Suro-Suro 14:19 - Kaili Ledo

¹⁹ Naupu haitu, bara sako-ndua toYahudi lako ri ngata Antiokhia ri propinsi Pisidia bo muni lako ri ngata Ikonium nakava ri ngata Listra. ToYahudi haitu nantanara todea ri ngata Listra ala ira muni mangeva i Paulus sampe ira nombarempe i Paulus ante vatu bo niumbunjaira hau ri savaliku ngata. Niulira namatemo ia.

Suro-Suro 14:19 ပူးပေါင်းရင်းမြစ်များ

Suro-Suro 13:14

Lako ri ngata Perga, i Paulus bo i Barnabas nompapola polipara hau ri ngata Antiokhia ri propinsi Pisidia. Ri eo penonto, hau ira nesua nonturo riara banua petupu ntoYahudi.

Suro-Suro 13:45

Nanggita todea haitu, nasiriati mpuumo rara nu pakeni ntoYahudi. Nisalaira i Paulus, bo nievara pura-pura anu niulina.

Suro-Suro 14:1

Anu najadi ri ngata Antiokhia najadi munimo ri ngata Ikonium. I Paulus bo i Barnabas hau ri banua petupu ntoYahudi, bo ri sia nitesa-tesara ka tona sampe nadea toYahudi bo tona ledo toYahudi nomparasaya i Yesus.

Suro-Suro 14:18

Nau suro-suro notesa ivehaitu, sakidepa ledo nipakulera mombataamaka todea manggeni pesomba ka ira.

Suro-Suro 14:2

Tapi toYahudi anu ledo nadota nomparasaya, aga nompakapane rara ntona ntanina ledo toYahudi sampe navuu matara nanggita topangoseaka i Yesus.

Suro-Suro 14:21

Ri ngata Derbe, i Paulus bo i Barnabas nompatolele Kareba Belo bo nadea tona nomparasaya i Yesus. Naupu haitu nanjilimo ira randua hau ri ngata Listra. Lako ri ngata Listra hau ri ngata Ikonium pade napola hau ri ngata Antiokhia ri propinsi Pisidia.

Suro-Suro 14:26

Ri sia ira nesavi kapala mbaso bo nanjili hau ri ngata Antiokhia ri propinsi Siria. Ri ngata Antiokhia haitumo nipanganggataka ira bara ipia bo niposambayaka ntopangoseaka i Yesus. Niposambayaka ala Alatala mompoasi bo mombajagai ira riara pokarajaara anu dako nipakaupura sii-sii.

Suro-Suro 14:4

Tapi tona ri ngata haitu ledo nasintuvu. Naria nosabingga ka toYahudi, bo naria muni nosabingga ka suro-suro.

Suro-Suro 14:5

ToYahudi bo pakeni ntoYahudi nosanggani-nggani ante tona ntanina ledo toYahudi, nasintuvu mompandasa bo mombarempe i Paulus bo i Barnabas ante vatu.

Suro-Suro 15:26

I Paulus bo i Barnabas mai, ledo natove rarara nte katuvura mboto, nau rapatesi ntona, ira bate-batena mokarajaa ka Tuputa Yesus Kristus.

Suro-Suro 17:13

ToYahudi ri ngata Tesalonika nangepe i Paulus naria ri ngata Berea nompatolele Tesa nu Alatala. Jadi hau muni ira ri ngata Berea bo nipoviara kagado bo nipakapanera rara ntodea.

Suro-Suro 22:20

Ivesia muni tempo sabiMiu i Stefanus nipatesira. Nisanira yaku mboto naria ri sia bo yaku nasituju ia rapatesi. Bo yakumo nombajagai pakea ntona nompatesi ia. Jadi kana raparasayara tesaku.’

Suro-Suro 7:58

Nidiisakara hau ri savaliku ngata, bo nirempera vatu. Sabi-sabi mpodava ri Polibu Mbaso pangane, nombavonju bajura bo nibolira nte tona nosanga i Saulus, ala mabelo ira mombarempe i Stefanus.

Suro-Suro 9:16

Damo Yaku mboto manguli ka ia kasusa rakavana sabana nioseakana Yaku bo nipatolelena karebaKu.”

1 Korintus 15:31

Sampesuvu-sampesuvu, eo-eo nisarumakaku yaku rapatesi sabana pokarajaaku nompatolele Kareba Belo. Nisani nu Alatala nadamba mpuu raraku sabana komiu nosangu rara nte Tuputa i Yesus Kristus. Ivesia muni nisaniNa tesaku hitu nakana mpuu, yaku ledo nodava!

2 Korintus 11:23

Batua i Kristus ira? Tesaku hitu eva tesa ntogila! Yaku batua i Kristus anu nelabi nabelopa pade ira! Nantamopa pokarajaaku pade pokarajaara! Nasaropa yaku nisuaraka riara ntarunggu pade ira! Yaku nicambu pakandasapa pade ira, bo nadea ngganimo yaku sakidepa namate!

2 Korintus 11:25

Talu-ngganimo yaku niboba ntoRoma ante kayu. Sanggani yaku nirempe ntona ante vatu apa ira madota mompatesi yaku. Talu-ngganimo kapala-kapala nipesaviku natala rantasi, bo naria sanggani yaku nonanggo rara ntasi saeo sambongi.

2 Korintus 11:26

Nadea ngganimo nirasaiku kasusa riara mpolipaku. Naria uve lono. Naria muni topeago. Yaku nipandasa ntoYahudi bo muni tona ledo toYahudi. Yaku nombarasai susa riara ngata bo ri kataolosana bo rara ntasi. Bo yaku nombarasai susa lako nte tona nanguli ira sampesuvu sampomparasaya, tano mai ledo.

1 Tesalonika 2:14

Sampesuvu-sampesuvu, nisani kami Alatala nokarajaa riara nggatuvumiu apa pepandasa nirasai ntodea nu Alatala anu nomparasaya i Yesus Kristus ri bagia Yudea, nirasaimiu munimo. Komiu nipandasa roamiu sangata, nasimbayu mpo pepandasa roara simbo toYahudi anu ledo nomparasaya i Yesus.

2 Timotius 3:11

Nipeintamu mbotomo berimba yaku naroo tempo yaku nipandasa bo nipakasusa evamo najadi ri karoku ri ngata-ngata Antiokhia, Ikonium, bo Listra bara ipia. Yaku mpuu-mpuu nipandasa, tapi Tupu bate-batena nompakasalama yaku lako ri pura-pura kasusaku haitu.