Yohanes 1:29 - Kaili Ledo

²⁹ Eo kamailena i Yohanes nanggita i Yesus nakava tumai nanggaparai ia, bo niulina ka tona hamai, “Peintamo! Tumaimo Ana Bimba nipakasadia nu Alatala anu mompakalali dosa manusia!

Yohanes 1:29 ပူးပေါင်းရင်းမြစ်များ

Matius 1:21

I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

Matius 20:28

masimbayu eva Yaku, Ana nu Manusia. Yaku ledo nakava ri dunia hitu ala ratande ntona, tapi ala mombatulungi tona, bo mombadekei karoKu rapatesi mantolo dosa ntona dea.”

Yohanes 1:35

Eo kamailena naria vaimo i Yohanes nosanggani-nggani ante randua topangoseaka ia.

Yohanes 1:36

Tempo nikitara i Yesus noliu ri sia, nangulimo i Yohanes, “Peintamo! Haitumo Ana Bimba nu Alatala!”

Yohanes 1:43

Eo kamailena i Yesus nonia hau ri bagia Galilea. Ia nompotomu i Filipus, bo niulikaNa, “Kaimo, oseakamo Yaku.”

Yohanes 2:1

Rombongi kaliuna kajadia haitu, naria posusa ponika ri ngata Kana ri bagia Galilea. Tina Yesus naria hamai.

Yohanes 3:16

Apa Alatala mpuu-mpuu nompotove manusia sampe nidekeiNa AnaNa saito-itoNa, ala isema-sema momparasaya AnaNa ledo rapopogaa lako nte Alatala tapi manggava katuvua mabelo sampe ri kasae-saena.

Yohanes 4:42

Naupu sia, niulikara mombine haitu, “Sii-sii niparasaya kami mpuumo, ledo aga lako ri tesamu tapi niepe kami mbotomo tesaNa. Bo nisani kamimo Ia mpuu-mpuu Magau Topompakasalama manusia.”

Yohanes 6:51

Yakumo hii kandea anu nanau lako ri suruga, anu nombadekei katuvua nabelo haitu. Isema-sema mangande kandea hitu, matuvu mabelo sampe ri kasae-saena. Kandea anu nombadekei katuvua nabelo, batuana isi karoKu anu Kudekei ala manusia mamala matuvu mabelo sampe ri kasae-saena.”

Suro-Suro 13:39

Kita ledo namala rakabasaka lako ri dosata ane aga nangoseaka Atura-atura nipapola Nabi Musa. Tapi isema-sema nomparasaya i Yesus, rakabasaka lako ri pura-pura dosana bo majadi nanoa ri panggita nu Alatala.

Suro-Suro 8:32

Hitumo tesa-tesa lako ri buku Nabi Yesaya nibacana haitu: Ia mpo bimba niumbu rakeni rasambale, mpo ana bimba ledo nombee nigau buluna. Ivesia muni ia ledo ntoto ria sambelaa notesa.

1 Korintus 15:3

Nitarimaku kareba nelabi nopoko bo haitumo nipasimbayuku ka komiu. Haitumo, i Kristus namate sabana dosata bo haitu najadi nangoseaka anu nitulisi riara Buku Gasa.

2 Korintus 5:21

I Kristus ledo ntoto nadosa. Tapi Alatala nompoposimbuaka ka Ia dosata bo nipoviaNa Ia mpo tona nadosa ala manjambei kita. Alatala novia haitu ala kita anu nosangu rara nte i Kristus majadi manoa ri panggitaNa.

Galatia 1:4

I Yesus nombadekei karoNa rapatesi mombasompo dosata nangoseaka dota nTuamata Alatala. PatujuNa ala Ia mamala mombakabasaka kita lako ri kuasa nu dunia nadaa.

Galatia 3:13

Kita manusia masipato rahuku nu Alatala, sabana kita pura-pura nombaliunaka AturaNa. Tapi i Kristus nombakabasaka kita lako ri pehuku haitu, sabana tempo Ia namate ri kayu salib, Iamo nihuku manjambei kita. Nisanita i Kristus nihuku nu Alatala sabana naria tesa riara Buku Gasa nanguli ivei: “Isema-sema namate niloe ri kayu, haitu tandana ia nihuku nu Alatala.”

