudekei ka komiu haitu ledo nasimbayu nte anu nidekei nu dunia nadaa ka komiu. Jadi nee masusa raramiu, nee maeka.

Yohanes 14:27 ပူးပေါင်းရင်းမြစ်များ

Matius 10:26

“Tapi nau rasalai ntona komiu, nee maeka nte tona mangeva komiu. Apa pura-pura anu nakana, anu nitabuniaka sii-sii kana malanto rakita ngena. Pura-pura rahasia sii-sii kana rasani ntonamo bara maipia.

Lukas 10:5

Ane komiu mesua ri banua ntona uli ntani ruru, ‘Kuperapi Alatala mombadekei belo ka komiu sambanua!’

Lukas 12:4

“Vega-vegaKu, pariaramo! Nee maeka ka tona madota mompatesi komiu, sabana maupu haitu domo ria nuapa-nuapa mamala rapoviara ka komiu.

Lukas 2:14

“Ratoiyamo Alatala ri suruga! Bo ri dunia, tona nipokonoa nu Alatala manggava katuvua nabelo!”

Yohanes 14:1

Nanguli i Yesus ka ana-anaguruNa, “Nee masusa raramiu. Parasayamo Alatala, bo parasaya munimo Yaku.

Yohanes 16:33

Pura-pura tesaKu pangane nitesaKu ka komiu ala matinonto raramiu sabana komiu mosangu rara nte Yaku. Ri dunia hitu komiu rapandasa. Tapi pakaroso raramiu! Apa kuasa nadaa ri dunia hitu nidagiKumo!”

Yohanes 20:19

Ri eo Aka bongina, ana-anaguru i Yesus nasiromu ri sangu banua. Vamba nu banua haitu nigunji sabana ira naeka ka pakeni ntoYahudi. Sampesanika, neongamo i Yesus neangga ri tatangara, bo nanguli, “Kuperapi Alatala mompakatinonto raramiu!”

Yohanes 20:21

Nanguli vaimo i Yesus, “Kuperapi Alatala mompakatinonto raramiu! Yaku mombasuro komiu, nasimbayu mpo TuamaKu nombasuro Yaku.”

Yohanes 20:26

Naliu valu-mbongi, nasiromu vaimo ana-anaguru i Yesus riara nu banua haitu, bo i Tomas naria muni nosanggani-nggani ante roana ri sia. Vamba nigunji puramo tapi sampesanika, neongamo i Yesus neangga ri tatangara, bo nanguli, “Kuperapi Alatala mompakatinonto raramiu!”

Suro-Suro 10:36

Sampesuvu-sampesuvu, nisanimiu mbotomo isi kareba nipasimbayu nu Alatala ka kami toIsrael. Kareba haitu nanguli i Yesus Kristus anu nompoposinggabelo manusia ante Alatala. I Yesusmo Tuputa pura-pura, ledo aga Tupu ntoYahudi.

Suro-Suro 18:9

Naria sambongi, Tupu neonga nte i Paulus riara pangipina, bo nanguli “Nee maeka ka tona! Nee menonto mompatolele TesaKu,

Roma 1:7

Jadi siamo sampe nitulisiku sura hitu ka komiu pura-pura ri ngata Roma, komiu anu nipotove nu Alatala bo nipokioNa majadi todeaNa. Kuperapi Tuamata Alatala bo i Pue Yesus Kristus mombadekei belo ka komiu bo mompakatinonto raramiu.

Roma 15:13

Alatala mpuu-mpuu puna panjarumakata! Kuperapi Ia mompakadamba mpuu raramiu bo mombadekei ka komiu katuvua mabelo sabana komiu nomparasaya Ia. Kuperapi panjarumakamiu nte Ia mantambai maroso ante kuasa lako ri Nosa GasaNa.

Roma 5:1

Kita najadi nanoa ri panggita nu Alatala sabana kita nomparasaya i Yesus. Jadi sii-sii kita natuvu nosinggabelo ante Alatala sabana anu nipovia nTuputa Yesus Kristus ka kita.

Roma 5:10

Bara ipia, tempo kita da nangeva Alatala, nidekeiNa AnaNa mamate mombasambei kita, ala kita rapoposinggabelo mpanjili ante Ia. Sii-sii kita nosinggabelomo ante Alatala, jadi natantumo kita rapakasalama lako ri pehuku bara maipia, sabana i Kristus bate-batena natuvu.

