Suro-Suro 9:17 - Kaili Ledo

¹⁷ Jadi haumo i Ananias ri banua i Yudas ri Dala Noa. Bo nesuamo ia riara banua bo nidikana palena ri balengga i Saulus, bo nanguli, “Sampesuvuku Saulus. I Pue Yesus nikitamu ri tatanga nu dala tempo komiu nolipa tumai, Iamo nombatudu yaku tumai, ala komiu mekita mpanjili bo rakuasai nu Nosa Gasa nu Alatala.”

Suro-Suro 9:17 ပူးပေါင်းရင်းမြစ်များ

Matius 19:13

Naria sanggani tona nanggeni ana-anara hau nte i Yesus ala radikaNa paleNa ri karora bo mosambaya ka ira. Tapi ana-anaguru i Yesus nompokarau tona gahaitu.

Markus 5:23

bo nerapi ante rarana mpuu-mpuu, <>

Markus 6:5

Ri ngata haitu ledo nadea kabaraka nipovia i Yesus, aga nompakabelo bara sako-ndua tona nadua ante nombadika paleNa ri karora.

Lukas 1:41

Nangepe petabe i Maria, nokalelomo ngana riara i Elisabet. Bo i Elisabet nipesua Nosa Gasa nu Alatalamo,

Lukas 1:67

Tempo haitu i Zakharia, tuama nu ngana haitu, nikuasai Nosa Gasa nu Alatala sampe nipasimbayuna tesa nTupu ka ira, haitumo anu rapovia nTupu ngena.

Lukas 1:76

Pade nanguli i Zakharia ka anana, “Iko, anaku, rakasangai nabi nu Alatala toNeliu KaogeNa, sabana iko majadi suro nTupu. Iko manguli ka topangoseaka Tupu, ira kana masadia mantarima Ia.

Lukas 15:30

Damo nakava anamiu nompakaupu kakalumanamiu nikenina hau nongei ka bajinga, bo nisambalekamiu japi ka ia.’

Lukas 15:32

Tapi kita masipato mosusa madamba sabana tueimu namate, natuvu mpanjili. Ia nalipomo tapi sii-sii nikavata mpanjili.’ ”

Lukas 2:11

Bongina hitu ri ngata pompoanaka Magau Daud, nipoanakamo saito magau mompakasalama komiu. Iamo i Pue, anu nipelisi nu Alatala.

Suro-Suro 10:36

Sampesuvu-sampesuvu, nisanimiu mbotomo isi kareba nipasimbayu nu Alatala ka kami toIsrael. Kareba haitu nanguli i Yesus Kristus anu nompoposinggabelo manusia ante Alatala. I Yesusmo Tuputa pura-pura, ledo aga Tupu ntoYahudi.

Suro-Suro 13:3

Jadi naliu ira nopuasa bo nosambaya, nidikara palera ri balengga i Barnabas bo i Saulus, bo nianggatakara majadi suro mompatolele Kareba Belo.

Suro-Suro 13:52

Topangoseaka i Yesus ri ngata Antiokhia nadamba mpuu rarara, bo ira nikeniaka nu Nosa Gasa nu Alatala.

Suro-Suro 19:6

I Paulus nombadika palena ri balenggara bo kaliu-liu Nosa Gasa nu Alatala nombakuasai ira. Pade ira notesa ante basa-basa nidekei nu Nosa Gasa ka ira bo nipasimbayura tesa lako nte Alatala.

Suro-Suro 2:4

Ira pura-pura nikuasai Nosa Gasa nu Alatala bo nompamulamo notesa ante mpengaya basa ntanina nisovadakara nangoseaka anu nidekei nu Nosa Gasa ka ira.

Suro-Suro 21:20

Naupu nangepe tesa i Paulus, i Yakobus ante pakeni-pakeni ntanina, nantoiya Alatala. Niulira ka i Paulus, “Sampesuvu, kana rasanimiu nonjobu-njobumo toYahudi nomparasaya i Yesus, tapi ira pura-pura da batena nangoseaka Atura-atura agama anu nipapola Nabi Musa.

