Roma 9:5 - Kaili Ledo

⁵ Ira muli i Abraham, i Ishak bo i Yakub, totua toIsrael nggaulu anu nipelisi nu Alatala. Bo tempo i Kristus najadi manusia, Ia nipoanaka lako ri muli ntoIsrael. Iamo nombakuasai pura-pura. Iamo Alatala anu masipato ratoiya sampe ri kasae-saena. Amin!

Roma 9:5 ပူးပေါင်းရင်းမြစ်များ

Matius 28:20

Patudukimo ira ala raoseakara pura-pura anu niparentaKu ka komiu. Bo toramo! Yaku bate-batena mosanggani-nggani ante komiu sampe ri kaupu dunia.”

Matius 6:13

Nee rapalamba kami rapesori bo kabasakamo kami lako ri kuasa Magau nu Seta. [Sabana Komiumo Magau nakuasa bo nipokumaaka sampe ri kasae-saena. Amin.]

Lukas 20:44

Jadi ane i Daud mboto nanguli Magau Topepakasalama haitu Puena, berimba sampe rauli Ia muli Magau Daud?”

Yohanes 10:30

Yaku bo TuamaKu ledo ria posisalana, aga saito.”

Suro-Suro 20:28

Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa.

Suro-Suro 3:13

Alatala anu nisomba ntotuata bo Nabi Abraham, i Ishak, bo i Yakub, Iamo nombabila bo nompakaoge BatuaNa i Yesus. I Yesus haitumo nidekeimiu ka pomarenta, bo Iamo nipoaramiu ri ngayo i Pilatus tempo i Pilatus madota mombakabasaka Ia.

Roma 1:25

Ira nombasapuaka pepatuduki nakana anu notesaki inggu nu Alatala. Ira aga nangoseaka pepatuduki nasala. Ira ledo nadota nombasomba bo nangoseaka Alatala Topepajadi, ira aga nombasomba bo nangoseaka anu nipajadiNa. Kakanana aga Alatala Topepajadi masipato ratoiyata sampe ri kasae-saena. Amin.

Roma 1:3

Kareba Belo haitu notesaki Ana nu Alatala, haitumo Tuputa Yesus Kristus. I Yesus najadi manusia apa Ia nipoanaka lako ri muli Magau Daud. KagasaNa nasimbayu nte kagasa nu Alatala sabana Ia Ana nu Alatala mami. Nisanita Ia mpuu-mpuu Ana nu Alatala sabana Alatala nompakatuvu Ia mpanjili lako ri kamateNa ante kuasa nipokumaaka.

Roma 10:12

Tesa-tesa hitu nambela ka pura-pura tona sabana ledo ria posisalana toYahudi bo tona ledo toYahudi. Aga saito Alatala, bo Ia Tupu nu manusia pura-pura. Ia nabelo raraNa nte pura-pura tona anu nekakai nte Ia.

Roma 11:28

Sii-sii toYahudi nireke bali nu Alatala sabana ira ledo nadota nomparasaya Kareba Belo. Bo haitumo anu nanggeni belo ka komiu tona ledo toYahudi. Tapi naupa ivesia, toYahudi da nipotove nu Alatala, sabana Ia nompelisi ira nggaulu majadi todeaNa, bo kana nitoraNa pojanjiNa nte totuara nggaulu.

1 Korintus 14:16

Rapana kita manguli tarima kasi ka Alatala ante mompake basa nopuna lako ri Nosa Gasa. Ane maria tona ntanina mangepena, berimbamo ia manguli “Amin! Nakana tu!” ane ledo nisanina batuana tesata?

2 Korintus 11:31

Alatala, Tuama nTuputa i Yesus, Iamo masipato ratoiya sampe ri kasae-saena! Bo nisaniNa anu nitesaku hitu nakana, yaku ledo nodava!

1 Timotius 3:16

Nabelo mpuu pepatuduki nakana niparasayata, anu dopa nisani ntona nggaulu tapi sii-sii nipopaisani nu Alatala ka kita ivei: Ia najadi manusia bo Nosa Gasa nosabiki Ia mpuu-mpuu tona nipelisi nu Alatala. Ia nikita nu malaeka nu Alatala bo karebaNa nipatolele ka tona dopa nosisani nte Alatala. Ia niparasaya ntona ri umba-umba ri dunia bo Ia nianggataka hau ri suruga.

1 Timotius 6:15

Ia makava ri tempo nipakatantu nu Alatala. Aga Alatalamo nakuasa, bo nambaso mpuu kaogeNa. Ia Magau nakuasapa pade pura-pura magau ntanina, bo Tupu anu nakuasapa pade pura-pura tupu ntanina.

2 Timotius 2:8

Ane murasai kasusa, toramo i Yesus Kristus, muli Magau Daud. Ia namate bo natuvu mpanjili evamo anu nitesa riara Kareba Belo nipatoleleku.

Ibrani 7:24

Tapi i Yesus batena natuvu. Haitu sampe Ia batena nokarajaa mpo topanggeni pesomba. PokarajaaNa ledo nolinja nte tona ntanina.

1 Yohanes 5:20

Nisanita muni i Yesus, Ana nu Alatala, nakava ri dunia hitu mompakanoto rarata ala kita mamala mosisani belo ante Alatala anu nakana. Kita natuvu nosangu rara nte Alatala anu nakana sabana kita natuvu nosangu rara nte AnaNa, i Yesus. Iamo Alatala anu nakana bo Iamo nombadekei katuvua nabelo sampe ri kasae-saena.

Pompakita 1:18

Yakumo hii anu Natuvu. Bara ipia Yaku namatemo. Tapi peintamo, sii-sii Yaku natuvu mpanjili sampe ri kasae-saena. Yakumo nakuasa nantipale gunji kamatea bo ponturo ntomate.

Pompakita 22:16

“Yaku i Yesus, nombatudu malaekaKu hau mompopaisani petevaiKu hitu ka komiu todea topangoseaka Yaku. Yakumo hii muli bo valaa Magau Daud. Yakumo hii betue pompaeo anu nareme.”

Pompakita 22:20

Bo i Yesus anu nompasimbayu pura-pura tesa hitu nanguli, “Nakana! Domo masae makavamo Yaku!” Amin! Maranata! Kakavamo, Pue Yesus!

Pompakita 5:14

Bo nepasiosemo ampa Anu Natuvu haitu, “Amin, nakana mpuu!” Bo nantaputumo totua-totua gahaitu sampe ri tana mombasomba Alatala.