Yakobus 1:1 - Kaili Ledo

¹ Sura hitu lako nte yaku, i Yakobus. Yaku batua nu Alatala bo batua i Pue Yesus Kristus. Nadea tabe ka komiu todea nu Alatala ri njumangu dunia.

Yakobus 1:1 ပူးပေါင်းရင်းမြစ်များ

Matius 13:55

Apa ledo Ia haitu ana i Yusuf pande kayu? Apa ledo i Maria tinana? Bo sampesuvuNa langgai i Yakobus, i Yusuf, i Simon bo i Yudas?

Matius 19:28

Nesana i Yesus ka ira, “Pariaramo tesaKu hitu. Yaku, Ana nu Manusia momparenta ante kuasa bara maipia tempo Alatala mompakabaru mpengaya-ngaya. Bo komiu topangoseaka Yaku momparenta mosanggani-nggani nte Yaku bo monturo ri sapulu randua gadera magau bo mombatangara todea Israel, haitumo muli nu sapulu randua ana i Israel.

Markus 3:18

Naria muni i Andreas, i Filipus, i Bartolomeus, i Matius, i Tomas, i Yakobus ana i Alfeus, i Tadeus, i Simon lako ri partei Zelot,

Lukas 22:30

Jadi komiu muni madamba mangande bo manginu ante Yaku ri PoparentaKu tempo Yaku majadi Magau. Bo komiu monturo ri sapulu randua gadera magau bo momparenta tona lako ri sapulu randua valaa ntoIsrael.”

Yohanes 12:26

Isema-sema mokarajaa ka Yaku kana mangoseaka Yaku ala ri umba-umba Kukalau, ia mosanggani-nggani nte Yaku. Bo isema-sema mokarajaa ka Yaku natantu rabila nTuamaKu.

Yohanes 7:35

Nangepe tesa i Yesus haitu, naingumo pakeni ntoYahudi. Nosimpekutanamo ira, “Hau ri umba tano Ia sampe ledo rakavata Ia? Bara hau nte toYahudi anu nonturo ri ngata-ngata ntona ledo toYahudi bo mompatuduki tona ledo toYahudi?

Suro-Suro 1:13

Nakava ri Yerusalem, hau ira ri banua ponturora bo nompene ri tombi kalangana. Sanga nu suro-suro haitu iamo: i Petrus, i Yohanes, i Yakobus, i Andreas, i Filipus, i Tomas, i Bartolomeus, i Matius, i Yakobus ana Alfeus, i Simon Zelot topangeva pomarenta, bo i Yudas ana Yakobus.

Suro-Suro 12:17

bo nanganggataka palena ala malino pura ira, pade nitesakana ira malaeka nTupu anu nanggeni ia nesuvu lako riara ntarunggu. Bo niulina muni, “Uli kajadia hitu ka i Yakobus bo ka sampesuvuta ntanina.” Naupu sia nalaimo i Petrus hau ri ponturo santanina.

Suro-Suro 15:13

Naupu ira notesa, nangulimo i Yakobus, “Sampesuvu-sampesuvu. Epemo tesaku!

Suro-Suro 15:21

Aga atura-atura haitu raperapita raoseakara ala mombajagai kasintuvura nte toYahudi, sabana nompamula lako ri nggauluname, Atura-atura i Musa haitu nipatolelemo ri pura-pura ngata, bo nibaca ri eo-eo penonto ri banua-banua petupu ntoYahudi.”

Suro-Suro 15:23

Jadi nitulisira santau sura rakeni ntona randua pangane. Sura haitu nanguli ivei: “Sampesuvu-sampesuvu sampomparasaya anu ledo toYahudi, anu nonturo ri ngata Antiokhia bo ri propinsi Siria bo Kilikia: Nadea tabe lako nte kami, suro-suro bo pakeni-pakeni ntodea topomparasaya.

Suro-Suro 2:5

Tempo haitu nadea toYahudi ntanina lako ri ngata-ngata ri njumangu dunia nonturo ri ngata Yerusalem. Ira haitu tona natundu nte Alatala.

Suro-Suro 21:18

Kamailena, i Paulus nosanggani-nggani ante kami hau mosinggava nte i Yakobus. Pura-pura pakeni ntopomparasaya ntanina naria ri sia muni.

Suro-Suro 23:26

“Gubernur Feliks nibilaku. Tabe lako nte yaku i Klaudius Lisias.

Suro-Suro 26:7

Kami toYahudi, muli lako ri sapulu randua ana i Israel, nanjarumaka pojanji haitu rapakadupa nu Alatala. Haitumo sampe kami ledo nabasa-basa eo bongi netupu nte Alatala. O Magau nibilaku! Yaku nipangadu ntoYahudi sabana yaku nomparasaya pojanji haitu, nasimbayu nte ira!

