Suro-Suro 9:31 - Kaili Ledo

³¹ Jadi todea topangoseaka i Yesus ri njumangu bagia Yudea, Galilea bo Samaria domo nipandasa. Kasae-sae kadea-dea tona nomparasaya i Yesus, bo todea topomparasaya nantambai karoso pomparasayara sabana ira natundu nte Alatala, bo sabana Nosa Gasa nantulungi ira.

Suro-Suro 9:31 ပူးပေါင်းရင်းမြစ်များ

Suro-Suro 12:24

Namatepa ia, kasae-sae nantambai-mbaimo kadea ntona nangepe Tesa nu Alatala, bo nomparasaya i Pue Yesus.

Suro-Suro 16:5

Jadi ivesiamo pomparasaya ntopangoseaka i Yesus nipakaroso, bo eo-eo nantambai kadea ntopomparasaya.

Suro-Suro 2:47

Ira nasaro nombatoiya Alatala bo pura-pura todea ntanina nompodamba ira. Bo eo-eo nantambai kadea ntona nipakasalama nu Alatala.

Suro-Suro 20:32

Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo ka komiu, haitumo belo nipakasadiaNa ka tona nipelisiNa majadi todeaNa.

Suro-Suro 5:11

Nangepe kajadia haitu, naeka puramo topomparasaya i Yesus bo tona ntanina muni.

Suro-Suro 6:7

Ivesiamo kareba nu Alatala nipatolele njuu bo kadea ntopomparasaya i Yesus ri ngata Yerusalem nantambai mpuumo. Bo nadea muni topanggeni pesomba nangoseaka i Yesus.

Suro-Suro 8:1

I Saulus nadamba apa i Stefanus nipatesira. Nompamula eo haitu todea topangoseaka i Yesus ri ngata Yerusalem mpuu-mpuu nipandasa ntoYahudi sampe ira nasimpotare hau ri njumangu ngata ri bagia Yudea bo Samaria. Aga suro-suro i Yesus ledo nalai.

Roma 14:17

Apa anu nopoko riara Poparenta nu Alatala, ledo anu nikandeta atau niinuta. Anu nopoko, kita manoa rarata, bo matuvu mosinggabelo ante roata, bo madamba rarata sabana Nosa Gasa nu Alatala naria riara ntaita.

Roma 14:19

Haitu sampe kita kana mompasimbuku matuvu mosinggabelo ante roata, bo mosipakaroso rara.

Roma 15:13

Alatala mpuu-mpuu puna panjarumakata! Kuperapi Ia mompakadamba mpuu raramiu bo mombadekei ka komiu katuvua mabelo sabana komiu nomparasaya Ia. Kuperapi panjarumakamiu nte Ia mantambai maroso ante kuasa lako ri Nosa GasaNa.

Roma 5:5

Ane kita manjarumaka Alatala, ledo masoa bukuta. Nisanita Ia mpuu-mpuu mompakadupa pura-pura pojanjiNa, sabana nirasaita tove nu Alatala riara ntaita lako ri pokarajaa nu Nosa Gasa anu nidekei nu Alatala ka kita.

1 Korintus 14:12

Jadi ivesia muni komiu. Ane komiu mompake basa nopuna lako nte Nosa Gasa, tantu ledo rasani nu roa batuana. Komiu mpuu-mpuu madota manggava pompakule lako nte Nosa Gasa nu Alatala. Tapi aginapa komiu merapi Tupu mombadekei ka komiu pompakule mantulungi topomparasaya bo mompakaroso pomparasayara.

1 Korintus 14:26

Jadi sampesuvu-sampesuvuku, nuapa rapoviata? Ivei: ane kita masiromu mombasomba Alatala, saito-saito simbo maria bagiana. Sanu tona modade, sanu mompatuduki, sanu mompakalanto tesa nitarimana lako nte Alatala. Sanu tona motesa riara basa-basa nopuna lako nte Nosa Gasa, bo tona ntanina mombabatuasi tesa-tesa haitu ala rasani ntodea batuana. Pura-pura anu nipoviamiu haitu kana rapovia ala mompakaroso pomparasaya ntodea.

