Suro-Suro 10:38 - Kaili Ledo

³⁸ Nisanimiu muni Alatala nompelisi i Yesus toNazaret bo nidekeiNa Nosa Gasa bo kuasa. Nisanimiu muni i Yesus hau ri umba-umba novia anu nabelo, bo nipakabeloNa pura-pura tona nipandasa Magau nu Seta sabana Alatala naria nte Ia.

Suro-Suro 10:38 ပူးပေါင်းရင်းမြစ်များ

Matius 12:15

Nisani i Yesusmo patuju ntoFarisi nadaa haitu nte Ia. Jadi nalaimo Ia lako ri ponturo haitu hau ri ponturo ntanina. Nadea mpuu tona nantuntuni Ia bo isema-sema nadua, nipakabeloNamo.

Matius 12:28

Yaku nompopalai seta-seta ante kuasa Nosa Gasa nu Alatala. Bo haitu nompopakita ka komiu Alatala nompamulamo nomparenta ri tatangamiu!

Matius 9:19

Nangepe haitu, neanggamo i Yesus hau mantuntuni tuama nu ngana haitu. Bo anaguruNa muni hau nosanggani nte Ia.

Matius 9:35

I Yesus hau nompesayoki ngata dea. Ia nompatuduki ri banua-banua petupu bo nompatolele kareba Poparenta nu Alatala. Bo nipakabeloNa tona nadua mpengaya-ngaya.

Markus 6:6

Bo nahera mpuu i Yesus nanggita ira ledo nomparasaya. Naupu haitu haumo i Yesus nompesayoki ngata-ngata ntanina ri bagia haitu, bo nompatolele Tesa nu Alatala.

Lukas 3:22

bo Nosa Gasa nolenje mpo tonji banggebodo, netuu nte Ia. Pade naria suara lako ri suruga nanguli, “Ikomo AnaKu nipotoveKu. Ikomo nompakadamba raraKu.”

Lukas 4:18

“Nosa Gasa nu Alatala naria nte Yaku, sabana Iamo nompelisi Yaku manggeni Kareba Belo ka tona napakasi. Ia nomposumba Yaku mangulika tona nitavani, rakabasaka. NituduNa Yaku mangulika tona naburo, mamala mekita mpanjili. NituduNa Yaku mombakabasaka tona nipobatua.

Lukas 9:42

Tempo ngana haitu nolipa hau ri ngayo i Yesus, nidungganaka nu setamo ia bo karona nanggaradii-dii. Tapi i Yesus nompopalai seta bo nipakabeloNamo ngana haitu. Nabelopa ngana haitu, niuliNa ka tuama nu ngana, “Siimo anamu.”

Lukas 9:56

Naupu sia, napolamo ira hau ri ngata ntanina.

Yohanes 10:32

Tapi nanguli i Yesus ka ira, “Nadeamo povia nabelo lako nte TuamaKu nipopakitaKu ka komiu. Povia umbana sampe rarempemiu vatu Yaku?”

Yohanes 16:32

Pariaramo! Kana makava tempona, bo nakavamo tempo haitu, komiu mosimpogaa. Komiu simbo manjili hau ri banuamiu mboto mompalaisi Yaku saitoKu. Tapi Yaku ledo aga saitoKu sabana TuamaKu naria nosanggani-nggani ante Yaku.

Yohanes 3:2

Ia nakava nte i Yesus tempo nabongi bo nanguli, “Guru, nisani kami Komiu tu nisuro nu Alatala mompatuduki kami. Sabana, ledo ria saitoa tona mompakule movia kabaraka mpo anu nipoviaMiu tutu ane Alatala ledo nosanggani nte ia.”

Yohanes 3:34

Tona nisuro nu Alatala, Iamo nompapola tesa nu Alatala, sabana Alatala nombadekei Nosa GasaNa ka Ia, ledo ria pantaaNa.

Yohanes 6:27

Nee aga mokarajaa ala manggava kandea anu masalisa maupu atau mavai. Agina komiu mokarajaa ala manggava kandea anu ledo mavai bo anu mombadekei katuvua mabelo sampe ri kasae-saena. Yaku, Ana nu Manusia mombadekei kandea haitu ka komiu, sabana Yakumo nianggataka nTuamaKu Alatala mantui pokarajaa haitu.”

Suro-Suro 10:37

Nisanimiu anu najadi ri njumangu tana ntoYahudi. Nompamula ri bagia Galilea, tempo i Yohanes nombadiu tona anu najea lako ri dosa-dosara.

Suro-Suro 2:22

I Petrus nompakapola tesana ivei: “Sampesuvu-sampesuvuku toIsrael! Pariaramo tesaku hitu! Alatala nompopakita ka komiu pura-pura, Ia mpuu-mpuu nompelisi bo nantudu i Yesus toNazaret, sabana nidekeikaNa kuasa movia kabaraka bo tanda-tanda nipokumaaka. Nisanimiu mboto tesaku hitu nakana, sabana kajadia haitu pura-pura najadi ri tatangata.

Ibrani 1:9

Iko nompotove pokainggu nanoa bo navuu mataMu nanggita pokainggu natenggo. Jadi haitu sampe Yaku, TupuMu Alatala nompelisi Iko, bo nibilaKu Iko bo nipakadambaKu raraMu nelabipa pade roa-roaMu.” Mazmur 45:7-8

1 Petrus 5:8

Komiu kana mainga bo manoto rara, sabana balimiu, Magau nu Seta hau tumai nasimbayu mpo singa nongao-ngao nompengavu tona rasakana.

1 Yohanes 2:20

Tapi nitarimamiumo Nosa Gasa nu Alatala, anu nipopanau i Yesus Kristus. Haitu sampe komiu pura-pura nangisani pepatuduki nakana.

1 Yohanes 3:8

Tapi isema-sema batena novia dosa, ia nangoseaka dota Magau nu Seta, sabana Magau nu Seta nadosa mami lako ri lamba pamulana. Patuju kakava Ana nu Alatala ri dunia ala mompakaropu povia Magau nu Seta.