Titus 2:12 - Kaili Ledo

¹² Lako ri kabelo raraNa, kita nipatudukiNa mombakabasaka pokaingguta ledo nipokonoNa bo dota nu rarata nadaa. Bo kita nipatudukiNa majadi manoto, manoa, bo matuvu mangoseaka dotaNa ri dunia sii-sii.

Titus 2:12 ပူးပေါင်းရင်းမြစ်များ

Matius 12:32

Isema-sema nombasalai Yaku, Ana nu Manusia mamala raampungi. Tapi isema-sema mombasalai Nosa Gasa nu Alatala, ledo ntoto raampungi, lako ri eo hitu sampe ri kasae-saena.

Matius 16:24

Naupu sia pade niulikaNa ana-anaguruNa, “Isema-sema madota mangoseaka Yaku, ia kana mombakabasaka dotana mboto bo mpuu-mpuu mangoseaka Yaku. Ia kana majadi nasimbayu eva tona nanjimbuaka kayu salibna, haitumo, ia kana masadia rapandasa nau ia rapatesi sabana nangoseaka Yaku.

Matius 28:20

Patudukimo ira ala raoseakara pura-pura anu niparentaKu ka komiu. Bo toramo! Yaku bate-batena mosanggani-nggani ante komiu sampe ri kaupu dunia.”

Lukas 1:6

Katuvura njamboko mpuu-mpuu nompakadamba rara nu Alatala, sabana ira njamboko natundu ri pura-pura parenta bo atura nu Alatala.

Yohanes 14:30

Domo madea tesa Kuuli ka komiu, sabana gantanamo Magau nu Seta makava. Ia nombakuasai tona nadaa ri dunia hitu tapi ia ledo nakuasa momparenta Yaku.

Yohanes 6:25

Tempo tona dea nosintomu nte i Yesus ri sambote rano, nipekutanaramo, “Guru, ipia Komiu nakava ri sii?”

Suro-Suro 24:16

Haitumo sabana yaku nasaro nompasimbuku mokainggu nabelo ala ledo maria nuapa-nuapa nipoviaku masala ri panggita nu Alatala bara ri panggita nu manusia.

Suro-Suro 24:25

I Paulus nanguli pokaingguta kana manoa, bo kita ledo mamala mangoseaka dota rarata nadaa, apa makava Eo Potangara ngena tempo Alatala mombatangara pura-pura manusia. Nangepe tesa i Paulus, naeka mpuumo i Feliks. Nanguli ia, “Ivesiamo ruru. Ane maria loga damo kupokio pade motesa vai kita.”

Roma 12:2

Domo rapasialamiu kabiasa ntona ledo nosisani nte Alatala. Dekeimo Alatala mompakabaru pekirimiu ala inggumiu mabali. Ane ivesia, rasanimiu mpuu-mpuu dota nu Alatala, haitumo, rasanimiu anu nabelo, anu nipokono nu Alatala, bo anu ledo nasala ri panggitaNa.

Roma 6:12

Jadi nee rapalamba dosa mombakuasai katuvumiu ri dunia hitu, ala komiu ledo mangoseaka dota raramiu anu nadaa.

Roma 6:19

Yaku nompake porapa batua ala ledo makaja rapahamiu pepatudukiku, apa kita manusia da nakura pompahata. Bara ipia komiu nipobatua nu dosa sabana komiu nompalamba karomiu nangoseaka dota raramiu nadaa sampe pokainggumiu nantambai kadaana. Jadi hitupa, dekeimo katuvumiu ka Alatala ala komiu majadi batuaNa anu nanoa bo mpuu-mpuu majadi todeaNa.

Roma 8:13

Sabana, ane kita matuvu mangoseaka dotata mboto nadaa, kita mamate bo rapopogaa lako nte Alatala. Tapi ane rakabasakata pokaingguta nadaa ante kuasa lako nte Nosa Gasa nu Alatala, kita matuvu mabelo sampe ri kasae-saena.

2 Korintus 1:12

Nadamba mpuu rara kami apa nisani kami nabula rara kami. Kami nasaro nokainggu nanoa nte tona pura-pura, nelabipa nte komiu. Pura-pura anu nipovia kami, ledo ria nuapa-nuapa nitabuniaka kami. Patuju kami nanoa, nangoseaka dota nu Alatala. Pokainggu kami ledo nangoseaka kapande nu manusia, tapi nangoseaka pompakule nidekei nu Alatala.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

Galatia 1:4

I Yesus nombadekei karoNa rapatesi mombasompo dosata nangoseaka dota nTuamata Alatala. PatujuNa ala Ia mamala mombakabasaka kita lako ri kuasa nu dunia nadaa.

Galatia 5:24

Isema-sema nosangu rara ante i Yesus Kristus, nireke dota rarara nadaa namate nosanggani-nggani nte i Kristus tempo Ia nipaku ri kayu salib. Batuana, ira domo nikuasai dota rarara nadaa.

Efesus 1:4

Dopame dunia nipajadi, Alatala nompelisi kita majadi todeaNa anu nosangu rara nte i Kristus. Kita nipelisiNa majadi todea anu matuvu magasa bo ledo maria salata ri panggitaNa.

