Suro-Suro 5:11 - Kaili Ledo

¹¹ Nangepe kajadia haitu, naeka puramo topomparasaya i Yesus bo tona ntanina muni.

Suro-Suro 5:11 ပူးပေါင်းရင်းမြစ်များ

Suro-Suro 19:17

Pura-pura toYahudi bo tona ledo toYahudi, anu nonturo ri ngata Efesus nangepe kajadia haitu. Nokumaa puramo ira bo niulira i Pue Yesus nakuasa mpuu.

Suro-Suro 2:43

Nadea mpuu kabaraka bo tanda-tanda nipokumaaka nipovia nu suro-suro sampe nokumaa bo naeka todea.

Suro-Suro 5:5

Naupu i Ananias nangepe tesa i Petrus, kaliu-liu nadunggamo ia bo namate. Bo nakava bara sako-ndua kabilasa mombasompu karobatana, bo nikenira hau ratana ri savalikuna. Pura-pura tona naeka mpuu nangepe anu najadi haitu.

Suro-Suro 9:31

Jadi todea topangoseaka i Yesus ri njumangu bagia Yudea, Galilea bo Samaria domo nipandasa. Kasae-sae kadea-dea tona nomparasaya i Yesus, bo todea topomparasaya nantambai karoso pomparasayara sabana ira natundu nte Alatala, bo sabana Nosa Gasa nantulungi ira.

Filipi 2:12

Jadi sampesuvu-sampesuvu nipotoveku, komiu nasaro nangoseaka pepatudukiku tempo yaku da nosanggani-nggani ante komiu. Jadi kuperapi komiu batena mangoseaka pepatudukiku, nemopa sii-sii kita nosinggavao. Alatala nompakasalama komiu bo nidekeiNa katuvu nabelo ka komiu. Jadi pasimbuku njuumo matuvu manoa, maeka mokainggu nadaa, sampe kaupuna katuvumiu nabelo haitu ledo makura nuapa-nuapa.

Ibrani 11:7

Lako ri pomparasaya i Nuh, ia natundu nte Alatala. Alatala nompopaisani ka i Nuh maria uve oge ngena mompakagero dunia. Jadi, nau dopa nikitana kajadia haitu, nioseakana parenta nu Alatala bo nipoviana kapala mbaso ala ira sambanua masalama. Lako ri pomparasayana haitu, pura-pura manusia ntanina ri dunia nireke nu Alatala masipato rahuku sabana ira ledo nomparasaya. Tapi i Nuh nireke nu Alatala nanoa sabana pomparasayana.

Ibrani 12:15

Jagaimo! Nee sampe maria komiu moura momparasaya bo mompoara kabelo rara nu Alatala. Nee sampe maria tona majadi mpo tuda-tuda nelangu ri tatangamiu, anu nompakasusa todea ante racuna, sampe nadea tona nikeni riara dosa.

Ibrani 12:28

Jadi haitu sampe kita masipato manguli tarima kasi nte Alatala, sabana Ia nombadekei loga ka kita majadi todea riara PoparentaNa bo PoparentaNa haitu ledo ntoto mogoya. Bo kita kana metupu nte Alatala ante cara nipodambaNa. Kita kana mekou nte Ia bo maeka movia anu ledo nipokonoNa.

Ibrani 4:1

Sampesuvu-sampesuvu, da naria pojanji nu Alatala nombadekei loga ka kita menonto mosanggani-nggani ante Ia. Haitu sampe kita kana mainga ala nee maria saitoa kita maboli.

1 Petrus 1:17

Sampesuvu-sampesuvu, komiu nanggasangai Alatala Tuamamiu tempo komiu nosambaya. Jadi komiu kana matuvu mekou nte Ia ane komiu da nonturo mpo topesovo ri dunia hitu. Apa Iamo mombatangara pura-pura tona nangoseaka pokainggura mboto bo Ia ledo nompelenje.

Pompakita 15:4

Pue, pura-pura manusia mekou nte Komiu. Pura-pura tona mombabila bo mombatoiya kaogeMiu, sabana aga Komiu mpuu-mpuu nagasa. Pue, pura-pura tona ri dunia makava mombasomba Komiu, sabana nisanira pura-pura pobotusiMiu nanoa.”