1 Timotius 2:6

Ia manusia anu nombadekei karoNa mboto nipatesi mombatolosi pura-pura tona. Ia namate ri tempo nipakatantu nu Alatala ala malanto rakitata dota nu Alatala mompakasalama pura-pura manusia.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Ibrani 1:3

AnaNa haitu nompopakita kuasa bo kaoge nu Alatala, bo Ia nasimbayu nte Alatala. Iamo nombakuasai bo nompiara mpengaya-ngaya ri dunia ante tesaNa nakuasa. Naupu Ia nombakabasaka manusia lako ri dosa, Ia nonturo ri ponturo magau ri suruga ri panggana nu Alatala toNeliu KaogeNa.

Ibrani 2:17

Haitu sampe Ia kana najadi nasimbayu ntoto ante kita sampesuvu-sampesuvuNa. Ane Ia nasimbayu ntoto nte kita, Ia namala majadi Pakeni nTopanggeni Pesomba anu naasi mataNa nanggita todeaNa bo natutu nombatui pokarajaa nidekei nu Alatala ka Ia, sampe dosa manusia namala nisompo.

Ibrani 9:28

Jadi ivesia muni i Kristus namate aga sanggani majadi pesomba pompakalali dosa ntodea. Naupu haitu Ia makava sangganipa, ledo mompakalali dosa, tapi mompakasalama tona nalentora nompopea kakavaNa.

1 Petrus 1:19

tapi nibayariNa ante anu nelabi noali, haitumo raa i Kristus. I Kristus nireke mpo ana bimba nadoli bo ledo nasala nisambale manjambei komiu.

1 Petrus 2:24

I Yesus mbotomo nanjimbuaka dosa-dosata tempo Ia nipaku ri kayu salib, ala kita rakabasaka lako ri kuasa nu dosa bo matuvu mangoseaka dota nu Alatala. Bo kita nipakabelomo lako ri baka-baka i Kristus.

1 Petrus 3:18

Apa i Kristus muni nombarasai kasusa nau ledo novia anu nadaa. Ia aga sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala, ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

1 Yohanes 2:2

I Yesus namate nombatanggu dosa-dosata. Bo ledo aga dosata nitangguNa, tapi pura-pura dosa manusia.

1 Yohanes 3:5

Nisanimiumo patuju i Yesus nakava ri dunia ala Ia mompakalali pura-pura dosa manusia. Bo nisanimiu muni Ia mboto ledo ntoto nadosa.

1 Yohanes 4:10

Povia nu Alatala haitu nompopaisani tove nakana ka kita. Iveimo tove nakana: ledo kita nokolu nompotove Alatala tapi Alatala nokolu nompotove kita. Ia nompotove kita sampe nituduNa AnaNa mboto tumai mamate mombasambei kita ala dosata namala raampungi.

Pompakita 1:5

bo lako nte i Yesus Kristus. Iamo sabi anu namala raparasaya, Iamo tona paratama nipakatuvu mpanjili lako ri kamateNa. Iamo nomparenta pura-pura magau riara dunia. Ia nompotove kita bo nombakabasaka kita lako ri dosata ante raa kamateNa.

Pompakita 12:11

Tapi todea sampomparasaya haitu nombadagi Magau nu Seta ante kuasa lako ri raa nu Ana Bimba anu namate nombasompo dosara. Bo nidagira ia ante pepatuduki i Yesus nipatolelera. Bo ledo nipotovera katuvura, ledo ntoto nenonto nomparasaya nau sampe rapatesi.

Pompakita 13:8

Pura-pura manusia nonturo ri dunia mombasomba binata haitu, haitumo pura-pura tona anu ledo nitulisi sangara riara Buku Katuvua dopame dunia nipajadi. Buku haitu naria nte Ana Bimba anu nipatesi.

Pompakita 14:1

Naliu haitu naria vai anu nipopakita ka yaku. Nikitaku Ana Bimba neangga ri bavo Bulu Sion nosanggani-nggani ante saatu patapulu bo pata-njobu tona. Bo sanga nu Ana Bimba bo sanga nTuamaNa Alatala nitulisi ri kirera.

Pompakita 14:10

tona haitu rapokarau nu Alatala bo ledo ntoto rakurangiNa pehuku ka ira! Pehuku haitu nirapaka tona nipainu panginu napai mpuu, bo ledo niposigalo ante uve! Ira pura-pura rapandasa riara apu bo vatu-vatu colonggata narega ri panggita malaeka-malaeka nagasa bo Ana Bimba.

Pompakita 14:4

Ira haitumo nasimbayu mpo tona ledo sanggani nosampaturu ante mombine, nagasa mpuu pokainggura. Ira nangoseaka Ana Bimba ri umba-umba nikalauNa. Iramo nitoloki lako nte pura-pura manusia ri dunia bo nipatani ka Alatala bo ka Ana Bimba, nasimbayu mpo tona nombadekei asele ntalua pamulana ka Alatala.