Roma 8:6

Ane pekirira nikuasai dota rara nadaa, ira mamate bo rapopogaa lako nte Alatala. Tapi ane pekirira nikuasai nu Nosa Gasa nu Alatala, ira matuvu mabelo bo mosinggabelo ante Alatala.

1 Korintus 1:3

Kuperapi Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.

Galatia 1:3

Kuperapi Tuamata Alatala bo i Pue Yesus Kristus batena mabelo nte komiu bo mompakatinonto raramiu.

Galatia 5:22

Tapi ane tona nikeniaka Nosa Gasa nu Alatala, iveimo inggura: ira nosimpotove, ira nadamba bo natinonto rarara. Ira nosabara, nalusu bo nabelo rarara nte tona ntanina. Ira namala raparasaya,

Galatia 6:16

Kuperapi Alatala mombadekei belo bo katinonto ka tona natuvu nangoseaka pepatuduki hitu, bo muni ka pura-pura todea nu Alatala, nau toYahudi, nau tona ledo toYahudi.

Filipi 4:7

Bo ane radekeimiu kakini raramiu ka Alatala, radekeiNa katinonto ka komiu anu ledo rapakule nu manusia mompahana. Ia mompakatinonto raramiu bo pekirimiu sabana komiu nosangu rara ante i Yesus Kristus.

Kolose 1:20

Bo dotaNa muni, AnaNa mompoposinggabelo pura-pura anu nipajadiNa nte Ia. Pura-pura anu nipajadi nu Alatala, nau ri dunia, nau ri suruga, pura-pura nosinggabelo mpanjili ante Ia sabana raa nu AnaNa anu natiti tempo Ia nipatesi ri kayu salib.

Kolose 3:15

I Kristus nompoposinggabelo kita. Jadi nee rapoviata anu mombagerosi posinggabelo haitu, sabana kita nipokio nu Alatala ala kita pura-pura matuvu mosinggabelo mpo sipa-sipa nu karo sangu. Bo nee menonto motarima kasi nte Alatala.

2 Tesalonika 3:16

Kuperapi i Pue Yesus bate-batena mompakatinonto raramiu riara mpengaya-ngaya, sabana Iamo puna katinonto. Kuperapi Ia momporoa komiu pura-pura.

2 Timotius 1:7

Apa Nosa Gasa nipopanau nu Alatala ka kita ledo nompakaeka kita, tapi nompakaroso rarata, bo nompopompakule kita mombatidamaka dota rarata mboto bo mompotove singgamanusiata.

Ibrani 13:20

Alatala nompakatuvu mpanjili Tuputa Yesus lako ri kamateNa. Jadi Ia najadi Topoevu nakuasa anu nompoevu kita bimba-bimbaNa. RaaNa nipatiti nompakaasa pojanji nu Alatala ante kita, bo pojanji haitu rapake sampe ri kasae-saena. Kuperapi Alatala, puna katuvua nabelo, mompakagana pura-pura anu nabelo niparaluumiu, ala rapakulemiu movia dotaNa. Kuperapi Ia manggeni komiu movia anu nipokonoNa ante petulungi i Yesus Kristus. Iamo masipato ratoiyata bo rabilata sampe ri kasae-saena. Amin!

Ibrani 7:2

Naupu haitu i Abraham nombabagi pura-pura mbara-mbara nialasina lako ri magau-magau, bo nidekeina sabagia lako ri sapulu bagia ka i Melkisedek. Sanga i Melkisedek haitu, batuana “Magau Nanoa,” bo ia muni Magau ngata Salem anu naria batuana “Magau Topanggeni Posinggabelo.”

Pompakita 1:4

Sampesuvu-sampesuvu sampomparasaya anu nonturo ri pitu ngata ri propinsi Asia. Yaku i Yohanes, merapi komiu mantarima katinonto bo belo lako nte Alatala anu nariamo lako ri lamba pamulana, bo naria sii-sii, bo maria sampe ri kasae-saena. Bo kuperapi ratarimamiu belo bo katinonto lako nte papitu Nosa nu Alatala anu naria ri ngayo Gadera Kamagaua nu Alatala,

Pompakita 2:10

Tapi nee maeka komiu mantingayo kasusa bo kapari anu domo masae kana rarasaimiu. Pariaramo! Magau nu Seta mompopesua sanu komiu hau rantarunggu bo mompesori komiu ala moura pomparasayamiu. Komiu rapandasa sapulu eo kasaena. Tapi nee maupu raramiu momparasaya Yaku nau komiu rapatesi, sabana Kudekei ka komiu hadia padagi, haitumo komiu matuvu mabelo sampe ri kasae-saena.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”