Suro-Suro 3:26 - Kaili Ledo

²⁶ Haitumo sabana Alatala nanganggataka BatuaNa i Yesus, bo nantudu Ia tumai nte kita toYahudi ntani ruru, ala radekeiNa belo ka kita, haitumo, Ia manggeni kita majea lako ri pokaingguta nadaa.”

Suro-Suro 3:26 ပူးပေါင်းရင်းမြစ်များ

Matius 1:21

I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

Matius 15:24

Nesana i Yesus, “Yaku hii aga nitudu mantulungi muli Israel, anu nasimbayu eva bimba nalipo.”

Lukas 24:47

Kareba Belo kana rapatolele ka pura-pura manusia; ala ira majea lako ri dosara bo Alatala mombaampungi ira sabana anu nipovia nu Magau Topepakasalama. Kareba haitu kana rapatolele mompamula lako ri ngata Yerusalem hitu sampe ri njumangu dunia.

Yohanes 4:22

Komiu toSamaria ledo nisanimiu mpuu Alatala. Tapi kami toYahudi nisani kami isema nisomba kami, apa Magau Topompakasalama manusia meumba lako nte kami toYahudi.

Suro-Suro 1:8

Tapi komiu manggava kuasa ane Nosa Gasa nu Alatala manau nte komiu. Bo komiu mompatolele karebaKu ka tona ri ngata Yerusalem, ri bagia Yudea bo Samaria, sampe ri njumangu dunia.”

Suro-Suro 13:26

I Paulus nompapola tesana ivei: “Sampesuvu-sampesuvu muli i Abraham bo sampesuvu-sampesuvu ntanina anu natundu nte Alatala. Alatala nompakatu ka kita kareba anu mompakalanto berimba Alatala mompakasalama kita.

Suro-Suro 2:24

Komiu nompatesi i Yesus, tapi Alatala nompakatuvu mpanjili Ia lako ri kamateNa. NikabasakaNa Ia lako ri kuasa kamatea, sabana Ia ledo ntoto namala rataamaka ri ponturo ntona namate.

Suro-Suro 2:32

I Yesusmo hii niuli i Daud pangane, sabana Iamo tona nipakatuvu nu Alatala mpanjili. Kami pura-pura hii najadi sabiNa, sabana kami mboto nanggita i Yesus natuvu mpanjili.

Suro-Suro 26:20

Yaku nompatolele ka pura-pura tona, kita kana majea lako ri dosa-dosata bo mombadekei katuvuta ka Alatala. Ane kita mpuu-mpuu majea lako ri dosa-dosata haitu, kana rapopakitatamo ante pokainggu mabelo. Pamula-mulana nipatoleleku kareba haitu ka toYahudi ri ngata Damsyik, pade hau ri ngata Yerusalem bo njumangu bagia Yudea. Bo nitesaku muni ka tona ledo toYahudi.

Suro-Suro 3:13

Alatala anu nisomba ntotuata bo Nabi Abraham, i Ishak, bo i Yakub, Iamo nombabila bo nompakaoge BatuaNa i Yesus. I Yesus haitumo nidekeimiu ka pomarenta, bo Iamo nipoaramiu ri ngayo i Pilatus tempo i Pilatus madota mombakabasaka Ia.

Suro-Suro 3:15

Komiumo nombatudu tona nompatesi Ia, tano Iamo topombadekei katuvu nabelo sampe ri kasae-saena ka manusia. Bo Alatala nompakatuvu mpanjili Ia lako ri kamateNa. Kami najadi sabiNa, sabana kami mboto nanggita i Yesus natuvu mpanjili.

Suro-Suro 3:20

Bo Alatala mompakaroso bo mompakasana raramiu. Bo Ia muni mombatudu i Yesus makava nte komiu, sabana i Yesus hitumo nipelisi nu Alatala majadi Magau anu mompakasalama komiu.

Suro-Suro 3:22

Sampesuvu-sampesuvu, naria tesa Nabi Musa nggaulu nombatesa i Yesus ivei: ‘Tupumiu Alatala manganggataka saito lako ri sampesuvumiu mboto majadi nabi nasimbayu mpo yaku. Komiu kana mangoseaka nuapa pura raulina ka komiu.

Suro-Suro 3:25

Janji-janji nu Alatala anu nipasimbayu nu nabi-nabi, nambela komiu sii-sii. Pojanji nipovia nu Alatala nte totuamiu nggaulu nambela muni nte komiu. Alatala nojanji ka Nabi Abraham, totuata nggaulu ivei: ‘Lako ri mulimu ngena, Kudekei belo ka pura-pura manusia ri dunia.’ Kajadia 22:18; 26:4 Jadi sampesuvu-sampesuvu, komiumo nantarima belo nijanji nu Alatala haitu!

Roma 1:16

Ledo naeya mataku nompatolele Kareba Belo. Apa Kareba Belo haitu pareva nu Alatala mompakasalama pura-pura tona anu nomparasaya i Yesus, pamula-mulana toYahudi, bo muni tona ledo toYahudi.

Roma 15:29

Bo nisaniku ane yaku makava nte komiu, natantumo madea belo lako nte i Kristus kukeni ka komiu.

Roma 15:8

Toramo, i Kristus nakava ri dunia mombatulungi toYahudi, ala pojanji nu Alatala ka totuara nggaulu madupa bo rasani ntona pura-pura, tesa nu Alatala namala raparasaya.

Efesus 1:3

Ratoiyata Alatala, Tuama nTuputa Yesus Kristus! NidekeiNa ka kita mpengaya-ngaya belo lako ri suruga sabana kita nosangu rara ante i Yesus Kristus.

1 Petrus 1:3

Masipato kita mombatoiya Alatala, Tuama nTuputa Yesus Kristus! Nambaso mpuu asi mataNa ka kita, sampe nidekeiNa katuvu nabaru ka kita. Bo katuvu nabaru haitu nitarimata sabana i Yesus Kristus nipakatuvu mpanjili lako ri kamateNa. Haitumo sabana panjarumakata naroso.

1 Petrus 3:9

Ane maria tona movia anu nadaa nte komiu, nee rabalasi ira ante anu nadaa. Ane rasalai ntona komiu, nee rapesava. Agina komiu merapi Alatala mombadekei belo ka ira. Apa komiu nipokio nu Alatala manggeni belo ka tona ntanina, ala komiu manggava belo lako nte Ia.

Yudas 1:24

Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.