Suro-Suro 5:21 - Kaili Ledo

²¹ Naupu nangepe tesa haitu, hau mpuumo suro-suro nanturusi anu niuli nu malaeka ka ira. Nasadondo mpuu ira hau ri doyata Banua nu Alatala bo nompamulamo nompatuduki tona ri sia. Tempo haitu Pakeni nTopanggeni Pesomba ante roa-roana nompokio pura-pura pakeni-pakeni ntoYahudi masiromu ri Polibu Mbaso Agama. Nitudura tona hau mangala suro-suro lako ri tarunggu, rakeni ratangara ri ngayora.

Suro-Suro 5:21 ပူးပေါင်းရင်းမြစ်များ

Matius 5:22

Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.

Lukas 22:66

Naeo mpadondo nasiromumo tona ri Polibu Mbaso Agama Yahudi, haitumo totua-totua ntoYahudi, balengga-balengga ntopanggeni pesomba, bo guru-guru agama. Pade nikenira i Yesus hau ri ngayo ntoPolibu haitu.

Yohanes 18:35

Nanguli i Pilatus, “Nisaniku tano? Yaku ledo toYahudi! TodeaMu mboto bo balengga-balengga ntopanggeni agama nanggeni Iko tumai nte yaku. Sala nuapa ntoto nipoviaMu?”

Yohanes 8:2

Kamaile bobayana, hau vaimo Ia nesua ri doyata Banua nu Alatala, bo nakavamo todea nasiromu nte Ia. Nonturomo Ia bo nompatuduki ira.

Suro-Suro 22:15

Iko majadi sabiNa ka pura-pura tona bo mupatolele anu nikitamu bo anu niepemu.

Suro-Suro 22:5

Pakeni nTopanggeni Pesomba mboto bo pura-pura toPolibu Mbaso Agama Yahudi mamala mombasabiki tesaku hitu nakana. Apa ira mbotomo nombadekei ka yaku sura rakeni ka toYahudi ri ngata Damsyik. Sura haitu nombadekei kuasa ka yaku ala yaku mamala mombasaka topomparasaya pepatuduki i Yesus sumai bo manggeni ira tumai ri ngata Yerusalem bo rahuku.”

Suro-Suro 5:17

Kaupuna Pakeni nTopanggeni Pesomba ante roa-roana anu nangoseaka pepatuduki ntoSaduki, nasiriatimo nanggita kadea ntona nomparasaya i Yesus. Jadi ira nompamula nompandasa suro-suro i Yesus.

Suro-Suro 5:27

Suro-suro nikenira nesua nantingayo Polibu Mbaso. Pade Pakeni nTopanggeni Pesomba nomparesa ira, ivei:

Suro-Suro 5:34

Tapi riara Polibu Mbaso naria saito toFarisi nosanga i Gamaliel. Ia guru agama mpuu-mpuu nipakaoge ntodea. Ia neangga bo nantudu tona manggeni suro-suro mesuvu ri savalikuna sampalai ala ledo raepera tesana.

Suro-Suro 5:41

Suro-suro nompalaisi Polibu haitu bo nadamba mpuu rarara sabana ira nireke nu Alatala masipato mombarasai kasusa bo kapari sabana pangoseakara i Yesus.