Pompakita 15:3

Bo nipodadekaramo dade Nabi Musa, batua nu Alatala nggaulu. Bo nipodadekara muni dade mombabila Ana Bimba ivei: “O Pue Alatala, neliu mpuu KakuasaMiu! PoviaMiu naoge bo mpuu-mpuu nipokumaaka. Komiumo Magau nu pura-pura manusia ri dunia! Pura-pura pokaingguMiu nakana bo nanoa.

Pompakita 17:14

Bo ira mosieva ante Ana Bimba. Tapi Ana Bimba mombadagi ira sabana Iamo Tupu nu pura-pura tupu bo Magau nu pura-pura magau. Bo nosanggani-nggani ante Ana Bimba haitu maria muni topangoseaka-topangoseaka Ia anu nipokioNa bo nipelisiNa, anu natutu nangoseaka Ia.”

Pompakita 19:7

Kamaimo kita modade ante damba rara. Kamaimo kita mantoiya kaogeNa. Sabana, nakavamo eo ponika Ana Bimba. Boti mombine nasadiamo ranika.

Pompakita 19:9

Naupu sia, nangulimo malaeka haitu ka yaku, “Tulisimo hitu: Nabelo mpuumo tona nigaga hau ri posusa ponika Ana Bimba.” Bo niulina munimo, “Tesa-tesa hitu lako nte Alatala bo nakana mpuu!”

Pompakita 21:14

Tembo ngata haitu nipopeangga ri bavo sapulu rolonta vatu pandasi bo ri vatu pandasi haitu naria nitulisi sanga sapulu randua suro nu Ana Bimba.

Pompakita 21:27

Tapi anu naruto bo tona novia nadaa bo topodava ledo ntoto mamala mesua riara ngata haitu. Tona mamala mesua hamai aga tona nitulisi sangana riara Buku Katuvua nu Ana Bimba.

Pompakita 21:9

Naupu haitu nakavamo saito malaeka lako nte ira papitu anu nantipale tubu-tubu niisi ante pitu-ngaya pepandasa kaupuna. Nangulimo ia ka yaku, “Kamaimo, kupopakita ka iko boti mombine anu rapoberei nu Ana Bimba.”

Pompakita 5:6

Naupu haitu nikitaku sangu Ana Bimba neangga ri sinjori Gadera Kamagaua bo nipatiku nu ampa Anu Natuvu bo totua-totua gahaitu. Ri karoNa nikitaku bela baka, belana tempo Ia nipatesi nggaulu. Ri balenggaNa naria papitu tanduNa bo mataNa muni pitu-angu. Pitu-angu mataNa haitu, batuana papitu Nosa nu Alatala anu nituduNa hau ri njumangu dunia.

Pompakita 5:8

Tempo Ana Bimba nangala sura haitu, nantaputumo ampa Anu Natuvu, bo ropulu bo ampa totua ri ngayoNa mombasomba Ia. Ri palera saito-saito naria kacapi bo tubu bulava niisi dupa anu navangi mpuu. Dupa haitu nirapaka posambaya ntodea nu Alatala.

Pompakita 6:1

Naupu haitu nikitaku Ana Bimba nombabuka populu paratama. Pade niepeku saito lako ri ampa Anu Natuvu haitu notesa ante suara namangga mpo moni guru kede. Niulina, “Kamaimo!”

Pompakita 6:16

Nongaremo ira ka bulu-bulu bo vatu-vatu, “Ivumo kami! Tabuniakamo kami ala domo rakita mata nToponturo ri Gadera Kamagaua haitu. Ivumo kami ala kami ledo rapambela rau rara nu Ana Bimba!”

Pompakita 7:14

Nesanamo yaku, “Tua, ledo nisaniku, komiu nangisanina.” Bo nangulimo ia ka yaku, “Ira gahaitumo tona nipakasalama tempo pepandasa anu nelabi mpuu kadaana. Nitoposira pakeara sampe naramputi ante raa nu Ana Bimba, haitumo, dosara niampungi.

Pompakita 7:17

Sabana, Ana Bimba anu naria ri sinjori Gadera Kamagaua nu Alatala haitu nompoevu ira. Ia nombanini ira hau ri mata uve anu nombadekei katuvua nabelo. Bo Alatala mboto nompaisi pura-pura uve mata lako ri matara mombaondopi ira.”