2 Korintus 10:8

Nau yaku madamba gaga mombatesa kuasa nidekei i Kristus ka kami, ledo maeya mataku. Sabana kuasa haitu nidekei i Pue ka kami, ledo mompakagero pomparasayamiu, tapi mompakaroso pomparasayamiu.

2 Korintus 12:19

Nipekirimiu tesa kami hitu bara aga manjaliku karo kami ri ngayomiu? Sampesuvu-sampesuvu nipotoveku, ledo ntoto nakana! Pura-pura hitu nitesa kami sabana kami nosangu rara nte i Kristus bo Alatala mboto nanggita kami. Pura-pura anu nipovia kami, nipovia ala mompakaroso pomparasayamiu.

2 Korintus 13:10

Haitu sampe nitulisiku sura hitu ka komiu dopame yaku tou, ala ane makava ri situ nte komiu yaku, ledo paraluu makasara yaku mompakabelo pokainggumiu ante kuasa nidekei nTupu ka yaku. Apa kuasa haitu nidekeiNa ka yaku ala mompakaroso komiu, ledo ala mompakagero komiu.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

Efesus 4:12

NipaleleNa pedekei haitu ala kita todea nu Alatala rapakagana ala rapakuleta mantui pokarajaa nu Alatala. PatujuNa muni ala kita anu najadi karo i Kristus mantambai karosota,

Efesus 4:16

bo kita todea topomparasaya nirapaka sipa nu karoNa. Ri karo manusia sipa nu karo nikuasai nu balengga. Sipa-sipa haitu niposidumpa pakabelo-belo bo niposiumpu ante uva ala majadi sangu karo. Bo ane pura-pura sipa haitu mokarajaa mangoseaka pompakule nidekei ka ia, njumangu karo haitu matuvu mabelo bo mantambai maroso. Ivesia muni kita topomparasaya. Kita pura-pura nosangu rara nte i Kristus bo Ia nompopakasangu kita. Jadi ane kita mosimpotove bo mositulungi, mantambai kabelona kasintuvuta bo karoso pangoseakata i Pue.

Efesus 4:29

Sampesuvu-sampesuvu, ane komiu motesa, nee rasovadakamiu tesa nadaa tapi sovadakamo tesa-tesa masipato, anu mombatulungi bo mompakaroso rara ntona ntanina. Tesa-tesa ivehaitu manggeni belo ka topangepena.

Efesus 5:21

Pekoumo nte roamiu ntanina sampomparasaya sabana komiu nombabila i Kristus.

Filipi 2:1

Jadi sampesuvu-sampesuvu, nisaniku narosomo pomparasayamiu sabana komiu nosangu rara ante i Kristus. Raramiu nipakavoe sabana komiu nipotoveNa. Komiu nasintuvu ante Nosa Gasa nu Alatala bo komiu muni nosimpotove bo nosipoasi mata.

Kolose 1:10

Ane rasanimiu dota nu Alatala ka komiu, mamala komiu matuvu ante pokainggu masipato ka topomparasaya i Pue, bo pura-pura inggumiu mompakadamba raraNa. Komiu mompakule movia mpengaya-ngaya anu nabelo, bo posisanimiu ante Alatala mantambai munimo.

1 Tesalonika 5:11

Sabana haitu, sampesuvu-sampesuvu, posipakadidimo raramiu, bo posipakarosomo pomparasayamiu mpo anu nipoviamiumo.

1 Timotius 1:4

Ulika ira, tumo mompekirika tutura-tutura anu ledo nakana bo sunju-sunju muli ntotua nggaulu anu ledo ria kaupu-upuna. Pura-pura haitu aga nanggeni tona mosinjanai, bo ledo nanggeni tona mangoseaka nia nu Alatala mompakasalama manusia sabana pomparasayara Ia.

Ibrani 4:9

Jadi da nariapa loga ka kita todea nu Alatala menonto mosanggani-nggani ante Ia nasimbayu mpo penontoNa ri eo kapapituna.

Yudas 1:20

Sampesuvu-sampesuvu nipotoveku, posipakaroso pomparasayamo komiu nangoseaka pepatuduki nakana, sabana pepatuduki niparasayata haitu nagasa mpuu. Bo posambayamo ante pekeniaka Nosa Gasa nu Alatala.