Suro-Suro 8:1

I Saulus nadamba apa i Stefanus nipatesira. Nompamula eo haitu todea topangoseaka i Yesus ri ngata Yerusalem mpuu-mpuu nipandasa ntoYahudi sampe ira nasimpotare hau ri njumangu ngata ri bagia Yudea bo Samaria. Aga suro-suro i Yesus ledo nalai.

Roma 1:1

Sampesuvu-sampesuvu ri ngata mbaso Roma: Sura hitu lako nte yaku i Paulus, batua i Yesus Kristus. Alatala nompelisi bo nombasuro yaku mompatolele Kareba Belo lako nte Ia.

Galatia 1:19

Tapi yaku ledo nanggita suro-suro ntanina, aga i Yakobus tuei i Pue Yesus.

Galatia 2:12

Bara ipia ia ledo nompoposisala toYahudi ante tona ledo toYahudi. Ia nangande nosanggani-nggani ante sampesuvuta sampomparasaya ledo toYahudi. Naupu sia, nakavamo bara sako-ndua roa i Yakobus lako ri Yerusalem. Iramo toYahudi anu nomparasaya i Yesus. Pangulira topomparasaya i Yesus kana rasuna nangoseaka atura agama Yahudi. Nakavapa ira, domo nipeili i Petrus topomparasaya anu ledo toYahudi. Domo nabia ia nangande nosanggani-nggani nte ira, apa naeka ia rasalai ntopomparasaya toYahudi dako nakava haitu.

Galatia 2:9

I Yakobus, i Petrus bo i Yohanes, nireke pakeni ntodea topomparasaya i Yesus ri Yerusalem. Nikitara Alatala nombadekei pokarajaa nabelo ka yaku, haitumo majadi suroNa. Jadi ira nosijoko pale ante kami bo i Barnabas. Haitumo tandana kami pura-pura roa sampobago nanggeni Kareba Belo. Kami pura-pura nasituju ala kami bo i Barnabas manggeni Kareba Belo ka tona ledo toYahudi bo ira manggeni Kareba Belo ka toYahudi.

Filipi 1:1

Sampesuvu-sampesuvu sampomparasaya anu nonturo ri ngata Filipi: Sura hitu lako nte yaku i Paulus, bo i Timotius, batua-batua i Yesus Kristus. Kami notulisi ka komiu pura-pura anu nosangu rara ante i Yesus Kristus, bo muni ka pakeni ntodea topomparasaya bo topotulungi pakeni ntopomparasaya.

2 Timotius 4:21

Pasimbukumo tumai dopame tempo ranindi. Nadea tabe lako nte i Ebulus, i Pudes, i Linus bo i Klaudia, bo lako nte pura-pura sampesuvuta sampomparasaya ri sii.

Titus 1:1

Sampesuvuku i Titus: Sura hitu lako nte yaku Paulus, batua nu Alatala bo suro i Yesus Kristus. Yaku nianggatakaNa bo nisuroNa mompakaroso pomparasaya ntona nipelisi nu Alatala. NituduNa muni yaku mompatuduki ira ala rasanira pepatuduki nakana, anu manggeni ira matuvu nangoseaka dota nu Alatala.

1 Petrus 1:1

Sampesuvu-sampesuvu anu nipelisi majadi todea nu Alatala bo nonturo mpo topesovo nasimpotare ri umba-umba ri propinsi Pontus, Galatia, Kapadokia, Asia bo Bitinia: Sura hitu lako nte yaku i Petrus, suro i Yesus Kristus. Kuperapi Alatala mpuu-mpuu mabelo nte komiu bo mompakatinonto raramiu. Komiu nipelisi nTuamata Alatala majadi todeaNa nangoseaka niaNa mboto lako ri lamba pamulana. Bo Nosa Gasa nompakajadi komiu todea nagasa, nipatani ka Alatala, ala komiu matundu nte i Yesus Kristus bo dosamiu raampungiNa sabana raaNa natiti ri kayu salib.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

Yudas 1:1

Sampesuvu-sampesuvu anu nipokio nTuamata Alatala majadi todeaNa: Komiu mpuu-mpuu nipotove nu Alatala, bo nijagaiNa sampe i Yesus Kristus makava mpanjili. Sura hitu lako nte yaku, i Yudas, batua i Yesus Kristus bo sampesuvu i Yakobus.

Pompakita 7:4

Bo niepeku kadea ntona nimere kirera, saatu patapulu bo pata-njobu. Ira lako ri muli sapulu randua ana i Yakub anu niuli toIsrael.