Yakobus 2:21 - Kaili Ledo

²¹ Toramo Nabi Abraham, totuata nggaulu. Ia nireke nanoa ri panggita nu Alatala sabana pokaingguna nabelo, haitumo tempo nidekeina anana i Ishak ka Alatala ri bavo lanta pesomba.

Yakobus 2:21 ပူးပေါင်းရင်းမြစ်များ

Matius 12:37

Apa tesamiu mboto rapake nu Alatala mombatangara komiu bara nasala bara ledo.”

Matius 3:9

Nee rapekirimiu, ‘Kami hii muli i Abraham. Pehuku nu Alatala ledo rapambela ka kami.’ Haitu ledo muni nakana! Kuuli ka komiu, ane Alatala madota, nau vatu-vatu hitu mamala rapajadiNa muli i Abraham.

Lukas 1:73

PojanjiNa nggaulu ka totuata i Abraham naroso mpuu. Alatala nojanji mombakabasaka kita muli i Abraham lako ri balita, ala kita mamala metupu nte Ia, ante ledo ria ekata. NijanjiNa ka kita ala mamala kita metupu nte Ia, ante rara magasa bo manoa sampe ri kaupu nggatuvuta ri dunia.”

Lukas 16:24

Nongaremo tokalumana haitu, ‘Tuamaku, Abraham, poasimo yaku! Tudumo i Lazarus mombalome koya mpalena ri uve pade tumai mombabanggasi dilaku, nandasa mpuu yaku ri mata nu apu hitu.’

Lukas 16:30

Tapi nesana tokalumana, ‘Ledopa magana. Tapi ane maria tona namate matuvu mpanjili hau nte ira, tantu ira majea movia dosa.’

Yohanes 8:39

Nesana ira ka i Yesus, “Tuama kami i Abraham.” Nanguli i Yesus, “Ane komiu mpuu-mpuu muli i Abraham, natantumo pokainggumiu mabelo, nasimbayu mpo pokainggu i Abraham.

Yohanes 8:53

Berimbamo? Naogepa Iko pade tuputa i Abraham? Ia bo nabi-nabi nggaulu namate puramo! Isema ntoto Iko sampe Iko nabia notesa ivesia?”

Suro-Suro 7:2

Nesana i Stefanus, “Totua-totua bo sampesuvu-sampesuvu. Epemo tesaku hitu. Dopame i Abraham totuata nggaulu nolinja hau ri ngata Haran, tempo ia da nonturo ri tana Mesopotamia, Alatala toNeliu KaogeNa nakava nte ia.

Roma 3:20

Ledo ria saitoa tona majadi manoa ri panggita nu Alatala sabana nangoseaka Atura-atura agama. Apa Atura haitu aga nompopaisani ka kita pura-pura manusia nadosa.

Roma 4:1

Jadi pekirimo i Abraham, totua ntoYahudi nggaulu. Berimba sampe ia najadi nanoa ri panggita nu Alatala?

Roma 4:12

Bo i Abraham muni rapotuama ntoYahudi, haitumo ira anu ledo aga nangoseaka ada posuna tapi nangoseaka jonjo pomparasaya i Abraham dopame ia nisuna.

Roma 4:16

Jadi kita mantarima anu nijanji nu Alatala sabana pomparasayata nggoo, ala malanto anu nidekeiNa haitu nidekeiNa bayangi lako ri kabelo nu raraNa. Jadi, anu nijanji nu Alatala nambela ka pura-pura muli i Abraham, ledo aga ka toYahudi anu nompasimbuku nangoseaka Atura agama, tapi isema-sema nanjarumaka Alatala nasimbayu mpo i Abraham nanjarumaka Alatala. Apa i Abraham rapotuamata mpasinggani, haitumo, ia najadi jonjo pomparasaya ka kita pura-pura.

Ibrani 11:17

Lako ri pomparasaya i Abraham, ia nasadia nombadekei anana i Ishak majadi pesomba ka Alatala tempo pomparasayana niuji nu Alatala. Bara ipia Alatala nojanji ka i Abraham ivei: “Lako ri Ishakmo iko manggava muli nijanjiKu ka iko.” Tapi naupa ivesia, i Abraham nasadia mombasambale i Ishak, anana saito-itona, majadi pesomba ka Alatala.

Yakobus 2:18

Bara rauli ntona ivei: naria tona nanjarumaka pomparasayana. Bo naria muni tona nanjarumaka pokaingguna. Tapi kuuli ka komiu, ledo rapakulemiu mompopakita pomparasayamiu ka yaku ane ledo nabelo pokainggumiu. Tapi ante pokaingguku nabelo, rasanimiumo yaku mpuu-mpuu nomparasaya.

Yakobus 2:24

Jadi sampesuvu-sampesuvu, nalantomo ka kita, tona nireke nanoa ri panggita nu Alatala sabana pomparasayana nasinggeni nte pokaingguna nabelo, ledo aga pomparasayana bayangi.