Suro-Suro 28:9 - Kaili Ledo

⁹ Nangepepa kajadia haitu, pura-pura tona nadua ri levuto haitu nakava nte i Paulus, bo nipakabelona muni ira.

Suro-Suro 28:9 ပူးပေါင်းရင်းမြစ်များ

Matius 4:24

Kareba povia i Yesus haitu natolele ri umba-umba bagia Siria, sampe tona nanggeni ka Ia pura-pura roara nambela dua mpengaya, tona nipesua nu seta, torompate bo tona nakoyo. Bo i Yesus nompakabelo ira pura-pura bo nipopalaiNa puramo seta.

Suro-Suro 13:6

Naupu ira noliu njumangu levuto Siprus, nakavamo ira ri ngata Pafos. Ri sia ira nosinggava nte toYahudi nosanga Bar-Yesus. I Bar-Yesus nosanga muni i Elimas riara basa Yunani. I Elimas haitu toposibalimata bo niulina ia nabi nu Alatala, tano ledo nakana. Gubernur ri levuto haitu nosanga i Sergius-Paulus bo ia novega nte toposibalimata haitu. Gubernur haitu tona natau bo nanoto pekirina. Ia nompokio i Barnabas bo i Saulus, apa ia madota mangepe tesa nu Alatala. Tapi i Elimas, toposibalimata haitu, nangeva i Barnabas bo i Saulus sabana ledo nipokonona gubernur momparasaya i Yesus.

Suro-Suro 28:10

Nadea hadia nidekeira ka kami, tandana pobilara kami. Bo bara sakuya kasaena naliutaka haitu tempo kami manggalivo malaimo, pura-pura anu niparaluu riara polipa kami, nikenira hau ri kapala nipesavi kami.

Suro-Suro 28:8

Tempo haitu, tuama i Publius kambale-mbale naturu apa nakokora bo nabunjoro. Jadi i Paulus hau nesua nte ia, nombadika palena ri karo ntotua bo nosambaya. Naliu haitu nabelomo totua.

Suro-Suro 5:12

Nadea mpuu kabaraka bo tanda-tanda nipokumaaka nipovia nu suro-suro ri mata ntodea. Bo topangoseaka i Yesus nosangu rara nasiromu ri Banua nu Alatala ri Tambale Magau Salomo.

Suro-Suro 5:15

Nanggita kabaraka-kabaraka nipovia nu suro-suro, nadea tona nadua nikeni ante paturu bara ante ompa bo nituu ri dala. Apa nisarumakara ane moliu i Petrus ngena, nau aga vayona mambela sakide, mabelomo ira.