Roma 6:23 - Kaili Ledo

²³ Isema-sema novia dosa manggava tambo, bo tambo haitu kamatea anu mompopogaa ia lako nte Alatala. Tapi pedekei bayangi lako nte Alatala ka kita, haitumo kita matuvu mabelo sampe ri kasae-saena. Kita nanggava pedekei bayangi sabana kita nosangu rara ante Tuputa i Yesus Kristus.

Roma 6:23 ပူးပေါင်းရင်းမြစ်များ

Matius 25:46

Bo i Yesus nompakaupu tesaNa ante nanguli, “Pura-pura tona nadaa haitu rahuku sampe ri kasae-saena. Tapi tona nanoa, matuvu mabelo sampe ri kasae-saena.”

Yohanes 10:28

Yaku nombadekei ka ira katuvu mabelo sampe ri kasae-saena bo ira ledo ntoto rapopogaa lako nte Alatala. Ledo ntoto maria saitoa tona mamala mangago bimbaKu lako nte Yaku.

Yohanes 17:2

NidekeiMiumo kuasa ka Yaku, kuasa moparenta pura-pura manusia ala mamala Kudekei katuvua mabelo sampe ri kasae-saena ka tona nidekeiMiu ka Yaku.

Yohanes 3:36

Isema-sema momparasaya AnaNa, manggava katuvua mabelo sampe ri kasae-saena. Tapi isema-sema ledo nekou nte AnaNa ledo manggava katuvua mabelo haitu. Ia aga rapambela rau rara nu Alatala sampe ri kasae-saena.”

Yohanes 4:14

Tapi isema-sema manginu uve Kudekei ka ia, domo mabai tambolona sampe ri kasae-saena. Sabana uve Kudekei ka ia haitu majadi uve mpemata moili lako riara ntaina bo nombadekei katuvua mabelo ka ia sampe ri kasae-saena.”

Yohanes 4:36

Topokato nompamulamo nantarima tambora apa nipasiromura asele anu manggeni katuvua nabelo sampe ri kasae-saena. Jadi topotuda bo topokato madamba-damba mpasanggani. Asele nipasiromura, batuana manusia anu manggava katuvua mabelo sampe ri kasae-saena.

Yohanes 5:24

Pariaramo tesaKu, isema-sema nangepe tesaKu bo nomparasaya Alatala anu nantudu Yaku, ia manggava katuvua nabelo sampe ri kasae-saena. Ia ledo mambela pehuku bo ledo rapopogaa lako nte Alatala tapi nariamo katuvua nabaru nte ia.

Yohanes 6:27

Nee aga mokarajaa ala manggava kandea anu masalisa maupu atau mavai. Agina komiu mokarajaa ala manggava kandea anu ledo mavai bo anu mombadekei katuvua mabelo sampe ri kasae-saena. Yaku, Ana nu Manusia mombadekei kandea haitu ka komiu, sabana Yakumo nianggataka nTuamaKu Alatala mantui pokarajaa haitu.”

Yohanes 6:40

Iveimo dota nTuamaKu, ala pura-pura tona anu mombasani bo momparasaya Yaku, AnaNa, manggava katuvua mabelo sampe ri kasae-saena. Bo Kupakatuvu mpanjili ira ri kaupu nu dunia.”

Yohanes 6:68

Nesana i Simon Petrus, “Pue, nte isema rakalau kami? Aga Komiu nombatesa tesa anu nombadekei katuvua mabelo sampe ri kasae-saena.

Roma 1:32

Nisanira mami parenta nu Alatala anu nanguli tona nokainggu ivesia masipato rahuku mate. Tapi nau nisanira pokainggura haitu nadaa, kana nipoviara. Bo ane maria tona ntanina mantuntuni pokainggura nadaa, nadamba rarara.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Roma 5:12

Dosa neumba ri dunia sabana saito manusia nombaliunaka parenta nu Alatala, haitumo i Adam. Bo lako ri dosa i Adam haitu sampe naria kamatea ri dunia. Ivesiamo pura-pura manusia kana mamate apa pura-pura manusia novia dosa.

