Titus 1:16 - Kaili Ledo

¹⁶ Pangulira ira nosisani ante Alatala, tapi pokainggura ledo nosinggambela nte tesara. Pokainggura aga nompakarunggu rara nu Alatala, bo ira ledo nadota natundu nte Alatala. Ledo nipakulera nokainggu nabelo.

Titus 1:16 ပူးပေါင်းရင်းမြစ်များ

Roma 1:28

Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

Efesus 5:6

Jadi, nee komiu rabagiu ntona ante tesa-tesara anu ledo ria gunana, anu nanguli pokainggu ivehaitu ledo nasala. Toramo! Pokainggu ivehaitumo nompopeumba rau rara nu Alatala ka tona ledo natundu nte Ia.

1 Timotius 1:9

Nisanita muni patuju nu Atura-atura haitu ledo mombatagi tona nanoa. Tapi patuju Atura-atura haitu mombatagi tona nombaliunaka atura, tona nadaa, topesapuaka, tona nadosa, tona ledo natundu nte Alatala, tona aga nompekiri kasana dunia bo ledo nompeili agama, tona nompatesi tina tuamana mboto, bo ka pura-pura topepatesi ntanina.

1 Timotius 5:8

Tapi ane maria tona ledo nantulungi sampesuvu-sampesuvuna, nemopa ira sambanua, tona haitu nompoara pepatuduki nakana. Nadaapa ia pade tona ledo nomparasaya.

2 Timotius 3:17

Jadi Buku Gasa mompakagana pura-pura todea nu Alatala sampe rapakulera movia pura-pura pokainggu nabelo.

Titus 3:1

Popatoramo topomparasaya i Yesus ri situ, ira masipato matundu bo mangoseaka parenta nu pomarenta bo totua-totua ngata. Ira kana masadia mantui pura-pura pokarajaa nabelo.

Titus 3:3

Toramo, kita muni bara ipia da nalanda rarata nasimbayu mpo tona ledo nomparasaya i Yesus. Ledo nisanita dala nakana mosisani nte Alatala bo ledo nioseakata parentaNa. Katuvuta bara ipia nikuasai dota nu rarata nadaa bo kasana nu dunia anu ledo nabelo. Kita natuvu narau rara nanggita roa, nasiriati, bo nosipovuu mata nte tona ntanina.

1 Yohanes 2:4

Tona nanguli ia nosisani belo ante Alatala, tapi ledo nioseakana parenta-parenta nu Alatala, tona haitu topodava. Ledo ntoto nioseakana dota nu Alatala.

Yudas 1:4

Nariamo bara sako-ndua tona nesua nggalino-lino ri tatangata ntopomparasaya. Pangulira ira sampesuvuta sampomparasaya, tano mai ira ledo nangoseaka dota nu Alatala. Pangulira ledo makuya kita mangoseaka dota rarata nadaa, apa Alatala nompotove kita bo raampungiNa salata haitu. Tapi pepatuduki haitu ledo ntoto nakana, ira aga nombatenggoaka pepatuduki anu nombatesa kabelo nu Alatala. Nisapura i Yesus Kristus saito-itoNa Magau bo Tuputa. Lako ri nggauluname pehuku rapambela ka ira nipakatantu mamimo bo nitulisi riara Buku Gasa.

Pompakita 21:27

Tapi anu naruto bo tona novia nadaa bo topodava ledo ntoto mamala mesua riara ngata haitu. Tona mamala mesua hamai aga tona nitulisi sangana riara Buku Katuvua nu Ana Bimba.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”