Efesus 2:2

Komiu natuvu nangoseaka kabiasa-kabiasa nu manusia ri dunia hitu, haitumo komiu nangoseaka dota nu Magau Seta, pakeni nu kuasa-kuasa nadaa ri laerava. Iamo nombakuasai rara ntai ntona anu ledo natundu nte Alatala.

Kolose 1:22

Tapi, sii-sii Alatala nompoposinggabelo mpanjili komiu ante Ia sabana kamate i Kristus. I Kristus nombadekei karoNa rapatesi ala komiu majadi magasa, bo komiu ledo masala atau makura ri panggitaNa.

1 Tesalonika 4:7

Kita nipokio nu Alatala ledo matuvu mabuga, tapi nipokioNa matuvu magasa ante pokainggu anu mompakadamba raraNa.

1 Tesalonika 4:9

Sampesuvu-sampesuvu, ledo paraluu kutulisi ka komiu posimpotove sampesuvu sampomparasaya, sabana Alatala mbotomo nompatuduki komiu mosimpotove.

1 Timotius 4:12

Nee mupalamba tona mompandaente iko sabana iko da namuda. Tapi iko kana majadi jonjo ka topomparasaya riara tesamu, pokainggumu, pepotovemu ka roa, pomparasayamu nte i Pue, bo kagasa katuvumu.

1 Timotius 6:17

Timotius, ulika tona nakalumana ri dunia hitu ala nee majadi malanga rarara bo nee aga manjarumaka mbara-mbara ri dunia anu sakide-sakide malipo. Ira kana manjarumaka Alatala anu nompopelabi-labi ka kita mpengaya-ngaya anu niparaluuta rapodamba-dambata.

1 Timotius 6:9

Tapi tona madota majadi makalumana mambela pesori. Ia ratoliani mpengaya-ngaya dota rara nadaa bo nadoyo, bo dota-dota haitu mompakagero katuvuana, mompakanavu ia, bo mompakaropu ia

2 Timotius 3:12

Pura-pura tona anu madota matuvu mangoseaka dota nu Alatala bo matuvu mosangu rara ante i Yesus Kristus, tantu rapandasa.

2 Timotius 4:10

apa domo nadea tona nomporoa yaku. I Demas nompalaisi yaku sabana ia aga nompotove katuvuna ri dunia hitu. Nalai rou ri ngata Tesalonikamo ia. Bo i Kreskes rou ri propinsi Galatia, bo i Titus rou ri bagia Dalmatia.

Titus 3:3

Toramo, kita muni bara ipia da nalanda rarata nasimbayu mpo tona ledo nomparasaya i Yesus. Ledo nisanita dala nakana mosisani nte Alatala bo ledo nioseakata parentaNa. Katuvuta bara ipia nikuasai dota nu rarata nadaa bo kasana nu dunia anu ledo nabelo. Kita natuvu narau rara nanggita roa, nasiriati, bo nosipovuu mata nte tona ntanina.

Ibrani 8:11

Bo ira domo paraluu mompatuduki roa-roa bo sampesuvu-sampesuvura mosisani ante Alatala, sabana ira pura-pura, nau totua, nau ngana, mosisani ante Yaku.

Yakobus 1:27

Tapi poagama nakana, anu ledo rasalai nTuamata Alatala, haitumo nantulungi ngana-ngana pailu bo timbala-timbala nasusa, bo nombajagai karo mboto ala ledo mangoseaka pokainggu nadaa nipovia ntona anu ledo nosisani nte Alatala.

2 Petrus 2:9

Jadi lako ri tesa pangane, nisanita Alatala nompakule mompakasalama topangoseaka dotaNa tempo ira manggava pesori. Bo nipakuleNa muni mombatavani tona nadaa sampe ira rahuku ri Eo Potangara.

2 Petrus 3:11

Jadi sampesuvu-sampesuvu, ane pura-pura anu naria kana maropu ivesia, berimbamo kita? Natantumo kita masipato mangoseaka dota nu Alatala bo matuvu ante pokainggu magasa.

1 Yohanes 2:27

Tapi kakanana domo paraluu tona ntanina mompatuduki komiu, sabana nitarimamiumo Nosa Gasa anu nipopanau i Kristus. Bo Nosa Gasa haitumo naroo riara ntaimiu bo nompatuduki ka komiu pura-pura anu paraluu rasanimiu. PepatudukiNa haitu nakana pura, ledo naria dava. Sabana haitu, komiu kana maroo matuvu mosangu rara nte i Kristus nangoseaka anu nipatuduki Nosa Gasa ka komiu.

1 Yohanes 2:6

Isema-sema nanguli ia natuvu nosangu rara ante Alatala, kana rapasialana katuvu i Kristus.

1 Yohanes 5:19

Nisanita kita najadi ana-ana nu Alatala, bo nisanita tona ledo nomparasaya i Yesus nikuasai Magau nu Seta.

Yudas 1:18

Niulira ivei: “Ane maparamo kaupu nu dunia, kana meumba topesapuaka anu mompongei-ngeika pomparasayata. Ira aga mangoseaka dota rarara nadaa bo ledo raoseakara dota nu Alatala.”

Pompakita 14:12

Anu nopoko ri sii, todea nu Alatala kana maroo momparasaya bo mosabara tempo mombarasai susa, haitumo ira anu nangoseaka parenta-parenta nu Alatala bo ledo nenonto nomparasaya i Yesus.”