Roma 5:17

Nompamula lako ri peliunaka ntona saito, pura-pura manusia mamate. Tapi naogepa aselena lako ri anu nipovia ntosaitona, i Yesus Kristus! Alatala mpuu-mpuu nabelo nte kita bo nidekeiNa ka kita pedekei bayangi, haitumo, kita nipajadiNa nanoa ri panggitaNa sabana anu nipovia i Yesus. Isema-sema nantarima pedekeiNa haitu manggava kuasa bo katuvu nabelo sampe ri kasae-saena.

Roma 5:21

Bara ipia dosa nakuasa riara nggatuvu manusia sampe pura-pura manusia kana mamate bo rapopogaa lako nte Alatala. Tapi sii-sii, pepotove nu Alatala nakuasa riara nggatuvuta. Apa lako ri pepotoveNa haitu, Alatala nombareke kita nanoa ri panggitaNa bo nidekeiNa ka kita katuvua nabelo sampe ri kasae-saena. Haitu pura nipoviaNa sabana Tuputa i Yesus Kristus.

Roma 6:16

Nisanimiu mboto ane kita matundu nte tona bo mangoseaka parentana, kita majadi batuana. Ivesia muni ante dosa. Ane kita batena mangoseaka dota rarata anu nadaa, kita majadi batua nu dosa bo kaupuna kita mamate bo rapopogaa lako nte Alatala. Tapi ane kita matundu nte Alatala, kita majadi batuaNa bo kita rapakanoa ri panggitaNa.

Roma 6:21

Belo nuapa nitarimamiu lako ri katuvumiu nokolu? Tantu ledo ria. Komiu aga naeya matamiu nantora pokainggumiu bara ipia! Asele pokainggu ivehaitu aga nanggeni kamate anu nompopogaa kita lako nte Alatala.

Roma 8:13

Sabana, ane kita matuvu mangoseaka dotata mboto nadaa, kita mamate bo rapopogaa lako nte Alatala. Tapi ane rakabasakata pokaingguta nadaa ante kuasa lako nte Nosa Gasa nu Alatala, kita matuvu mabelo sampe ri kasae-saena.

Roma 8:38

Apa niparasayaku, nau sangaya ledo ria nompakule mompopogaa kita lako ri toveNa. Nau mamate nau matuvu, Ia bate-batena mompotove kita. Ledo ria malaeka atau seta atau kuasa ntanina, ledo ria nuapa-nuapa najadi sii-sii atau nuapa-nuapa majadi bara maipia,

Roma 8:39

ledo ria kuasa-kuasa ri laerava atau kuasa-kuasa ri tana, atau nuapa-nuapa ntanina anu nipajadi nu Alatala, nau sangaya ledo ria nompakule mompopogaa kita lako ri tove nu Alatala. ToveNa haitu nipopakitaNa ante anu nipovia nTuputa i Yesus Kristus ka kita.

Roma 8:6

Ane pekirira nikuasai dota rara nadaa, ira mamate bo rapopogaa lako nte Alatala. Tapi ane pekirira nikuasai nu Nosa Gasa nu Alatala, ira matuvu mabelo bo mosinggabelo ante Alatala.

Galatia 3:10

Isema-sema nanjarumaka majadi manoa ri panggita nu Alatala sabana nioseakana Atura agama, iamo rahuku nu Alatala. Nisanita haitu sabana riara Buku Gasa nitulisi ivei: “Isema-sema ledo natutu nangoseaka pura-pura parenta nitulisi riara Buku Atura Agama, iamo rahuku nu Alatala.”

Titus 1:2

Haitu nipoviaku ala ira mamala manjarumaka matuvu nte Alatala sampe ri kasae-saena. Dopame dunia hitu nipajadi nu Alatala, nijanjiNa todeaNa matuvu sampe ri kasae-saena. Alatala ledo nodava bo pojanjiNa namala raparasayata.

Yakobus 1:15

Ane dota pompekirina nadaa haitu raoseakana, ia madosa. Ane ia batena movia dosa, ia mamate bo rapopogaa lako nte Alatala sampe ri kasae-saena.

1 Yohanes 2:25

Hitumo nijanjiNa ka kita: Kita matuvu mabelo sampe ri kasae-saena.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”