Suro-Suro 26:15

Nesana yaku, ‘Isema komiu, Pua?’ Nanguli vaimo suara haitu, ‘Yakumo hii i Yesus, tona nipandasamu!

Suro-Suro 4:31

Naupu ira nosambaya, banua nikasiromura haitu nogoya. Ira pura-pura nikuasai nu Nosa Gasa nu Alatala, bo nipatolelera tesa nu Alatala bo domo ntoto naeka rarara.

Suro-Suro 6:6

Tona papitu haitu nikenikara ka suro-suro bo naupu nosambaya, suro-suro nombadika palera ri balengga ntona haitu mombalanti ira majadi topotulungi suro-suro.

Suro-Suro 8:17

Jadi, i Petrus bo i Yohanes nombadika palera ri balengga ntoSamaria haitu bo Nosa Gasa nanau nte ira mpuu.

Suro-Suro 9:18

Naupu i Ananias notesa haitu, kaliu-liu nanavu anu eva ruke bau lako ri mata i Saulus sampe nekita mpanjilimo ia. Naupu haitu, nembangumo i Saulus bo nidiu, tandana niparasayanamo i Yesus.

Roma 15:7

Jadi sampesuvu-sampesuvu, kita kana mositarima belo, nasimbayu mpo i Kristus nantarima kita. Ane mositarima belo kita, Alatala rabila bo ratoiya ntona.

1 Korintus 15:47

Manusia paratama haitu nipajadi lako ri tana bo nonturo ri dunia hitu. Tapi i Kristus, anu nireke i Adam karanduana, nopuna lako ri suruga.

1 Korintus 15:8

Bo kaupuna nipopakitaNa munimo karoNa ka yaku, nau yaku nasimbayu mpo ngana nesuvu dopa nagana mbulana.

1 Korintus 9:1

Yaku hii nakuasa novia nuapa-nuapa nipodotaku. Yaku hii suro i Yesus. Yaku mboto nanggita Tuputa i Yesus. Bo komiu mbotomo asele pokarajaa nipoviaku ka i Pue.

1 Timotius 4:14

Nee malinga mompake pompakule nidekei nu Nosa Gasa ka iko tempo tona nompasimbayu petevai lako nte Alatala ka iko bo pakeni ntopomparasaya nodika palera ri balenggamu.

1 Timotius 5:22

Nee masalisa gaga mombadika palemu ri karo ntona manganggataka ia majadi pakeni ntopomparasaya. Paresa ntani ruru ingguna, apa ane ia movia dosa ngena, ikomo rapakasala. Nee sampe karomu matekeni nte dosa ntona ntanina. Jagaimo pokainggumu mboto ala iko batena matuvu ante pokainggu nagasa.

2 Timotius 1:6

Sabana haitu, kupopatora ka iko, iko kana mpuu-mpuu mompake pompakule nidekei nu Alatala ka iko tempo yaku nosambaya nombadika paleku ri karomu bara ipia.

Filemon 1:16

Jadi sii-sii ia domo aga batuamu, tapi nelabipa pade batua, haitumo, ia sampesuvuta sampomparasaya anu nipotoveta. Iyapa yaku nompotove ia, nemopa iko! Iko nompotove ia sabana ia batuamu, bo muni sabana ia sampesuvumu sampomparasaya.

Ibrani 6:2

Nee aga mombasili pepatuduki ada pediu, atau ada mombadika pale ri balengga ntona merapi belo ka ira. Nee aga mombasili pepatuduki matuvu mpanjili lako ri kamatea bara maipia atau pepatuduki pehuku sampe ri kasae-saena. Nee aga mombasili-sili pepatuduki pamulana haitu, kana ratambaipa!

2 Petrus 3:15

Toramo, posabara nTupu nombadekei loga ka manusia rapakasalama. Ivesia muni nitulisi nu sampesuvuta i Paulus nipotoveta. Surana haitu nitulisina nangoseaka noto nidekei nu Alatala ka ia.