Roma 8:3 - Kaili Ledo

³ Atura agama ledo namala mombakabasaka kita lako ri kuasa dosa sabana kita manusia ledo nompakule mangoseaka Atura haitu. Tapi anu ledo namala nipovia nu Atura agama, namala nipovia nu Alatala. NituduNa AnaNa mboto tumai ri dunia, bo AnaNa najadi manusia ante karo nasimbayu mpo karo nu manusia nadosa ala Ia mombarasai pehuku nu Alatala ri karoNa sabana dosata. Bo ante pohuku karo i Yesus, Alatala nombadagi kuasa nu dosa riara ntaita.

Roma 8:3 ပူးပေါင်းရင်းမြစ်များ

Markus 15:27

Naria muni randua topeago nipaku ri kayu salib ntanina nosanggani-nggani ante i Yesus, saito ri pangganaNa bo saitopa ri panggaiNa.

Yohanes 1:14

Ia anu niuli Tesa nu Alatala haitu najadi manusia bo nonturo ri tatanga kami ri dunia hitu. Bo nikita kami kuasaNa bo kaogeNa, haitumo kuasa bo kaoge nitarimaNa lako nte TuamaNa apa Ia AnaNa saito-itoNa. Iamo sampe nisanita mpuu Alatala bo toveNa ka kita.

Yohanes 9:24

Naupu haitu, nipokiora vai sangganipa toburo haitu bo nipekutanara, “Ulimo anu nakana ri ngayo nu Alatala! Nisani kamimo tona nompakabelo matamu haitu tona nadosa!”

Suro-Suro 13:39

Kita ledo namala rakabasaka lako ri dosata ane aga nangoseaka Atura-atura nipapola Nabi Musa. Tapi isema-sema nomparasaya i Yesus, rakabasaka lako ri pura-pura dosana bo majadi nanoa ri panggita nu Alatala.

Roma 3:20

Ledo ria saitoa tona majadi manoa ri panggita nu Alatala sabana nangoseaka Atura-atura agama. Apa Atura haitu aga nompopaisani ka kita pura-pura manusia nadosa.

Roma 6:6

Nisanita katuvuta nokolu nireke namate nosanggani-nggani ante i Kristus ri kayu salib, ala kuasa nu dosa riara nggatuvuta rapakaropu, bo kita domo rakuasai nu dosa.

Roma 7:18

Nisaniku ledo ria anu nabelo riara ntaiku, apa yaku manusia nadosa. Yaku madota mokainggu mabelo, tapi ledo nipakuleku.

Roma 8:32

Ledo natove raraNa nte AnaNa mboto, nidekeiNa rapatesi mantolo dosata. Sabana haitu, nisanita kana radekeiNa muni ka kita mpengaya-ngaya anu niparaluuta ante joi raraNa.

Roma 9:3

Ane rapana mamala, aginapa yaku rapindasi nu Alatala bo rapopogaa lako nte i Kristus, asaa sampesuvuku toYahudi momparasaya.

2 Korintus 5:21

I Kristus ledo ntoto nadosa. Tapi Alatala nompoposimbuaka ka Ia dosata bo nipoviaNa Ia mpo tona nadosa ala manjambei kita. Alatala novia haitu ala kita anu nosangu rara nte i Kristus majadi manoa ri panggitaNa.

Galatia 3:13

Kita manusia masipato rahuku nu Alatala, sabana kita pura-pura nombaliunaka AturaNa. Tapi i Kristus nombakabasaka kita lako ri pehuku haitu, sabana tempo Ia namate ri kayu salib, Iamo nihuku manjambei kita. Nisanita i Kristus nihuku nu Alatala sabana naria tesa riara Buku Gasa nanguli ivei: “Isema-sema namate niloe ri kayu, haitu tandana ia nihuku nu Alatala.”

Galatia 3:21

Jadi nuapa batuana? Atura agama nositaliku ante pojanji nu Alatala? Tantu ledo. Ane rapana rapakuleta mangoseaka Atura agama sampe rakavata katuvua nabelo, tantu haitumo majadi dalata mompakanoa karota mboto ri panggita nu Alatala.

Filipi 2:7

Tapi lako ri dotaNa mboto nikabasakaNa pura-pura haitu bo najadi mpo batua. Ia najadi nasimbayu nte manusia bo nikita ntona Ia natuvu mpo manusia.

Ibrani 10:12

Tapi aga sangu pesomba nikeni i Kristus, haitumo karoNa mboto nidekeiNa rapatesi majadi pesomba posompo dosa. Bo pesombaNa haitu nompakule mompakalali dosa sampe ri kasae-saena. Naupu nanggeni pesomba haitu, Ia nonturo ri panggana nu Alatala.

Ibrani 10:14

Jadi lako ri pesombaNa sangu, i Kristus nompakalali dosata, bo nompakanoa kita ri panggita nu Alatala sampe kita domo makura nuapa-nuapa sampe ri kasae-saena.

Ibrani 2:14

Kita anu niuli i Yesus ana-ana, aga manusia biasa anu mamate. Jadi haitu sampe i Yesus muni najadi manusia bo nombarasai pura-pura anu nirasaita. Ia najadi manusia ala Ia mamala mamate mompakaropu kuasa Magau nu Seta anu nombakuasai kamatea.

Ibrani 2:17

Haitu sampe Ia kana najadi nasimbayu ntoto ante kita sampesuvu-sampesuvuNa. Ane Ia nasimbayu ntoto nte kita, Ia namala majadi Pakeni nTopanggeni Pesomba anu naasi mataNa nanggita todeaNa bo natutu nombatui pokarajaa nidekei nu Alatala ka Ia, sampe dosa manusia namala nisompo.

Ibrani 4:15

Ia Pakeni nTopanggeni Pesomba anu nangisani kalenteta, sabana Ia mboto nombarasai mpengaya pesori nasimbayu mpo kita, tapi Ia ledo novia dosa.

1 Petrus 2:24

I Yesus mbotomo nanjimbuaka dosa-dosata tempo Ia nipaku ri kayu salib, ala kita rakabasaka lako ri kuasa nu dosa bo matuvu mangoseaka dota nu Alatala. Bo kita nipakabelomo lako ri baka-baka i Kristus.