Suro-Suro 12:3 - Kaili Ledo

³ Nisani i Herodes poviana haitu nompakadamba rara ntoYahudi, jadi nipoviana vaimo mpo pangane. Niparentanamo tona mombasaka i Petrus muni. Haitu najadi tempo Posusa Roti Ledo Noragi.

Suro-Suro 12:3 ပူးပေါင်းရင်းမြစ်များ

Matius 26:17

Ri eo pamulana Posusa Roti Ledo Noragi, nakavamo ana-anaguru i Yesus nompekutana Ia, “Pue, ri umba rapodotaMiu rapompakasadia kami kandea Paskah ka kita?”

Yohanes 12:43

Ira nomparasaya nggalino sabana nipokonorapa ratoiya nu manusia pade ratoiya nu Alatala.

Yohanes 19:11

Nesana i Yesus, “Ane Alatala ledo mombadekei kuasa ka komiu, komiu ledo mamala mombakuasai karoKu. Jadi dosa ntona anu nanggeni Yaku tumai nte komiu nambasopa pade dosamiu.”

Yohanes 21:18

Pariaramo tesaKu hitu, tempo iko da namuda iko mboto nompou kopemu bo hau ri umba-umba nipodotamu. Tapi ane matuamo iko, iko kana mombadekei palemu ratipunggu ntona ntanina, bo iko rakeni ntona hau ri ponturo anu ledo nipokonomu.”

Suro-Suro 12:4

Naupu i Petrus nisaka, nisuarakara riara ntarunggu, bo Magau Herodes nantudu ampa lunu tantara mombajagai ia, ampa tantara salunu. Patuju i Herodes ala i Petrus ratangara ri ngayo ntodea maliutaka Eo Mbaso Paskah.

Suro-Suro 2:14

Nangepe tesa ntona haitu, neanggamo i Petrus nosanggani-nggani ante sapulu saito suro ntanina, bo notesamo ia ka todea ante suara namangga. Niulina, “Sampesuvu-sampesuvuku toYahudi, bo pura-pura toponturo ri ngata Yerusalem! Epemo pakabelo-belo, kupakalanto ka komiu batuana anu najadi ri sii pangane.

Suro-Suro 20:6

Naupu haitu pade nituntuni kami dala kabatana sampe ri ngata Filipi. Naliutaka eo mbaso ntoYahudi niuli Posusa Roti Ledo Noragi, kami nesavi kapala lako ri ngata Filipi. Lima-mbongi kami ri dala pade nosintomu ante roa-roa kami ri ngata Troas. Jadi kami nonturo ri sia saminggu kasaena.

Suro-Suro 24:27

Rompae kaliuna, i Feliks nisambei, bo i Perkius Festus najadi gubernur ri bagia haitu. Tempo nolinja i Feliks, ia madota mangala rara ntoYahudi, jadi nipalambanamo i Paulus riara ntarunggu.

Suro-Suro 25:9

Tapi i Festus madota mangala rara ntoYahudi, jadi nipekutanana nte i Paulus, “Madota iko hau ri ngata Yerusalem ala anu nipangadukara iko hitu ratangara ri ngayoku hamai?”

Suro-Suro 4:13

Topolibu haitu nokumaa pura-pura nanggita kabia i Petrus bo i Yohanes notesa, nemopa nisanira randua suro haitu aga tona biasa anu ledo nosikola nalanga. Lako rahaitu nisanira mpuumo randua suro haitu nosamporoa nte i Yesus bara ipia.

Galatia 1:10

Jadi, berimbamo, sampesuvu-sampesuvu? Yaku nanguli ivesia mbeki ratoiya ntona? Ledo ntoto nakana! Yaku aga madota ratoiya nu Alatala. Bara nipekirimiu yaku aga madota mompakadamba rara nu manusia. Tapi haitu ledo muni nakana, apa ane rapana yaku da nompasimbuku mompakadamba rara nu manusia, ledo masipato yaku majadi batua i Yesus Kristus!

1 Tesalonika 2:4

Kami ledo notesa aga mompakadamba rara manusia. Kami notesa mompakadamba rara nu Alatala, sabana Iamo nomparesa rara ntai kami, bo Iamo nombareke kami masipato mompatolele Kareba Belo.